«Կա՞ որևէ փաստ, որ զինվորականները քվեարկել են «Ելք»-ի օգտին. Արտակ Զեյնալյան. «Փաստ»

«Փաստ» օրաթերթը գրում է.

«Ելք» դաշինքի պատգամավորի թեկնածու, «Հանրապետություն» կուսակցության անդամ Արտակ Զեյնալյանը «Փաստի» հետ զրույցում ասում է, թե «Ելքը» ընդունեց ընտրությունների արդյունքները և չբողոքարկեց, քանի որ ընտրակաշառք վերցնելու առթիվ որևէ հաղորդում չեղավ:

Ներկայացնում ենք մեր զրույցը «Ելք» դաշինքի պատգամավորի թեկնածու Արտակ Զեյնալյանի հետ:

– Պարոն Զեյնալյան, առաջիկայում ՍԴ–ն քննարկելու է խորհրդարանի ընտրությունն անվավեր ճանաչելու առթիվ ՀԱԿ–ՀԺԿ դիմումը: Ի՞նչ ակնկալիք ունեք: «Ելքը» պատրա՞ստ է կորցնել 120 հազար քվե ու պատգամավորական մանդատներ:

– Եթե ՍԴ–ն գտնի, որ արդյունքները կեղծվել են և անվավեր ճանաչի կամ նշանակի վերաքվեարկություն, բնականաբար, այո: Մենք դա չենք կորցնելու, նոր ընտրությունների դեպքում մենք անհամեմատ ավելի շատ ձայներ կհավաքենք:

– Անցած ընտրություններում բազմաթիվ ահազանգեր եղան ընտրակաշառք բաժանելու հետ կապված: Ճի՞շտ եք համարում, որ «Ելքը» չմիացավ մյուս ընդդիմադիր ուժերին ու չդիմեց Սահմանադրական դատարան:

– Ընտրակաշառքի հիմքով «Ելք»–ը դիմում ներկայացրել է ԿԸՀ, որ կոնկրետ թեկնածուի՝ Առաքել Մովսիսյանի գրանցումը ուժը կորցրած ճանաչի՝ ասֆալտապատման խոստումների հետ կապված, և այդ որոշումը վիճարկել է դատարանում, այդ դիմումը մերժվել է: Ընտրակաշառքի վերաբերյալ հաղորդումները, որոնք եղել են, դրանց հիմքով ընտրությունների արդյունքներն անվավեր ճանաչելու հեռանկար մենք չտեսանք, որ դիմեինք Սահմանադրական դատարան: Ընտրակաշառքն այս ընտրություններում ոչ միայն քրեականացված էր, այլև քրեական պատասխանատվությունից կազատվեին այն մարդիկ, ովքեր 3–օրյա ժամկետում դրա մասին հաղորդում կտային այդ մասին: Մենք այդպիսի ոչ մի հայտարարություն չստացանք, թեև ինտենսիվ աշխատում էինք այդ ուղղությամբ և կատարում բացատրական աշխատանքներ:

– Սակայն մամուլում եղան ընտրակաշառքների առթիվ բազմաթիվ ահազանգեր:

– Այո, մենք նաև հայտարարությամբ մեղադրանք ուղղեցինք իրավապահ մարմիններին, ովքեր անգործություն են ցուցաբերել և ակտիվ գործողություններով չեն բացահայտել այդ դեպքերը: Դրանք այնքան տարածված էին, որ իրավապահ մարմինները չէին կարող չունենալ այդ առթիվ օպերատիվ տեղեկություններ: Ավելին, մենք կարծում ենք, որ դա ուղղակի մի համակարգի մաս է կազմել: Սակայն մենք չունեցանք հայտարարություններ այն մարդկանցից, ովքեր որ ընտրակաշառք վերցրել էին ու ներկայացել էին իրավապահներին կամ դիմել էին մեզ:

– Նախորդ ընտրությունների ժամանակ էլ, կարծես, նման հաղորդումներ տվողներ չկային, սակայն «Ելք»–ում ներգրավված անձինք մասնակցում էին ընտրությունների բողոքարկմանը:

– Նախկինում մենք՝ «Հանրապետություն» կուսակցությունը, այլ հիմքով ենք դիմել՝ ընտրությունների արդյունքներն անվավեր ճանաչելու պահանջով, դրանցում ընտրակաշառքի հիմքերը եղել են դրվագներ: Մեր ունեցած փաստական բազան այնքան է եղել, որ մենք կարողացել ենք ինքներս մեզ համոզել, որ ընտրությունների արդյունքներն անվավեր կարող են ճանաչվել: Հաշվի առնելով ՍԴ դիմելու մեր նախկին փորձը, այս ապացուցողական բազայով մենք հարմար չգտանք դիմել Սահմանադրական դատարան և մեր անդամների մոտ առաջացնել սպասում: Բնականաբար, եթե մենք պարտվեինք Սահմանադրական դատարանում, դա բերելու էր հիասթափության:

– Չե՞ք կարծում, որ հիասթափեցնող կարող է լինել նաև այն, երբ մարդիկ տեսնում են, որ ընդդիմության մի մասը գոհ է ընտրակաշառքով ընտրությունների արդյունքներից:

– Մենք ստացել ենք ավելի քան 120 հազար քվե, և այդ քվեները մեզնից չեն գողացել: Մենք այդքան քվե, որ ստացել ենք, կարողացել ենք պահել, և այդ քվեների նկատմամբ ոտնձգություն չի եղել: Ուրիշ բան, որ ընտրակաշառքով են քվեարկել մնացած մարդկանց մի զգալի մասը: Բայց մենք դա չենք կարողացել ապացուցել: Հայտարարությամբ ենք հանդես եկել իրավապահների անգործության մասին: Սակայն մեզ համար կարևոր է 120 հազար մարդկանց ձայնը, նաև կարևոր է, որ մարդիկ, որոնք ընտրակաշառքով են քվեարկել, տեսնեն, որ կա մի զգալի հատված մադկանց, ում ձայնը տեղ է հասնում: Մենք մեր առջև խնդիր ենք դրել ավելացնելու այն մարդկանց քանակը, ովքեր որ հավատում են ընտրության արդյունքներին՝ անկախ, թե նրանք ում օգտին են քվեարկում: Կարևորը, որ նրանք քաղաքական որոշում կայացնեն ու մասնակցեն ընտրություններին և ազատ կամքի դրսևորմամբ քվեարկեն:

– «Ելք»–ը այլ ընդդիմադիրների կողմից մեղադրվեց իշխանության հետ համագործակցության մեջ: Նաև ասվում է, թե զինվորականների մի մասը քվեարկել է «Ելք»–ի օգտին:

– Այդ մեղադրանքներն այնքան չնչին են, մերկապարանոց ու անհիմն, որ ես դրանք լուրջ չեմ համարում: Կա՞ որևէ փաստ, որ զինվորականները քվեարկել են «Ելք»–ի օգտին: Մենք այդպիսի վերլուծություն չունենք: Սակայն մեր նախընտրական ծրագրում կային դրույթներ, որոնք նաև ուղղված էին և՛ գործող, և՛ ապագա զինծառայողներին ու նրանց ընտանիքի անդամներին: Մենք ունենք փաստ, որ հոգեբուժարաններն ու քրեակատարողական հիմնարկները 100%–ով քվեարկել են ՀՀԿ–ի օգտին՝ հիմնված կոնկրետ փաստերի վրա: Սակայն, թե ինչպես է բանակը քվեարկել, որևէ վերլուծություն չունենք: Մարգինալ մեղադրանքներ կարող են լինել:

– Մամուլի տեղեկություններով՝ խորհրդարանական ընտրությունից հետո «Ելք»–ում փոխվել է տրամադրվածությունը «Հանրապետություն» կուսակցության նախագահ Արամ Սարգսյանի հանդեպ, քանի որ նա ընդամենը 520 ձայն է ապահովել իրենց դաշինքի համար:

– Չեմ կարդացել նման հրապարակում: «Ելք» դաշինքում նման խնդիր չկա և բոլորի կողմից կատարված աշխատանքի արդյունքն է այն, ինչը որ մենք ստացել ենք: Յուրաքանչյուր թեկնածու իր քարոզչությամբ բերել է ընդհանուր ձայներ: Արամ Սարգսյանն առաջադրվել էր չափազանց բարդ ընտրատարածքում և իր կողմից կատարված աշխատանքը կարևոր նշանակություն է ունեցել և՛ տվյալ ընտրատարածքում, և՛ ընդհանուր քարոզարշավի ժամանակ կատարվածը չափազանց կարևոր էր:

Շարունակությունը` «Փաստ» օրաթերթի այսօրվա համարում