«Արմենպրես»-ն ամփոփում է անցնող շաբաթվա կարևորագույն իրադարձությունները

 Անցնող շաբաթը հագեցած էր բազմաթիվ հետաքրքիրհասարակական-քաղաքական իրադարձություններով, որոնք արձանագրվեցին ինչպես Հայաստանում, այնպես էլ աշխարհում:

Հայոց ցեղասպանության 100-րդ տարելից

Հայոց ցեղասպանության 100-րդ տարելիցի միջոցառումների շրջանակներում Ֆրանսիայի Մարսել քաղաքում կայացավ վազք-մարաթոն՝ «Վազել հանուն հիշողության» նշանաբանով: Թեթև ատլետիկայի եվրոպայի ռեկորդակիր Ռոբերտ Էմմիյանի հովանու ներքո կազմակերպված մրցույթին մասնակցեցին մարաթոնների Ֆրանսիայի բազմակի չեմպիոն  Էլոդի Նորմանդը, սամբոյի Եվրոպայի և Ֆրանսիայի  եռակի չեմպիոն Արայիկ Մարգարյանը, էքստրեմ-սպորտսմեն Արա Խաչատրյանը , «Վազել հանուն հիշողության» կազմակերպության և Մարսելի սպորտային մի շարք կազմակերպութունների ավելի քան 500 վազորդներ` մարզահագուստներին կրելով «ոչ ցեղասպանության ժխտողականությանը» ուղերձը:

Աթենքի հեղինակավոր «Մեղարո Մուսիկիս» համերգասրահում հոկտեմբերի 4-ին կայացավ Հայաստանի պետական կամերային երգչախմբի համերգը: Այն իրականացվեց Հայոց ցեղասպանության 100-րդ տարելիցի` Հունաստանի միջոցառումները համակարգող հանձնաժողովի հովանու ներքո` Հունաստանում ՀՀ դեսպանության և Աթենքի համերգասրահի կազմակերպմամբ ու ՀՀ մշակույթի նախարարության աջակցությամբ: Երգչախումբը հանդիսատեսին ներկայացրեց Կոմիտասի, Հալաջյանի, Շնիտկեի, Բարբերի ստեղծագործություններից, ինչպես նաև հայ կական ժողովրդական երգերի անզուգական կատարումներ` Ռոբերտ Մլքեյանի մշակմամբ:

Իսկ ահա Լեհաստանի Լյուբլին քաղաքի պետական թանգարանի մեծ սրահում հոկտեմբերի 2-ին կայացավ վաստակավոր կոլեկտիվ, պետական մրցանակի դափնեկիր Կոմիտասի անվան Ազգային լարային քառյակի համերգը` նվիրված Հայոց ցեղասպանության 100-րդ տարելիցին: Քառյակի կատարումներով հնչեցին Կոմիտասի, Արամ Խաչատրյանի, Էդվարդ Միրզոյանի, Մոցարտի, Չայկովսկու, Շումանի, լեհ կոմպոզիտորների ստեղծագործություններ, որոնք արժանացան հանդիսատեսի ջերմ ընդունելությանը:

Կանադայի Նյու Բրունսվիք նահանգի Մոնկտոն քաղաքում էլ կայացավ 6-րդ հայկական փառատոնը: Այն մեկնարկեց Հայոց ցեղասպանության 100-րդ տարելիցի ոգեկոչմամբ, որի շրջանակներում Կանադայում ՀՀ դեսպան Արմեն Եգանյանն ու Մոնկտոնի քաղաքապետ Ժորժ ԼեԲլանկը բացեցին Հայոց ցեղասպանության զոհերի հիշատակին նվիրված հուշակոթողը և տնկեցին իշատակի ծառը: Փառատոնի օրերին Մոնկտոնի համալսարանում կայացավ նաև միջազգային գիտաժողով` «Հայոց ցեղասպանությունը և մարդկության դեմ հանցագործությունները» խորագրով: 

Ֆրանկոֆոնիայի միջազգային կազմակերպության նախարարական համաժողովին մասնակցելու նպատակով Հայաստանում գտնվող Ֆրանսիայի եվրոպական հարցերի պետքարտուղար Հարլեմ Դեզիրը Հայոց ցեղասպանության զոհերի հիշատակը հավերժացնող Ծիծեռնակաբերդի հուշահամալիր այցելությունից եւ Հայոց ցեղասպանության թանգարան-ինստիտուտի ցուցանմուշներին ծանոթանալուց հետո  խոստովանեց, որ հոգին տակնուվրա է եղել, և լսած պատմություններից ինքը ցնցվել է: Անդրադառնալով Մերձավոր Արե ւելքում տեղի ունեցող իրադարձություններին` Դեզիրը նշեց. «Մարդկությունը չկարողացավ դասեր քաղել Հայոց ցեղասպանությունից, եւ այսօր տեղի է  ունենում այն, ինչ տեղի է ունենում: Հենց այս պատճառով հիշողությունը վառ պահելու աշխատանքը շատ կարեւոր է եւ համամարդկային հնչեղություն ու նշանակություն ունի: Պետք է շարունակել պայքարը բոլոր երկրներում` Հայոց ցեղասպանության ճանաչման ուղղությամբ, այդ թվում, անշուշտ, նաեւ Թուրքիայում: Թուրքիան պետք է առերեսվի իր հիշողության հետ, ճիշտ այնպես, ինչպես Գերմանիան: Սա շատ կարեւոր է հաշտեցման համար եւ հենց սա է ֆրանսիայի ուղերձի իմաստը: Մենք բոլոր երկրներում հնարավորության սահմաններում արտահայտվում ենք հայոց ցեղասպանության ճանաչման օգտին»:

ԼՂ հակամարտություն

Թեև անցնող շաբաթ հայ-ադրբեջանական սահմանին և ղարաբաղա-ադրբեջանական հակամարտ զորքերի շփման գծում իրավիճակը համեմատաբար հանգիստ էր, սակայն ադրբեջանական կողմը կրկին շարունակեց հրադադարի ռեժիմի խախտումները: Մասնավորապես, հանգստյան օրերին հակառակորդի կողմից հրադադարի պահպանման ռեժիմը խախտվեց ավելի քան 150 անգամ, որի ընթացքում տարբեր տրամաչափի հրաձգային զինատեսակներից, ինչպես նաև 60 (19 արկ), 82 (1 արկ) և 120 (1 արկ) մմ-ոց ականանետերից ու ՀԱՆ-17 (17 արկ) տիպի նռնականետի ց հայ դիրքապահների ուղղությամբ արձակվեց շուրջ 1500 կրակոց:

Անդրադառնալով սահմանում տիրող իրավիճակին` ՀՀ պաշտպանության նախարար Սեյրան Օհանյանը լրագրողների հետ զրույցում նշեց, որ իրավիճակը մեր զորքերի կողմից վերահսկվում է, և ժողովուրդը կարող է հանգիստ լինել, որ հայ զինվորն առաջին գծում կանգնած իր պարտականությունները կատարում է պատշաճ մակարդակով: Խոսելով դիվանագիտական ու ռազմական միջոցառումների մասին` Սեյրան Օհանյանը նշեց, որ դրանք կատարվում են համահունչ, փոխկապակցված ու իրար հետ համաձայնեցված: «Երկար տարիների այդ աշխատանքի շնորհիվ է, որ մենք թեկուզ հարաբերական, բայց խաղաղ պայմանները կարողանում ենք ապահովել»,-շեշտեց պաշտպանության նախարարը:

Լեռնային Ղարաբաղի հակամարտության թեմային անդրադարձավ նաև ՀՀ ԱԳ նախարարը: Երևանում ընթացող «Խաղաղապահական գործողությունների մարտահրավերների միջազգային ֆորում»-ի բացման ժամանակ իր ելույթում Էդվարդ Նալբանդյանը նշեց, որ ԼՂ հակամարտության կարգավորման ձևաչափը Մինսկի խմբի համանախագահությունն է, հետևաբար, բոլոր միջազգային ջանքերը` ուղղված այդ հակամարտության կարգավորմանը, պետք է իրականացվեն այս ձևաչափի շրջանակներում ու այդ մոտեցմանը համահունչ: 

ԱԳ նախարարը ԼՂ հակամարտության թեմային անդրադարձավ նաև Ազգային ժողովում կառավարութան հետ հարց ու պատասխանի ժամանակ: Նալբանդյանը շեշետց, որ ԵԱՀԿ Մինսկի խմբի համանախագահներն իրենց վերջին հայտարարություններում հրադադարի խախտումների ողջ պատասխանատվությունը դնում են Ադրբեջանի վրա: Նա նաև նկատեց, որ հոկտեմբերի 6-ին ԱՄՆ Կոնգրեսի արտաքին հարաբերությունների հանձնաժողովի անդամները նամակ են գրել ԵԱՀԿ ՄԽ ամերիկացի համանախագահ Ջեյմս Ուորլիքին՝ առաջարկելով հրադադարի ռեժիմի պահպանման ամրապնդանն ուղղված քայլեր ձեռնարկել: Նախարարի խոսքով՝ սա նշանակում է, որ հրադադարի խախտման դեպքերի հետաքննության մեխանիզմների ներդրման առաջարկն ստանում է ոչ միայն միջազգային կառույցների, այլ նաև տարբեր երկրների խորհրդարանների հավանությունը:

Ղարաբաղա-ադրբեջանական հակամարտ զորքերի շփման գծում հոկտեմբերի 6-ին և լույս 7-ի գիշերը հակառակորդը հրադադարի պահպանման ռեժիմը հիմնականում խախտեց հրաձգային զինատեսակներից` հայկական դիրքերի ուղղությամբ արձակելով շուրջ 1900, իսկ 60 մմ-ոց ականանետից` 3 կրակոց: Բացի հրադադարի ռեժիմի խախտման դեպքերից, առաջնային գծից մոտ 50 կմ խորության վրա այդ օրն արձանագրվեցին նաև հակառակորդի ռազմաօդային ուժերի ուսումնական թռիչքներ:

Ղարաբաղա-ադրբեջանական հակամարտ զորքերի շփման գծի հյուսիսարևելյան հատվածում (Թալիշի ուղղությամբ) հոկտեմբերի 10-ի գիշերը` ժամը 03.05-ի սահմանում, հակառակորդը ձեռնարկեց դիվերսիոն-հետախուզական ներթափանցման փորձ: Արցախի պաշտպանության բանակի դիրքապահ ուժերը ժամանակին հավաստանշելով ադրբեջանական դիվերսիոն խմբի առաջխաղացումը` դիմել են կանխարգելիչ գործողությունների և, վերջինիս հասցնելով կորուստներ, հետ շպրտել իր ելման դիրքերը: Այս դեպքի մասին «Արմենպրես& raquo;-ի հետ զրույցում ԼՂՀ ՊՆ մամուլի խոսնակ Սենոր Հասրաթյանն ընդգծեց, որ Արցախա-ադրբեջանական սահմանին իրավիճակը հանգիստ է եւ ԼՂՀ պաշտպանության բանակը հսկում է ողջ սահմանի անվտանգությունը: Նա նաեւ հերքեց ադրբեջանական լրատվամիջոցների տարածած հաղորդագրությունը, թե հայկական կողմը գիշերը տեղի ունեցած մարտերի ժամանակ կորուստներ է ունեցել: «Հայկական կողմը զոհեր չի տվել, սա Ադրբեջանի պաշտպանության նախարարության հերթական դիտավորյալ ապատեղեկատվությունն է: Ըստ նախնական տվյալների` ադրբեջանական կողմը կորուստներ է ունեցել: Իրենք այս պահին հայտարարում են մեկ վիրավորի մասին»,- հայտնեց Սենոր Հասրաթյանը:

Սահմանադրական բարեփոխումներ

Ազգային ժողովում հոկտեմբերի 5 մեկնարկեց խորհրդարանական հերթական քառօրյա նիստը, որում նախատեսված էր քվեարկության դնել սահմանադրական բարեփոխումների նախագիծը:

ԱԺ նախագահ Գալուստ Սահակյանն առաջարկեց քվեարկության դնել ՀՀ նախագահի համար ընդունելի առաջարկների հիման վրա փոփոխությունների ենթարկված սահմանադրական բարեփոխումների նախագիծը հանրաքվեի դնելու մասին Ազգային ժողովի  որոշման նախագիծը, սակայն, ՕԵԿ-ն առաջարկեց ընդմիջել նիստը, քանի որ կուսակցությունը նախագծի հետ կապված որոշ հարցերի քննարկման անհրաժեշտություն էր տեսնում: ԱԺ նախագահ Գալուստ Սահակյանը հայտարարեց 20 րոպե ընդմիջում:

Նիստում ԱԺ փոխնախագահ Էդուարդ Շարմազանովը ներկայացրեց Հայաստանում սահմանադրական բարեփոխումների վերաբերյալ Վենետիկի հանձնաժողովի նախագահ Ջիանի Բուքիքիոյի ողջույնի խոսքը, համաձայն որի, Վենետիկի հանձնաժողովի նախագահը դրական է գնահատում Հայաստանում սահմանադրական բարեփոխումների գործընթացը

Մինչ ընթանում էր ԱԺ-ի նիստը, խորհրդարանի շենքի դիմաց ակցիա էին անցկացնում մի խումբ քաղաքացիներ: Ակցիայի մասնակիցները փորձում էին «Ոչ» գրությամբ պաստառը փակցնել Ազգային ժողովի ցանկապատի վրա, ինչը փորձել է արգելել ոստիկանությունը: Արդյունքում ոստիկանության և ակցիայի մասնակիցների միջև հրմշտոց սկսվեց: Այս ամենի հետևանքով ոստիկանությունը բերման է ենթարկեց սահմանադրական բարեփոխումների դեմ արտահայտվող քաղաքացիական նախաձեռնության ակցիայի 21 մասնակիցների:

Քննարկումների արդյունքում Ազգային ժողովը քվեարկությամբ ընդունեց սահմանադրական բարեփոխումների նախագիծը հանրաքվեի դնելու մասին Ազգային ժողովի որոշումը: Սահմանադրական բարեփոխումների նախագիծը հանրաքվեի դնելու որոշմանը կողմ քվեարկեց 104, դեմ՝ 10, ձեռնպահ՝ 3 պատգամավոր:

Սահմանադրական բարեփոխումների գործընթացի հետագա քայլերին անդրադարձ կատարվեց ՀՀ Նախագահ Սերժ Սարգսյանի և «Ժողովրդավարություն՝ իրավունքի միջոցով» եվրոպական հանձնաժողովի (Վենետիկի հանձնաժողով) նախագահ Ջիանի Բուքիքիոյի միջև կայացած հանդիպման ժամանակ: Սերժ Սարգսյանը շնորհակալություն հայտնեց Վենետիկի հանձնաժողովի այն անդամներին, ովքեր ՀՀ Սահմանադրության փոփոխությունների նախագծի մշակման գործընթացում համագործակցել և բարձրորակ մասնագիտական օժանդակություն են ցուցաբերել ՀՀ Նախագահին առընթեր սահմանադրական բարեփոխումների մասնագիտական հանձնաժողովին:

ՀՀ Նախագահ Սերժ Սարգսյանը հոկտեմբերի 8-ին հրամանագիր ստորագրեց Հայաստանի Հանրապետության Սահմանադրության փոփոխությունների հանրաքվեն 2015 թվականի դեկտեմբերի 6-ին նշանակելու մասին:

ՀՀ Կենտրոնական ընտրական հանձնաժողովն արտահերթ նիստոում հաստատեց 2015 թվականի դեկտեմբերի 6-ին ՀՀ սահմանադրական փոփոխությունների հնարաքվեի կազմակերպման և անցկացման հիմնական միջոցառումների ժամանակացույցը, համաձայն որի համաժողովրդական քննարկումներ կազմակերպելու և հանրային իրազեկումների նպատակով հանրաքվեի դրվող սահմանադրության նախագիծը պետք է հրապարակվի մինչև 2015 թվականի հոկտեմբեր 17-ը: Հանրաքվեի քարոզչության ժամանահատվածն սկսվում է 2015թ. հոկտեմբերի 10-ից և ավարտվում 2015 թվակ անի դեկտեմբերի 4-ին:

Ֆրանկոֆոնիայի միջազգային կազմակերպության արտգործնախարարների համաժողով 

Երևանում հոկտեմբերի 10-ին մեկնարկեց Ֆրանկոֆոնիայի միջազգային կազմակերպության արտգործնախարարների համաժողովի 31-րդ նստաշրջանը, որի բացման արարողությանը մասնակցեց և ներկաներին ողջունեց ՀՀ նախագահը: Սերժ Սարգսյանն իր ելույթում ընդգծեց Ցեղասպանության 100-րդ տարելիցին ֆրանկոֆոն ընտանիքի զորակցությունը հայ ժողովրդին: «Օգտվելով առիթից՝ ցանկանում եմ ընդգծել Հայոց ցեղասպանության 100-րդ տարելիցի ոգեկոչման համատեքստում ֆրանկոֆոն ընտանի քի համերաշխությունն ու զորակցությունը հայ ժողովրդին՝ արտահայտված կազմակերպության գլխավոր քարտուղարի հայտարարության միջոցով: Մեր խորին համոզումն է, որ միայն բոլորիս ջանքերի համախմբման միջոցով է հնարավոր կանխարգելել նման ոճրագործությունները և անցյալից դասեր քաղելով՝ պահպանել և հարգել համամարդկային, այդ թվում՝ Ֆրանկոֆոնիայի համընդհանուր արժեքները: Հանդուրժողականության, խաղաղ գոյատևման և ժողովրդավարության սկզբունքների վրա հիմնված հասարակության կառուցումը մեր բոլորի նպատակն է»,-նշեց նախագահը:

Համաժողովի շրջանակներում ելույթով հանդես եկավ նաև ՀՀ ԱԳ նախարարը: Էդվարդ Նալբանդյանը նշեց, որ Հայաստանը, հյուրընկալելով Ֆրանկոֆոնիայի միջազգային կազմակերպության նախարարական համաժողովը, արտահայտվում է իր խորը նվիրվածությունը ֆրանկոֆոնիային եւ այն արժեքներին, որոնք տարածում է կազմակերպությունը: «Վերահաստստում եմ Հայաստանի հանձնառությունը` ի նպաստ Ֆրանկոֆոնիայի, նրա արժեքներին եւ առաքելությանը: Ֆրանկոֆոնիայի եւ ՀՀ խորհրդարանի միջեւ կապերն ամրապնդվել են խորհրդարանական ձեւաչափով, ամրապնդել ենք մեր հարաբերությունները ֆրանկոֆոն պետությունների հետ: Այս համաժողովի կազմակերպումը կարեւոր փուլ կդառնա, որ ամրապնդվի համագործակցությունը»,- ասաց նախարար Նալբանդյանը:

Համաժողովի ժամանակ Ֆրանկոֆոնիայի միջազգային կազմակերպության գլխավոր քարտուղար Միկայել Ժանը շեշտեց, որՀայաստանը հանդիսանում է խորհրդանիշ, որտեղ հիշողությունը պահպանվում է, կրած տառապանքի կնիքը չի վերանում: Ըստ Միկայել Ժանի, միաժամանակ Հայաստանը նաեւ հույսի խորհրդանիշ է, որ կարողացել է վերածնվել ինքն իր համար եւ աշխարհի առջեւ: «Հայաստանն ունի մշտապես առաջ գնալու հատկություն»,- ընդգծեց Ժանը: Խոսելով Ֆրանկոֆոնիայի ծրագրերի մասին` Միկայել Ժանը շեշտեց, որ կազմակերպությունը պետք է նպաստի նոր ճանապարհների բացմանը, նոր լուծումներ գտնելուն, ինչը դյուրին չէ, եւ դիմագրավում է  բազմաթիվ մարտահրավերների: 

ՖՄԿ-ի անդամակցությունից երեք տարի անց Հայաստանի կողմից նախարարական համաժողովի հյուրընկալումը Սենեգալի ԱԳ նախարար Մանքյուր Նդայեն կարեւոր հանգամանք դիտարկեց այն առնչությամբ, որ Հայաստանը ոչ միայն արտահայտում է իր նվիրվածությունը, այլեւ պատրաստակամությունը` աջակցելու Ֆրանկոֆոնիային: 

 

Ֆրանկոֆոնիայի միջազգային կազմակերպության արտգործնախարարների համաժողովի կապակցությամբ Երևան ժամանած ֆրանսահայ լեգենդար երգիչ Շառլ Ազնավուրը Կարեն Դեմիրճյանի անվան մարզահամերգային համալիրում հանդես եկավ բացառիկ համերգով: Նախքան համերգը նա պատասխանեց «Արմենպրես»-ի հարցերին` ընդգծելով, որ Հայաստան գալիս միշտ իրեն երջանիկ է զգում: Ազնավուրն իր յուրաքանչյուր երգում հոգի է ներդնում ու կարծես ապրում է սեփական երգերով: Աշխարհահռչակ երգիչն այս փաստը հետևյալ կերպ բացատրեց. «Ես և իմ աշխատանքը ձուլվում ենք: Երբեք չեմ դադարում աշխատել. միգուցե արվեստագետի գաղտնիքը դրանում է»:

Սիրիական ճգնաժամ

Իրավիճակը շարունակում է խիստ լարված մնալ Սիրիայում: Սիրիայից «Իսլամական պետություն», «Ջեբհաթ ան Նուսրա» եւ «Ջեյշ ալ Յարմուկ» խմբավորումների երեք հազարից ավելի զինյալներ փախան Հորդանան՝ երկյուղելով սիրիական բանակի ծավալուն հարձակումից: «Իսլամական պետություն» խմբավորման զինյալները Պալմիրայում ոչնչացրին հնագույն Հաղթանակի կամարը: Հուշարձանի ոչնչացման փաստը հաստատեց Սիրիայի հնություններ ի ու թանգարանների դեպարտամենտի տնօրեն Մաամուն Աբդուլքարիմը: ԻՊ-ի ահաբեկիչները հնագույն քաղաքը գրավել են այս տարվա օգոստոսին եւ շարունակաբար ոչնչացնում են այնտեղ գտնվող հնությունները:

Սիրիայի նախագահ Բաշար Ասադը Khabar TV իրանական հեռուստաալիքին տված հարցազրույցում հայտարարեց, որ չէր դանդաղի պաշտոնաթողության հարցում, եթե դա կարողանար լուծել երկրում տիրող ճգնաժամը, բայց, որոշումը պետք է ընդունի Սիրիայի ժողովուրդը: 

Ռուսական օդուժը հոկտեմբերի 4-ի ընթացքում Սիրիայում ուղղորդված հարվածներ հասցրեց ԻՊ-ի ինն օբյեկտների: «Բոլոր հարվածները նպատակամղված են եղել ահաբեկիչների կառավարման կազմալուծմանը եւ նյութատեխնիկական ապահովման համակարգի խախտմանը»,-Մոսկվայում լրագրողներին պատմել էր Ռուսաստանի պաշտպանության նախարարության պաշտոնական ներկայացուցիչ գեներալ-մայոր Իգոր Կոնաշենկովը:

Պենտագոնի ղեկավար Էշթոն Քարթերը հայտարարեց, որ ԱՄՆ-ը եւ իր դաշնակիցները Ռուսաստանին դիմակայելու անհրաժեշտ քայլեր կձեռնարկեն Սիրիայում նրա գործողության կապակցությամբ: «Ռուսաստանի գործողությունները հանգեցրել են Սիրիայում պատերազմի էսկալացման: Մենք կոչ ենք անում Ռուսաստանին գործել անվտանգ: Մենք պատրաստ ենք Ռուսաստանի հետ հետագա համագործակցության»,- Մադրիդում ունեցած ելույթի ժամանակ նշել էր նա:

Թուրքիայի արտաքին գործերի նախարարությունը հոկտեմբերի 5-ին Ռուսաստանին ուղղված կոշտ հայտարարություն տարածեց՝կապված հոկտեմբերի 3-ին Սիրիայում ռազմական գործողություններ իրականացնող ռուսական ինքնաթիռի՝ թուրքական օդային տարածքը խախտելու հետ: Թուրքիայի ԱԳՆ հայտարարության մեջ նշվում էր, որ ռուսական ինքնաթիռը խախտել է սահմանը Հաթայի շրջանում և միայն թուրքական F-16 ռազմական ինքնաթիռների միջամտությամբ անցել է Սիրիա:

Այնուհետև Ռուսաստանի ՊՆ-ն հստակեցրեց, թե ինչու է կործանիչը խախտել Թուրքիայի օդային սահմանը. «Ռուսական Су-30 կործանիչը, որը Սիրիայում մասնակցում է «Իսլամական պետության» դեմ գործողություններին, Թուրքիայի օդային տարածքը խախտել է սխալմամբ` ոչ բարվոք եղանակային պայմանների պատճառով»,-նշված էր Ռուսաստանի պաշտպանության նախարարության տարածած հաղորդագրության մեջ:

Այս միջադեպից հետո Անկարայում Ռուսաստանի դեսպանը կանչվել էր նախարարություն, որտեղ թուրքական կողմը նրան հայտնել էր իր կտրուկ բողոքը և պահանջել այսուհետև նման դեպք թույլ չտալ: Տեղի ունեցածից հետո Ռուսաստանի վերաբերյալ կոշտ հայտարարություններով հանդես եկավ Թուրքիայի նախագահը: «Տեսեք, թե ինչ է անում Ռուսաստանը. խախտել են մեր սահմանը, իրենց համար ռազմաբազա հիմնելու խնդրով են տարված: Արվում են քայլեր, որոնք մեզ համար անցանկալի են: Թուրքիային սազական չի դրանք ընդունելը, դրանք դեմ են նաև ՆԱՏՕ-ի սկզբունքներին»,- ասեÕ ¬ էր Էրդողանը: Նա նաև սպառնաց` Թուրքիան Ռուսաստանի օդային ուժերի ինքնաթիռներին թույլ չի տա եւս մեկ անգամ խախտել իր օդային տարածքը: «Մեջտեղում Ռուսաստանի հետ մեր հարաբերություններն են: Եթե Ռուսաստանը կորցնի ընկերոջը, շատ բան կկորցնի»:

Թուրքիայի օդային տարածքում տեղի ունեցած միջադեպի առնչությամբ հայտարարությամբ հանդես եկավ նաև ՆԱՏՕ-ն: Վերջինիս պահվածքը քննադատության արժանացավ ՌԴ-ի կողմից: ՆԱՏՕ-ում Ռուսաստանի մշտական ներկայացուցիչ Ալեքսանդր Գրուշկոն նշեց, որ  Արևմուտքն օգտագործում է ռուսական ռազմական ինքնաթիռների կողմից Թուրքիայի օդային սահմանը խախտելու միջադեպը Ռուսաստանի դեմ քարոզչական պայքարին ՆԱՏՕ-ին խառնելու համար:  «Տպավորությունն այնպիսինն է, որ Թուրքիայի օդային տարածքում տեղի ունեցած միջադեպը օգտագործվել է ՆԱՏՕ-ին էլ արևմտյան տեղեկատվական քարոզչության մեջ ներառելու համար, ինչի նպատակը Սիրիայում Ռուսաստանի ուժայինների կողմից իրականացող գործողության նպատակները խեղաթյուրելն ու նենգափոխելն է»,- նշել էր Գրուշկոն:

Միջադեպից մի քանի օր անց ՌԴ-ի պաշտպանության նախարարի տեղակալ Անատոլի Անտոնովը հայտարարեց, որ Ռուսաստանի եւ ԱՄՆ-ի ռազմական գերատեսչությունները փաստաթուղթ են պատրաստում, որը կսահմանի Սիրիայում ԻՊ-ի ուժերին հարվածներ հասցնող օդուժի փոխգործակցության կարգը:

Մի շարք արտասահամանյան ԶԼՄ-ներ, հղում տալով Սիրիայում անանուն ռազմական աղբյուրին, հայտնեցին, որ Ռուսաստանի Դաշնությունը օդային հարվածներ է հասցրել ԻՊ-ի ահաբեկչական խմբավորման կողմից գրավված Պալմիրայի ուղղությամբ: Այս տեղեկությունները ՌԴ-ն անմիջապես հերքեց: «Դրանք միանգամայն սուտ լուրեր են: Մեր ռազմաօդային ուժերը չեն ռմբակոծում քաղաքների բնակելի տարածքներն ու այնտեղ տեղակայված ճարտարապետական հուշարձանները: Հուշարձանների ոչնչացման գործուներությունը իրականցնում եվ ԻՊ-ի ահաբեկիչները, որոնք, ըստ լուրերի, պայթեցրել են հայտնի «Հաղթանակի կամար»-ը»,- նշել էր ՌԴ պաշտպանության նախարարության պաշտոնական ներկայացուցիչ, գեներալ-մայոր Իգոր Կոնաշենկովը:

ՆԱՏՕ-ի գլխավոր քարտուղար Ենս Ստոլտենբերգը հայտարարեց, որ դաշինքը ողջունում է ՌԴ-ի եւ ԱՄՆ-ի ռազմական կոնսուլտացիաները Սիրիայի շուրջ: «ԱՄՆ-ի պաշտպանության նախարարն այսօր մեզ տեղեկացրեց ՌԴ-ի հետ անցկացվող կոնսուլտացիաների մասին, որոնք նպատակամղված են Սիրիայում օդային գործողություններին մասնակցող օդաչուների անվտանգության ապահովմանը»,-ասել էր նա: