Life.panorama.am-ը գրում է.
Ամերիկաբնակ երիտասարդ երգիչ Հրանտոն ժամեր առաջ ներկայացրել է իր՝ «Վերջին զանգ» երգի հիման վրա նկարահանված տեսահոլովակը, որի մանրամասների, ինչպես նաեւ ԱՄՆ-ում եւ Հայաստանում իրականացվող առաջիկա ծրագրերի մասին երգիչը պատմել է Life.panorama.am-ին:
«Ցանկություն ունեցա իմ երգացանկում ունենալ մի շատ լավ ու դրական երգ, որը թե ինձ, թե մյուսներին կհիշեցներ դպրոցական տարիները: Իհարկե, պատահական չէր այս տեսահոլովակի պրեմիերայի օրը՝ ընդամենը երեք օր անց հայկական դպրոցներում կհնչի վերջին զանգը, իսկ ինչպես բոլորս գիտենք, Հայաստանում այդ միջոցառումը շատ հետաքրքիր ու ջերմ է անցնում: Ապրելով երեք տարբեր երկրներում՝ պետք է ասեմ, որ Հայաստանի դպրոցներում տիրող ջերմությանը ոչինչ չի հասնի: Երգի հեղինակն է Մարինա Թագակչյանը: Երգում կա չարաճճիություն, առաջին սեր, ուսուցիչների եւ ընկերների նկատմամբ վերաբերմունք, այսինքն՝ այն ամենը, ինչ կա դպրոցում: Մարինային շատ եմ վստահում, քանի որ գիտեմ, որ բազում հիթային երգերի հեղինակ է, ի դեպ՝ սա մեր առաջին, բայց ոչ վերջին համատեղ աշխատանքն է: Մենք արդեն իսկ երեք երգի շուրջ ենք աշխատել, որոնք հերթով կներկայացնեմ հանդիսատեսի դատին: «Վերջին Զանգ» երգի գործիքավորումն իրականցրել է Վահան Նահապետյանը, նա ռեգեդոն ռիթմով կատարեց այս երգի գործիքավորումն, ինչը այժմ շատ մեծ տարածում ունի»,- նշեց Հրանտոն ու խոսեց տեսահոլովակի նկարահանումների մասին.
«Այս աշխատանքի համար վստահեցի ռեժիսոր Արմեն Փիրիմասիհիին, օպերատորը Ֆելիքս Շախտոյանն է: Ի դեպ՝ տեսահոլովակը նկարահանվել է Երեւանի թիվ 180 դպրոցում, քանի որ այստեղ ավարտական դասարանում է սովորում զարմիկս: Հավելեմ, որ մեր հերոսները իրական են: Հենց նրանց ու բոլոր շրջանավարտներին է նվիրված այս աշխատանքս»,- նշեց մեր զրուցակիցը:
Հրանտոն ծնվել է ԱՄՆ-ում, սակայն դեռ շատ փոքր տարիքում ծնողների հետ տեղափոխվել է Հայաստան, որից հետո կրկին տեղափոխվել են Ֆրանսիա, որտեղ էլ երիտասարդ երգիչն իրեն չի գտել ու որոշել է վերադառնալ ծննդավայր՝ ԱՄՆ:
«Երաժշտության նկատմամբ միշտ մեծ սեր եմ ունեցել, բայց սկսեցի լրջորեն այդ արվեստով զբաղվել վերջին տարիներին: Երաժշտական բարձրագույն կրություն չունեմ, բայց վոկալի, կիթառի եւ դաշնամուրի դասերի եմ հաճախել, հիմա էլ փորձում եմ անընդհատ կատարելագործել ունեցածս տվյալները: Այս պահին մեծ ծրագրեր ունեմ երաժշտական արվեստի հետ կապված, հուսամ՝ նպատակներս ըստ հերթականության կկատարվեն»,- պատմեց երգիչը:
23-ամյա Հրանտոն Հայաստան է վերադարձել հատուկ նպատակով: Մինչ տարեվերջ նա հանդիսատեսին կներկայացնի թվով յոթ տեսահոլովակ, որոնց մի մասը կնարահանվեն Հայաստանում, մյուս մասը՝ ԱՄՆ-ում եւ Մոսկվայում:
«Փետրվարին կայացավ առաջին տեսահոլովակիս պրեմիերան՝ «Ինձ ասա»-ն, որի հեղինակներն են Ավետ Բարսեղյանն ու Լիանա Թորոսյանը: Երկրորդ տեսահոլովակի պրեմիերան կայացավ այսօր, իսկ մինչ տարեվերջ դրանց թիվը կհասնի յոթի: Այս պահին շատ անելիքներ են ծրագրված, դրանց շարքում կան նաեւ զուգերգեր: Նախատեսված է շատ հետաքրքիր դուետ ամերիկաբնակ երգչուհի Շպռոտի հետ: Նա կգա Հայաստան, այնուհետեւ մենք կմեկնենք Մոսկվա եւ հենց այնտեղ ել կնկարահանենք մեր համատեղ տեսահոլովակը»,- հավելեց երգիչը:
Հրանտոն ԱՄՆ կմեկնի ամռան վերջին, մինչ այդ կնկարահանի եւս երեք տեսահոլովակ, երկուսն այստեղ, մեկը՝ Մոսկվայում:
