Լիլիթ Կարապետյանը՝ որդու հետ առաջին անգամ երգելու եւ «Հայ զինվոր» տեսահոլովակի մասին

Life.panorama.am-ը գրում է.

Երգչուհի Լիլիթ Կարապետյանը երկարատեւ ջանքերից հետո հանրությանն է հանձնել իր նոր՝ «Հայ զինվոր» տեսահոլովակը, որի հեղինակներն են Ավետ Բարսեղյանն ու Ռիչարդ Մադլենյանը: Այս տեսահոլովակը երգչուհու համար կրկնակի խորհրդանշական է, քանի որ որդին եւս նկարահանվել է ու երգել:

«Նախ պետք է ասեմ, որ այս տեսահոլովակին դեռ մեկ տարի առաջ էի սպասում, բայց չգիտեմ ինչու, անընդհատ խնդիրներ էին առաջանում, ամեն հարցում առաջին ու երկրորդ քայլերը միշտ անհաջողության էին գնում, եւ միայն 3-րդ անգամ փորձելուց էինք ցանկալի արդյունք ստանում: Նույնը կատարվեց նաեւ վերջին պահին, տեսահոլովակը հայտնվեց համացանցում, բայց մի քանի ժամ անց հասկացանք, որ որդուս ձայնը չկա, ուստի նորից ջնջվեց, հետո նոր կրկին հասանելի դարձավ յութուբյան իմ էջում: Ինչեւէ, գլխավորը այս աշխատանքս արդեն իրականություն է, քանի որ իսկապես երկար եմ սպասել»,- Life.panorama.am-ի հետ զրույցում պատմեց երգչուհին:

Խոսելով որդու մասնակցությունից՝ Լիլիթը նշեց.

«Կարծում եմ, յուրաքանչյուր մայր էլ, երբ որդի է ունենում, իրեն պատկերացնում է զինվորի մոր կարգավիճակում: Ես շատ էի ուզում, որ տղաս այս համազգեստով նկարահանվեր ինձ համար այս թանկ գործում: Ավելին, քանի որ Կարենս նաեւ լավ տվյալներ ունի, որոշեցի, որ նա նաեւ փոքրիկ հատված կերգի: Ի ուրախություն ինձ՝ նպատակներս իրականացան: Ի դեպ՝ ինքս շատ զարմացած էի, որ տղաս մեծ մարդու նման մասնակցեց նկարահանման ողջ ընթացքին, ավելին՝ ընթացքում իմ ոճափոխութան համար ես վերադարձա Երեւան, ու նա առանց ինձ մնաց նկարահանող խմբի հետ, եւ երբ ժամեր անց կրկին գնացի իր մոտ, արդեն վերջին կադրերն էր իր մասնակցությամբ նկարվում: Միայն այդ ժամանակ տղաս ասաց՝ «Մամ ջան, էս ինչ երկար տեւեց, ոնց որ տասը տարի այս շորերով լինեմ»: Այդ ժամանակ զավեշտալին այն էր, որ նկարահանման ընթացքին մասնակից բարձրաստիճան զինվորականներից մեկը ծիծաղելով ասաց, թե Կարեն ջան, ոչինչ, ես արդեն 25 տարի է, այս համազգեստով եմ: Այդ օրվա իմ երջանիկ պահերից մեկն էլ այնն էր, որ Կարենը ճանապարհին քնեց, ինչը մեր դեպքում երբեք չէր եղել»:

Լիլիթ Կարապետյանը հավանական համարեց, որ տղան իր ուղին կընտրի.

«Ինձ համար շատ զարմանալի էր, որ ձայնագրման ստուդիայում Կարենը կարողացավ երգել առաջին իսկ փորձից: Շատ լավ տվյալներ ու նաեւ երաժշտական ճաշակ ունի: Եթե շատ հայտնի ծնողներ դեմ կլինեն, որ իրենց երեխան ընտրի երգի ուղին, ապա ես պարզապես երջանիկ կլինեմ դրա համար: Ինքս ամեն ինչ կանեմ, որպեսզի իմ ունեցած դժվար ճանապարհներից նա հեռու լինի: Միաժամանակ, հաստատ չեմ ստիպի, որ այս ուղին ընտրի, փոխարենը՝ կհետեւեմ իր սրտի թելադրանքներին»,- նկատեց երգչուհի մայրիկը:

Անդրադառնալով տեսահոլովակի նկարահանման ընթացքին՝ Լիլիթ Կարապետյանը նշեց, որ հիացած է ռեժիսոր Վահե Հարությունյանի աշխատանքով.

«Անկեղծ ասած՝ առաջին անգամն էի համագործակցում Վահեի հետ եւ պետք է ասեմ, որ ես ուղղակի հիացած եմ: Մեծ պրոֆեսիոնալիզմի տեր մարդ է, ով սարսափելի աշխատասեր է: Նա հոգ էր տարել ամեն ինչի մասին, մեր ապահովության համար պայմանավորվել էր մի քանի զորամասերի հետ: Ստեղծել էր իրավիճակ, որի արդյունքում թե ես, թե մյուսներն իրենց շատ հարմարավետ էին զգում: Ուզում եմ հատուկ շնորհակալությունս հայտնել նրան եւ այս աշխատանքում իրենց լուման ներդրած յուրաքանչյուրին»,- հավելեց երգչուհին:

Ի դեպ՝ տեսահոլովակում նկարահանվել են իրական զինվորներ, ովքեր եւս մեծ պատրաստակամություն են հայտնել Լիլիթի հետ աշխատելու համար.

«Ես շատ էի ուզում, որ «Հայ զինվոր» տեսահոլովակում նկարահանվեին իսկական հայ զինվորները: Շատ շնորհակալ եմ Հոկտեմբերյանի եւ Փամբակի զորամասերին: Նրանք մեծ աջակցություն ցուցաբերեցին մեզ, քանի որ դրանց տարածքում էլ հենց իրականացան նկարահանումները: Դե իսկ մեր զինվորների մասին էլ խոսք չկա, նրանք պատրաստ մեր կողքին էին, որի համար կրկին շնորհակալ եմ»,- ընդգծեց նա:

Իսկ վերջում, անդրադառնալով տեսահոլովակում Լիլիթ Կարապետյանի երկու կերպարներին, երգչուհին պատմեց, որ հիմնական գաղափարը իրենն է, սակայն մեծ օգնություն են ցուցբերել նաեւ Արայիկ Գաբաջյանն ու Լիլիթ Մելիքյանը:

«Անկեղծ ասած, ընդհանուր առմամբ ինքս եմ որոշել, թե ինչ կերպարներով պետք է ներկայանամ, սակայն մանուշակագույն զգեստի հետեւամասի հետ կապված գաղափարը իմ լավ ընկեր Արայիկ Գաբաջանյանինն էր: Իսկ արդեն գլխազարդս հեղինակել էր Տերյան մշակութային կենտրոնի գործադիր տնօերն Լիլիթ Մելիքյանը: Նրանց եւս շատ շնորհակալ եմ, քանի նոր կերպարները շատ կարեւոր են տեսահոլովակներում»,- ավարտեց երգչուհին: