Համառուսաստանյան ադրբեջանական կոնգրեսը լուծարվել է. «Փաստ»

«Փաստ» օրաթերթը գրում է.

Երկու օր առաջ ՌԴ Գերագույն դատարանը բավարարել է արդարադատության նախարարության պահանջը և լուծարել «Համառուսաստանյան ադրբեջանական կոնգրես» հասարակական կազմակերպությունը:

ՌԴ արդարադատության նախարարության ներկայացուցիչը հայտարարել է, որ լուծարման հիմք են հանդիսացել կազմակերպության կողմից թույլ տրված բազմաթիվ կոպիտ խախտումները: Ընդ որում, դրանք վերացնելու նպատակով նախարարությունը բազմիցս դիմել է կազմակերպությանը, բայց ներկայացված բոլոր պահանջներն անտեսվել են:

Արդեն բավականին երկար ժամանակ շարունակվող այս գործի առնչությամբ դատարանի որոշումը բուռն արձագանք է առաջացրել Ադրբեջանում: Մոռանալով այն մասին, որ այդ կառույցի ներսում առկա խնդիրների մասին հենց ադրբեջանական մամուլն է բազմիցս գրել, ընդ որում, վերջերս նաև գրվել էր, որ այդ կառույցում տիրող տխուր վիճակն ու ամիսներ տևող դատական քաշքշուկներն են նաև պատճառ դարձել, որ պաշտոնական Բաքուն ցանկանում է հետ կանչել ՌԴ–ում այդ երկրի դեսպան Փ. Բյուլբյուլօղլուն, պաշտոնական ու ոչ պաշտոնական մակարդակներում Բաքուն սկսել է թիրախավորել Ռուսաստանի քաղաքական վերնախավն ու դատական համակարգը:

Առաջիններից մեկն արձագանքել է Ադրբեջանի ԱԳՆ մամուլի խոսնակ Հիքմետ Հաջիևը` կոնգրեսի լուծարումը գնահատելով որպես «ոչ բարեկամական քայլ»:

Նա նշել է, որ Բաքուն այդ հարցում տեսնում է «խտրականության և կանխակալ վերաբերմունքի դրսևորում ՌԴ քաղաքացիների նկատմամբ` էթնիկական պատկանելության հատկանիշով»:

Ավելին, ՌԴ Գերագույն դատարանի այդ որոշման մեջ Ադրբեջանի ԱԳՆ տեսնում է հայկական հետք: «Բնականաբար, եթե եզրակացնենք, որ հայկական սփյուռքյան շրջաններն ունեն այդքան մեծ ազդեցություն Ռուսաստանի արտաքին ու ներքին քաղաքականության վրա, ապա նման սպառնալիքը ադրբեջանա–ռուսական միջպետական հարաբերությունների զարգացմանը մեզ մոտ ափսոսանք է առաջացնում»,– ասել է Հաջիևը:

Անդավաճան մնալով սադրանքների ու շանտաժների դիմելու իրենց սիրելի գործելաոճին` ԱԳՆ խոսնակն այնքան հեռուն է գնացել իր եզրակացություններում, որ նշել է, թե այսուհետ ՌԴ չեզոքությունը որպես Մինսկի խմբի համանախագահ երկիր կասկածի տակ է հայտնվում. «Այս քայլով ՌԴ–ն` որպես Մինսկի խմբի համանախագահ երկիր, խախտում է հակամարտող կողմերի միջև հավասարակշռություն պահպանելու պարտավորությունը»:

Ադրբեջանի խորհրդարանի խոսնակ Օգտայ Ասադովն էլ է համակարծիք Հաջիևի հետ. «Լինելով Մինսկի խմբի համանախագահ` Ռուսաստանը պետք է անաչառ լինի Կոնգրեսին առնչվող հարցում, ոչ թե դադարեցնի այդ կազմակերպության գործունեությունը»:

Ըստ ադրբեջանցի քաղաքական գործիչների` այս որոշումը կարող է սեպ խրել Ռուսաստան–Ադրբեջան` նոր թափ հավաքող հարաբերություններում: Ավելին, այդ որոշման հետևում կանգնածների ուզածն էլ հենց դա է եղել: Ու որպեսզի նման բան տեղի չունենա, առաջարկվել է Միլի Մեջլիսի պատգամավորների անունից նամակ գրել ՌԴ նախագահ Պուտինին` արդարությունը վերականգնելու և ռուս–ադրբեջանական բարեկամությունը վտանգող որոշումը չեղարկելու խնդրանքով:

Բայցև, որպես պատասխան գործողություն, որոշ պատգամավորներ առաջարկել են ստուգել ռուսական հասարակական կազմակերպության գործունեությունը Ադրբեջանում:

Ադրբեջանական կոնգրեսի լուծարումը Միլի Մեջլիսի մեկ այլ պատգամավոր` Վահիդ Ախմեդովը համարել է ՌԴ կողմից իրականացված քաղաքական նշանակության քայլ: «Ամեն անգամ, երբ Ադրբեջանի տնտեսությունում լուրջ քայլեր են կատարվում, խոշոր նախագծեր են իրականացվում կամ էլ նախագահական ընտրություններ են անցկացվում, Ռուսաստանը փորձում է տարբեր ճնշումներ գործադրել: Փաստացի, Ռուսաստանը չի ցանկանում Ադրբեջանն ընդունել որպես անկախ պետություն: Այդ պատճառով էլ փորձում է ժամանակ առ ժամանակ ճնշում գործադրել Ադրբեջանի վրա: Լինելով Մինսկի խմբի անդամ` Ռուսաստանը զենք է մատակարարում Հայաստանին»:

Ախմեդովը, փաստորեն, մոռանում է, որ նույն այդ Ռուսաստանը, լինելով Մինսկի խմբի անդամ, զենք է վաճառում հենց Ադրբեջանին: Կամ էլ` դա նորմալ է: Աննորմալը Հայաստանին մատակարարելն է: Երկրորդ` ինչ վերաբերում է Ռուսաստանի կողմից պարբերաբար գործադրվող ճնշումներին հատկապես նախագահական ընտրություններից առաջ, երեկ մի ուշագրավ ինֆորմացիա է տարածվել ադրբեջանական կայքերում: Ըստ այդմ, Հայաստանին ռազմական նշանակության գաղտնի տեղեկություններ փոխանցած լրտեսական խմբի գործունեության մեջ, որ մի քանի օր առաջ չեզոքացվել էր, հնարավոր է լինի ռուսական հետք: Ադրբեջանցի պատգամավորներից մեկը նույնիսկ առաջարկել է այդ առնչությամբ հետաքննություն սկսել` նշելով, որ այդ կերպ ռուսական կողմը ցանկանում է ազդել առաջիկա նախագահական ընտրությունների վրա:

Բայց վերադառնանք մեր խնդրին: Նույն Ախմեդովն առաջարկել է ռուսական կողմի այդ քայլը անպատասխան չթողնել: «Եվրաինտեգրմանն ուղղված քայլերը պետք է ակտիվացնել, Ադրբեջանը պետք է նվազեցնի Ռուսաստանից զենքի գնումը, պետք է մեծ ուշադրություն դարձվի ՆԱՏՕ–ին ինտեգրմանը»:

Ադրբեջանական այս բուռն արձագանքը կարելի է որոշ չափով հասկանալ: Համառուսաստանյան ադրբեջանական կոնգրեսը Ռուսաստանում ապրող ադրբեջանցիներին միավորող և կազմակերպող հիմնական կառույցն էր: Դրա շուրջն էր համախմբում ադրբեջանական համայնքը: Ու հիմա, երբ այն լուծարվել է, համայնքը, ըստ էության, մնում է անտեր: Իսկ դա նշանակում է, որ կորցնում է ազդեցության իր լծակները, որոնք ունեցել են նաև քաղաքական բնույթ:

 

Շարունակությունը` «Փաստ» օրաթերթի այսօրվա համարում: