Սրտի անվճար ստենտավորում. ովքե՞ր կարող են օգտվել պետպատվերի ծրագրից

Dialogue.am-ը գրում է.

ՀՀ-ում ներկայում սրտի անվճար և արտոնյալ վիրահատություններն իրականացվում են  բնակչության սոցիալապես անապահով և հատուկ խմբերում ընդգրկված (36 և ավելի անապահովության միավոր ունեցող) անձանց, սոցիալական փաթեթի շահառուներ հանդիսացող զինծառայողներին, ինչպես նաև փրկարար ծառայողներին և նրանց ընտանիքի անդամներին, պետական հիմնարկների և կազմակերպությունների աշխատողներին:

Հաշվի առնելով մեր երկրում սրտանոթային հիվանդությունների տարածվածությունը, նշված դեպքերով մահացության 48% ցուցանիշը և ծառայության բարձր պահանջարկը` Կառավարությունը ձեռնամուխ եղավ անվճար վիրահատությունների կարիք ունեցող քաղաքացիների համար նոր կարգ մշակել։

2015-ի հունվարի 1-ից Հայաստանում մեկնարկեց «Կյանք փրկող» անվանումը ստացած մի նոր ծրագիր, որի շնոհիվ արդեն  հնարավոր է սրտի  անվճար և/կամ արտոնյալ սկզբունքով  վիրահատություններ իրականացնել նաև դրա  իրավունք չունեցող անձանց համար : Այս նպատակով բյուջեից ընդհանուր առմամբ հատկացվող գումարները  հնարավորություն տվեցին տարեկան վիրահատել կամ ինչպես ծրագրի անվանումը կհուշի՝ փկրել  շուրջ 1200 անձանց կյանք՝ օգտագործելով  1 ոչ դեղապատ   ստենտ։

Նախորդ տարիներին ԱՆ-ի հետ  «Սրտի անհետաձգելի վիրահատություններ» բյուջետային ծրագիր շրջանակներում բուժսպասարկման ծառայությունների պետպատվերի պայմանագիր ունեցել են թվով 10-ը բուժհաստատություներ ՝Երևանում և 2 -ը մարզերում՝

•  «Նորք Մարաշ»
• «Աստղիկ »
•  «Էրեբունի»
• «Լևոն Հովհաննիսյանի անվան սրտաբանության» կենտրոն
• «Քանկոր սիրտ-անոթային բժշկական կենտրոն
• «Արամյանց բժշկական կենտրոն»
• «Հերացի» թիվ 1 համալսարանական հիվանդանոց
•  «Արմենիա» հանրապետական բժշկական կենտրոն
•  «Գյումրի բժշկական կենտրոն» ՓԲԸ
• «Ֆրանս-հայկական սրտանոթային կենտրոն»

Սրտի անհետաձգելի վիրահատություն իրականացնող բժշկական կազմակերպություններում սպասարկման որակից և ծրագրի արդյունավետությունից դժգոհությունները շատ չեն, ընդհանուր առմամբ հասարակության գնահատականը խիստ բարձր է թե՛ բյուջետային այս ծրագրի և թե՛ մատուցվող ծառայություների վերաբերյալ։ Այդուհանդերձ, հաշվի առնելով  բարձրակարգ բուժկենտրոններում խրոնիկ դարձած այն երևույթը, որ կանխավ շատ դեպքերում քաղաքացիներին հրաժարվում են սպասարկել պետպատվերի շրջանակներում՝  պատճառաբանելով, որ իբր  հատկացված գումարն սպառվել է, Dialogue.am–ի «Սոցիալական իրավունք» շարքը գործող կարգի պարզ մեկնաբանության միջոցով ևս մեկ անգամ քաղաքացիներին տեղեկացնում է իրենց սոցիալական իրավունքի մասին։

ՀԻշեցնենք,  բազմաթիվ դժգոհություներից հետո՝  Կառավարությունն անցած տարի օգոստոսին  վերանայեց  ստենտավորման ծառայությունների շուկայական  գները և  արհեստականորեն ուռճացված գներն իջեցվեցին մինչև 40%-ով։  Մեկ դեղապատ ստենտի տեղադրման արժեքն այսօր կազմում է 1 մլն 200 հազար դրամ՝ նախկին 1 մլն 500 հազար դրամի փոխարեն:  Սա նշանակում է, որ բյուջետային ծրագրի շրջանակներում  2017-ից սկսած գործող նոր գնացուցակի համաձայն՝ նախատեսվում է սպասարկել անհամեմատ ավելի մեծաքանակ վիրահատություններ՝ Երևանում և մարզերում։

Ներկայացնում ենք պետական պատվերի շրջանակներում իրականացվող սրտի ստենտավորման   հին և նոր սակագները.

Կոնորար անոթների ստենտավորում՝	իջեցված գներ	Հին գներ	Տարբերություն
ա)դեղապատ մեկ ստենտով	1.080.000	1.600.000	520.000
բ)դեղապատ երկու ստենտով	1.430.000	2.200.000	770.000
գ )դեղապատ երեք ստենտով	1.780.000	2.800.000	1.020.000
դ)դեղապատ չորս ստենտով	1.130.000	3.400.000	1.270.000
Կոնորար անոթների ստենտավորում՝
ա)դեղապատ մեկ և ոչ դեղապատ մեկ ստենտով	1.230.000	1.750.000	520.000
բ)դեղապատ մեկ և ոչ դեղապատ երկու ստենտով	1.380.000	1.900.000	520.000
գ)դեղապատ մեկ և ոչ դեղապատ երեք ստենտով	1.530.000	2.050.000	520.000
դ)դեղապատ երկու և ոչ դեղապատ մեկ ստենտով	1.580.000	2.350.000	770.000
ե)դեղապատ երեք և ոչ դեղապատ մեկ ստենտով	1.930.000	2.950.000	1.020.000
զ)դեղապատ երկու  և ոչ դեղապատ երկու ստենտով	1.730.000	2.500.000	770.000

 Տեղեկացնենք, որ Կառավարության որոշմամաբ  «Սրտի անհետաձգելի վիրահատություններ» ծրագրի իրականացման համար 2017-ին   պետական բյուջեից հատկացվել է  3.084 մլն դրամ, ինչը նախորդ տարվա համեմատ պակաս է 2 միլիոնով։ 

Ծրագրի իրականացման համար,   23.01.2017-ի դրությամբ,  բժշկական կենտրոների հետ ԱՆ-ի կողմից պայմանագրեր դեռևս չեն կնքվել, հետևաբար հայտնի չէ նաև , թե ե՞րբ է փոխանցվելու  առաջին տրանշը բուժկենտրոններին։  Ուշացման պատճառների մասին Առոողջապահության նախարարությունից մեզ հետ զրույցում ստույգ որևէ  բան չասացին, փոխարենը վստահեցնում են, որ անկախ բյուջեի հատկացումների ուշացումներից, տարվա առաջին իսկ օվանից այն բոլոր բուժկենտրոնները, որոնք անցած տարվա ընթացքում ԱՆ-ի հետ ունեցել են պետպատվերով սպասարկման  պայմանագրեր (Երևանում և մարզերում), սուր ինֆարկտով բուժկենտրոն տեղափոխված  որևէ հիվանդի դեպք չեն անտեսել, ստենտավորումն իրականացվել  և իրականացվելու է անվճար՝ սահմանված նորմի համաձայն՝ հետագայում պետբյուջեից հատկացվող գումարներից  փոխհատուցուման նպատակով։

Ո՞վ իրավունք ունի վիրահատվել ծրագրի շրջանակներում և քանի՞ ստենտն է անվճար 

Պետության կողմից երաշխավորված սրտի անհետաձգելի վիրահատության ծրագրից իրավունք ունեն օգտվել  այն քաղաքացիները, ովքեր ներառված չեն անվճար վիրահատության իրավունք ունեցող որևէ խմբում` անկախ սոցիալական կարգավիճակից:  Յուրաքանչյուր քաղաքացու տարվա ընթացքում պետպատվերի շրջանակներում  կարող է սպասարկվել միայն մեկ անգամ՝ տեղադրելուվ ոչ դեղապատ մեկ ստենտ՝  սուր ինֆարկտի ծանր դեպքերում և   բժշկական համապատասխան ցուցումների առկայության պարագայում։ Այսինքն՝ այս  ծրագրի համար կարևոր է բացառապես հիվանդության աշխտորոշումը և հիվանդի ծայրահեղության աստիճանը: Պետության այս աջակցությունը համարում է կյանք փրկել։

Ի դեպ, վիրահատությունն ու մինչ այդ անհրաժեշտության բերումով իրականացվող լրացուցիչ ծառայությունները (այդ թվում հետազոտություններ)  իրականացվում են պետպատվերի շրջանակներում։ Կարևոր է նշել, որ  ոչ բոլոր բուժհաստատություններն են իրավասու իրականացնել վիրահատություններ՝ ծրագրի շրջանակներում: Թե որ  բժշկական կենտրոնները այս տարի կշարունակեն սրտի անհետաձգելի վիրահատություններ անել, դեռևս  հստակ չէ:

---

Ձեր իրավունքն իրացնելիս խոչընդոտների հանդիպելու դեպքում կամ  հավելյալ տեղեկատվություն ստանալու համար կարող եք դիմել՝

ՀՀ առողջապահության նախարարության աշխատակազմի պետական առողջապահական գործակալություն՝ (+374 10) 65 47 11 կամ 65 46 91

Պատրաստեց՝ Լաուրա Մամյանը
www.dialogue.am