Սերգեյ Ղահրամանյան. «Մեր երկրում կողմնորոշված հասարակություն չկա, կա ժողովուրդ, որ պետք է դառնա քաղաքացի, հետո արդեն՝ հասարակություն...»

Past.am-ի հյուրն է «Ելք» դաշինքից Երևանի ավագանու անդամ, ՏՏ ոլորտում աշխատող, ֆիզիկական նախագծող Սերգեյ Ղահրամանյանը:

 

– «Ելք» դաշինքի Երևանի ավագանու կազմում մեծամասամբ երիտասարդներ են: Ի՞նչ եք կարծում այս աշխատանքն իրենից որոշակի փորձառություն և բազմաթիվ բնագավառներից տեղյակ լինելու պահանջներ չի՞ ներկայացնում:

 

– «Ելք» դաշինքից Երևանի ավագանու կազմում ընդգրկվել են 14 հոգի, որոնց մեջ ճնշող մեծամասնությունը երիտասարդներ են, 25–30 տարեկան: Այո, փորձառության պակաս կա, բայց փոխարենը ունենք մեծ եռանդ և ավյուն դրական փոփոխություններ բերել քաղաքապետարանում և քաղաքապետարանի գործունեության մեջ: Գումարելով դրան, որ մենք ապրում ենք 21–րդ դարում, կյանքի և տեխնոլոգիաների արագ զարգացող տեմպերին և մարտահրավերներին համընթաց պետք է զարգանալ, իսկ ավագանու կազմից շատերը հենց տեղեկատվական տեխնոլոգիաների ոլորտից են, որոնց համար ինֆորմացիան և ժամանակը ամենաթանկն է և իրենք կարողանում են տիրապետել անհրաժեշտ ինֆորմացիային սեղմ ժամկետներում: փորձառության առումով նաև մեր թիմում է Անահիտ Բախշանը, ով մշտապես իր խորհուրդներով ճիշտ ուղղություն է տալիս:

 

– Ըստ ձեզ այն ծրագրերը, որ «Ելք»–ը բարձրաձայնում էր նախընտրական շրջանում, ավագանու մյուս երկու խմբակցությունների հետ հնարավո՞ր կլինի կյանքի կոչել:

 

– Կարծում եմ՝ ծրագրի որոշ դրույթներ, որոնք չեն վնասի մի քանիսի շահին հնարավոր կլինի իրագործել, իսկ որոնք օդի ու ջրի պես անհրաժեշտ են Երևան քաղաքին և երևանցիներին, բնականաբար չեն իրականացվի: Դրանցից է հատկապես տրանսպորտի ոլորտը, որը թերևս այսպես էլ կմնա, միայն թղթի վրա գրված–տրանսպորտ: Այն ինչ ունենք, միայն ավերակներ են, չունենք քաղաքի ջրահեռացման նորմալ և աշխատող համակարգ: Ամեն մի անձրևից հետո գետնանցում մտնելն անհնարին է, չունենք ասֆալտապատ փողոցներ, չունենք գիշերային լուսավորություն:

 

– «Ելք»–ը բացահայտեց ՀՀԿ–ի կողմից կաշառք տալու մի ամբողջ սխեմա: Ինչպե՞ս եք պատրաստվում աշխատել մի ուժի հետ, ով ամեն ընտրություններին որպես գլխավոր գործիք դա է օգտագործում:

 

– Ինչպես ասում են՝ ռոմանտիկներ չենք: Բնականաբար հեշտ չի լինելու: Այո ՀՀԿ–ի շատ մութ գործեր բացահայտվեցին և դեռ էլի կբացահայտվեն: Ամեն դեպքում դրանով թող զբաղվեն իրավապահները, քանի որ դա իրենց պարտականություններն են: Իսկ մենք մեր գործը կանենք և բոլոր հնարավոր մեթոդներով կաշխատենք ի շահ երևանցու, մի կողմ թողնելով մեր անձնական ամբիցիաները:

 

– Ըստ Ձեզ կաշառք բաժանող քաղաքական ուժի ներկայացուցչի՝ մայրաքաղաքի ղեկավար լինելու հանգամանքը նվաստացուցիչ չէ՞ երևանաբնակների համար:

 

– Ցավալի հարց է: Այո, կաշառքը բաժանվել է, վարչական ռեսուրսներն օգտագործվել, քաղաքացիները՝ վերցրել կաշառքը: Մարդիկ իրենց կամքով ընտրել են քաղաքապետի, որից պատերի տակ են բողոքում։ Բողոքում են, որ ավտոմեքենան ջարդվում է քանդված ասֆալտի վրա, բողոքում են կարմիր գծերից, բայց այդ նույն բողոքողը ընտրեց նույն բողոքը ստեղծող պատճառին:

 

Կոպիտ համեմատություն պետք է անեմ՝ երբ մարդուն ոչնչացնում են, իսկ նա դեռ սիրում է իրեն ոչնչացնողին։ Հասարակությունը պետք է կրթվի: Ավելի ճիշտ, մեր երկրում դեռ կողմնորոշված հասարակություն չկա, կա ժողովուրդ, պետք է դառնան քաղաքացի, իսկ հետո արդեն հասարակություն, ընդ որում թելադրող և կողմնորոշված, այլ ոչ թե առանց սեփական կարծիքի ժողովուրդ, երբ փողով կարծիք են ստեղծում, դա կարծիք չի, դա պարտադրանք է: Յուրաքանչյուրը պետք է ինքն իր մեջ հասկանա, որ նման գործելաոճով քաղաքապետարան ունենալը նվաստացուցի՞չ է, թե ոչ: Մեկի համար կաշառք տալը/վերցնելը նվաստացուցիչ է, մեկի համար՝ պարծանքի թեմա: Մարդիկ տարբեր են, բայց «Ելքի» ավագանիները միանշանակ ամեն ինչ կանեն երևանցիների համար, ամեն ինչ կանեն ազատ քաղաքացիների թիվը մեծացնելու համար հանուն Հայաստանի և Երևանի:

 

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ

Կիսվել