ՀՀԿ– ՀՅԴ նոր կոալիցիան «կփրկի՞» իշխանության դեմքը, թե՞ «կցորդի» կարգավիճակ կապահովի ՀՅԴ–ի համար. «Փաստ»

«Փաստ» օրաթերթը գրում է.

Մինչ Սահմանադրական դատարանը քննում է խորհրդարանի ընտրությունների արդյունքներն անվավեր ճանաչելու ՀԱԿ–ՀԺԿ դիմումը, իշխանությունը ակտիվ բանակցում է ՀՅԴ–ի հետ` ապագա կոալիցիայի շուրջ: Ասել է թե՝ իշխանությունը չի հավատում ՍԴ–ում իրավիճակի փոփոխության հնարավորությանը ու չի էլ սպասում դիմումի քննության ավարտին:

Իսկ ՀՀԿ–ՀՅԴ կոալիցիոն նոր հուշագիրը արդեն իսկ քննարկվել է ՀՅԴ–ում: Ըստ այդմ՝ այն մի քանի հավելումներով կրկնելու է ներկա համագործակցության հուշագիրը, թեև տեղեկություն կա, որ Դաշնակցության ախորժակը մեծ է: Մյուս կողմից, 1 տարի լինելով կառավարության կազմում, ՀՅԴ–ն տեսանելի արդյունք ցույց չտվեց:

ԱԺ ՀՅԴ պատգամավոր, Օպերային հարակից «Մեղեդի» սրճարանի սեփականատեր Միքայել Մանուկյանը չնայած առաջադրվել է թե՛ համամասնական, թե՛ ռեյտինգային ցուցակով, նոր խորհրդարանում չի լինելու: Նա զբաղեցնում է ՀՅԴ ցուցակի 10–րդ հորիզոնականը, իսկ ՀՅԴ–ից խորհրդարան են անցնելու 7 հոգի:

Ներկայացնում ենք «Փաստի» հարցազրույցը Միքայել Մանուկյանի հետ:

– Պարոն Մանուկյան, ՀՅԴ–ն այսօր ակտիվ բանակցությունների մեջ է իշխանության հետ: Հնարավո՞ր է պորտֆելների փոփոխություն լինի:

– Ես նման տեղեկություն չունեմ: Դեռ քննարկման փուլում է ամեն ինչ: Հուշագրի հետ միասին դա էլ պարզ կլինի: Նախկին համաձայնագիրը ուժի մեջ է, ինչ–որ բաներ էլ կավելացվի, կստորագրվի, կտեղեկացվեք:

– Կոալիցիոն նոր հուշագիրը Ձեզ հետ քննարկվե՞լ է:

– Այո:

– Ի՞նչ նոր կետեր են ներառվելու մեջը:

– Նախկին հուշագիրը դեռ ուժի մեջ է: Նորի մեջ էլ մի քանի կետեր կավելացնեն ու կհրապարակվի: Մինչև հրապարակելն ինչ իմաստ ունի ինչ–որ բան ասել:

– Անակնկալներ սպասելի՞ են:

– Նայած ինչ ի նկատի ունեք՝ անակնկալ ասելով: Ամեն ինչ հնարավոր է:

– Այսպիսով՝ ՀՅԴ–ն շարունակելու է կիսել կառավարության գործունեության պատասխանատվությունը: Ինչպե՞ս եք գնահատում, որ Դաշնակցությունը լիովին դուրս է գալիս իր նախկին ընդդիմադիր կերպարից ու դառնում է իշխանության կցորդը:

– Ոչ, ես էդպես չեմ համարում: Դաշնակցությունը քաղաքական ուժ է, ունի իր նպատակները, ունի իր ծրագրերը և կառավարության մեջ պիտի առաջնորդվի առաջին հերթին իր գաղափարներով ու իր ծրագրերով: Իր գաղափարները ներդնի նույն կառավարության ծրագրում:

– Սակայն մենք տեսանք, որ այս մեկ տարվա ընթացքում կառավարության ներսում դաշնակցությունը որևէ էական հաջողություն չարձանագրեց: Ստացվում է՝ ուղղակի պաշտոնների համա՞ր է գնում կոալիցիայի:

– Բնականաբար՝ ոչ: Դուք էլ գիտեք դրա պատասխանը, որ այդպես չի կարող լինել Դաշնակցության պարագայում: Դաշնակցությունն էլ ունի իր ծրագրերը, իր գաղափարները և պետք է աշխատի, որ դրանք տեղ գտնեն նաև այս կառավարության ծրագրում:

– Իսկ Ձեր կարծիքով, դաշնակցության գաղափարներն ու ծրագրերը որքանո՞վ իրականացան այս մեկ տարում, երբ կառավարության անդամ էր:

– Ինչքանով որ կարողացանք:

– Գո՞հ է Դաշնակցությունը կառավարության կազմում իր գործունեությունից:

– Դժգոհ չենք:

– Բայց փոխարենը, կարծես, հանրությունն է դժգոհ կառավարության գործունեությունից և, փաստորեն, նաև ձեզանից:

– Նման դժգոհություն չեմ տեսնում: Փաստը հենց նույն ընտրություններն են:

– Մեկ տարի առաջ կոալիցիա կազմելու ժամանակ Արմեն Ռուստամյանը հայտարարեց, որ Դաշնակցությունը գնում է ՀՀԿ–ի դեմքը փրկելու: Հաշվի առնելով փաստը, որ ընտրակաշառքով ընտրություններ եղան, այս անգամ և՞ս ՀՅԴ–ն փորձելու է փրկել Հանրապետականի դեմքը:

– Դաշնակցությունը գնում է աշխատելու հանուն Հայաստանի Հանրապետության, հանուն հայ ժողովրդի, իր ծառայությունները մատուցելու ժողովրդին:

– Անվերապահորեն ընդունելով ընտրությունների արդյունքները և սատարելով ՀՀԿ–ին, Դաշնակցությունն ավելի չի՞ գնում ծառայելու իշխանությանը:

– Ոչ, Դաշնակցությունը ծառայում է միայն հայ ժողովրդին: Իսկ ընտրությունների մասով մենք հայտարարություն արել ենք, ընտրությունների գնահատականը տրվել է:

Եթե մեր գաղափարները չհամապատասխանեն ՀՀԿ–ի գաղափարների հետ, մենք կբարձրաձայնենք, ինչը միշտ արել ենք և՛ կոալիցիայի մեջ, և՛ կոալիցիայից դուրս:

Շարունակությունը` «Փաստ» օրաթերթի այսօրվա համարում