«Eurovoix.com»-ը, հղում անելով ուկրաինական եւ ռուսական ԶԼՄ-ներին, նշել է, որ «Եվրատեսիլ» համաեվրոպական երգի փառատոնին Հայաստանի հաղորդավարները հրաժարվել են նշել Ադրբեջանի անունը, երբ Dihaj-ի ելույթն են հայտարարել: Իսկ Depo.ua եւ Gazeta.ru լրատվամիջոցները գրել են, որ առաջին կիսաեզրափակչում, երբ բեմ է դուրս եկել Ադրբեջանի ներկայացուցիչը, Հայաստանի հաղորդավարները չեն անվանել երկրի անունը եւ ասել են, որ այժմ ելույթ կունենա հերթական երկրի ներկայացուցիչը: Հրապարակման մեջ նշվել է նաեւ, որ Հայաստանն ու Ադրբեջանն ունեն երկարատեւ հակամարտություն Լեռնային Ղարաբաղի պատճառով՝ հիշելով անցյալ տարվա միջադեպը Իվետա Մուկուչյանի եւ Ղարաբաղի դրոշի հետ կապված: Ի դեպ՝ Eurovoix.com-ը, այս ամենին զուգահեռ, նաեւ գրել է «Եվրատեսիլում» Հայաստանի մասնակցության եւ արձանագրած հաջողությունների մասին:
Life.panorama.am-ը կապ հաստատեց Հանրային հեռուստաընկերության Հասարակայնության հետ կապերի բաժնի պետ Արուսյակ Զախարյանի հետ՝ պարզելու, թե ռուսական եւ եվրոպական լրատվականների նման արձագանքը որեւէ կերպ կարո՞ղ է խոչընդոտել մայիսի 13-ին կայանալիք «Եվրատեսիլ-2017» եզրափակչում Արծվիկի ելույթին:
«Ամեն ինչ շատ լավ է, Արծվիկը պատրաստվում է փորձերին ու վճռական ելույթին: Իրականում անհանգստանալու առիթ ոչ մի չկա, վստահեցնում եմ» ,- նշեց Արուսյակ Զախարյանը, ով այժմ գտնվում է Արծվիկի կողքին:
Նրա խոսքով՝ մեր ներկայացուցիչը ջանք ու եռանդ չի խնայում հնարավորինս արժանվույն ներկայանալու այս հեղինակավոր մրցույթին:
