Ամերիկան պառակտված ու շփոթվա՞ծ է, թե՝ շիզոֆրենիկ

INTERNATIONAL NEWS 20 May, 2017 13:19

Past.am-ը գրում է

Իտալիայի նախկին վարչապետ Սիլվիո Բեռլուսկոնիի, Ռուսաստանի նախագահ Վլադիմիր Պուտինի և նման գործիչների գռեհկաբանությանը աշխարհը, կարծես, վաղուց է վարժվել: Բայց Պուտինի վերջին դիտարկման մեջ, որ վերաբերում էր Միացյալ Նահանգներում սկիզբ առած քաղաքական շիզոֆրենիային, այնուամենայնիվ, ինչ–որ ճշմարտություն կա:

Ոչ ոք այլևս չի հասկանում, թե ինչ են ուզում այդ երկրում: Թրամփի խնդիրները լուծեցին, Ռուսաստանի հետ հնարավոր կապերն ամբողջությամբ բացահայտեցին, հիմա էլ, պարզվում է, ըստ հանրապետական սենատոր Աննա Լիթըլի և այլոց՝ նախագահի էքս–թեկնածու Հիլարի Քլինթո՛նն է ռուսական գործակալ, որն ուզում է քանդել մեծ Ամերիկան:

Արդյունքում, ըստ Rasmussen Reports կենտրոնի վերջին սոցիոլոգիական հարցումների, հանրության մեծ մասը կամենում է, որ ներկայի նախագահ Դոնալդ Թրամփի հետ մեկտեղ, հատուկ դատախազը քննի նաև Քլինթոնի՝ Ռուսաստանի հետ ունեցած հնարավոր կապերը: Մարդիկ մտածում են, որ շատ հնարավոր է՝ Թրամփին հրապարակայնորեն պաշտպանելու՝ Կրեմլի դիրքորոշումը, իր բուն հովանավորին թաքցնելու ամենապրիմիտիվ, բայց կասկածներ չառաջացնող ճանապարհն է: Կարծում են, որ այն քաղաքական ըմբոստությունը, որի գլուխ է կանգնել Քլինթոնը, ոչ միայն իշխանությունը զավթելուն է ուղղված, այլև սեփական հիմնադրամը հարստացնելուն և Կրեմլի ազդեցությունն առավել մեծացնելուն:

Ամենուրեք, այսինքն, այնպիսի ֆանտաստիկ վարկածների հոսք է ու նույն մարդու հակասական մտքերի այնպիսի շփոթ, որ անփորձ դիտարկողն ուղղակի կխճճվի իսկապես էլ շիզոֆրենիա հիշեցնող այս իրավիճակում: Միակ հստակ բանն է, որ ամերիկյան հանրությունը հոգնել է այս իրավիճակից, և այլևս որևէ մեկին չի վստահում:

Այդ թվում՝ Քլինթոնին: Չափազանց մեծ աշխարհագրություն և մասնակիցների մեծ քանակ ներառող՝ վերոնշյալ սոցիոլոգիական հարցման համաձայն՝ եթե նույնիսկ Թրամփը չլիներ, միևնույն է, հանրության 60%–ը (իսկ մենք քիչ թե շատ վստահում ենք այս կենտրոնին, որովհետև այն քչերից էր, որ դեռ քարոզարշավի ժամանակ էր հակադրվելով բոլորին՝ խոսում Թրամփի հնարավոր հաղթանակի և հանրության իրական տրամադրությունների մասին), համարում է, որ նա ժամանակին չարաշահել է իր լիազորությունները և այժմ էլ, բազում անհայտ/կասկածելի մեկենասների ու հայտնի օդիոզ փողատերերի, երկրի թշնամիների շահերն է ուզում առաջ տանել:

Ներկայի նախագահի դեմ ծավալած արշավը այնքան է զարմացրել հանրությանը, որ դրա մոտ 37%–ը չի էլ փաստարկում, թե ինչու է Թրամփին չվստահելու փոխարեն հենց Քլինթոնի հանդեպ անվստահություն տածում: Rasmussen Reports–ը պնդում է, թե դեռ երբեք մարդկանց ուղեղում այսպիսի շփոթ չէր եղել, և երբեք հանրության 89%–ն իր նախկին պետքարտուղարի արտաքին քաղաքականությունը չի նույնացրել անձնական շահին: Ինչ վերաբերում է, իբր, Քլինթոնի դեմ տարված սև փիառին ու կեղտոտ տեխնոլոգիաներին, նույն հանրությունը, կարծես, նոր է ինչ–ինչ դրվագներ հիշում (օրինակ՝ Բրյուսելի ակտիվ հակաքարոզչությունը կամ՝ դեմոկրատների հանրային կապերով զբաղվող Ալեքսանդր Չալուպային, որին Քլինթոնն անձամբ էր գործուղել Կիև՝ Թրամփ–ՌԴ կապեր գտնելու և այնպիսի սև փիառ անելու Թրամփի շտաբի պետ Փոլ Մանաֆորտի, հանրապետականների դեմ, որ նրա անունը Yahoo պորտալը դրեց այն 16 մարդկանց կողքին, որոնք ամենաշատն են ազդել ընտրությունների ու հանրային կարծիքի վրա), փորձելով վերաիմաստավորել դրանք: Այնպես որ, ոչ ոք չգիտի, թե այս պատմությունն ինչով կավարտվի:

Ամերիկյան, իբր, առաջադեմ մեդիան առայժմ Թրամփի լուսանկարը Կրեմլի մերձակայքում գտնվող Վասիլի Երանելու տաճարին փարված է պատկերում, իսկ Թրամփը Օբամային ու Քլինթոնի հեղինակմանն է վերագրում այս հիստերիան, ինչպես նաև՝ համոզված պնդում, թե հատուկ դատախազի նշանակումը սարսափելի վնաս կհասցնի ԱՄՆ–ին՝ ցուցադրելով նրան որպես պառակտված և շփոթված երկիր: