Քաթարյան ճգնաժամը նեղն է գցել նաև ՀԱՄԱՍԻՆ

INTERNATIONAL NEWS 9 June, 2017 20:06

Պաղեստինի Իսլամական դիմադրության Շարժումը՝ ՀԱՄԱՍԸ, ցնցված է Սաուդյան Արաբիայի և Արաբական Միացյալ Էմիրությունների հայտարարություններից, որոնցով նրանք, ճիշտ Իսրայելի նմանությամբ, նրան ահաբեկչական կազմակերպություն են ճանաչել՝ Քաթարից, ի թիվս այլ ակնկալիքների, պահանջելով դադարեցնել խմբավորման ֆինանսավորումը: Երեկ բանը հասավ նրան, որ ԱՄԷ–ի ԱԳ նախարար Անուար Կարկաշը, ֆրանսիական ալիքներից մեկին տված հարցազրույցում, Իսլամական դիմադրությանը լուրջ պրոբլեմ որակեց ողջ արաբական աշխարհի ու տարածաշրջանի համար (դրան արդեն նախորդել էր Սաուդյան Արաբիայի ԱԳ նախարար Ադել ալ–Ջուբեյրի ելույթը, որով նա ՀԱՄԱՍ–ին մեղադրել էր հնարավոր ու անհնար բոլոր մեղքերում՝ արժանանալով վերջինիս քննադատական տարափին): Կրակին յուղ լցրեց նաև Լիբիան, որը չնայած չի միացել Քաթարի դեմ պատժամիջոցներին, սակայն, բանակի մամլո խոսնակի շուրթերով երեկ հայտարարեց, թե հենց այդ երկիրն է ֆինանսավորում Լիբիայում ՀԱՄԱՍԻ ճյուղի՝ Իզադդինա ալ–Քասամի բրիգադի, և Մահմեդական եղբայրների գործած ահաբեկչությունները:

Ի պատասխան ասվածին՝ ՀԱՄԱՍ–ը արաբական երկրներին մեղադրեց փարիսեցիության մեջ և պաղեստինցի եղբայրների համար կոկորդիլոսի արցունքներ թափելում՝ անմիջապես տարածած հայտարարության մեջ նշելով, թե ՀԱՄԱՍ–ը այն քչերից է, որն ի տարբերություն իրեն ահաբեկչական կազմակերպություն ճանաչող արաբական երկրների՝ պաղեստինյան հարցը ոչ թե սոսկ վիճելի կամ բանակցության ենթակա խնդիր, այլ սիոնիստական օկուպացիայի դեմ տարվող պայքար է դիտարկում: «Եվ այժմ, այս հայտարարություններից հետո, կասկած անգամ չունենք, որ թշնամին դրանք որպես պաղեստինցի ժողովրդի դեմ գործած և դեռ գործելիք նոր հանցանքների արդարացում կդարձնի՝ գործելով մեր հողերի, սրբությունների, իրավունքների, Երուսաղեմի և Սրբ. Ալ–Աքսայի դեմ»,–հայտարարեց ՀԱՄԱՍ–ը: Նրա քաղխորհրդի ներկայացուցիչ Ահմադ Յուսուֆն էլ ավելի հեռուն գնաց՝ ելույթի մեջ նշելով, թե դեռ կպարզվի՝ իրականում Քաթարին ինչում են մեղադրում, սակայն այս պահին իսկ ակնհայտ է, որ այդ երկիրը զոհ է գնացել ամերիկա–սաուդա–հրեական կոալիցիային՝ Սալման թագավորի ու Դոնալդ Թրամփի սուսերով պարի ներքո կազմված: ՀԱՄԱՍՆ–ն, այսպիսով, հայտարարում է, թե վայր չի դնի զենքը, չի հուսահատվի արտաքին ճնշումներից և ծավալվող դավադրություններից, պաղեստինցի ժողովրդի հետ մեկտեղ, անպայման հաղթող դուրս կգա:

Բնականաբար, այս ամենին մեծ ուշադրությամբ են հետևում Իսրայելում, որտեղ քչերն են անհամաձայն Մաարիվ թերթի վերջին հոդվածներից մեկի տրամաբանությանը, ըստ որի՝ քաթարյան ճգնաժամը ձեռնտու է Իսրայելին առնվազն հինգ պատճառով: Նախ՝ սունիական երկրների խզումը Քաթարից միանշանակ թուլացնում է ՀԱՄԱՍ–ին, ինչը նշանակում է, որ այժմ արաբները Իսրայելի փոխարեն կսկսեն սև գործ անել: Երկրորդ՝ այդկերպ կամրապնդվի տարածաշրջանում ամերիկյան ներկայությունը և հակաիրանական առանցքը, երրորդ՝ ավելի ապահով կդառնա իսրայելա–եգիպտական սահմանը, և Սիսին առավել արդյունավետ պայքար կծավալի Մահմեդական եղբայրների դեմ Սինայում, չորրորդ՝ նեղը կընկնի նաև լիբանանյան Հըզբոլլահը, և հինգերորդ՝ ճգնաժամը կամրապնդի Նեթանյահուի կառավարությանն իր գործողություններում, որն այժմ միջազգային հարթակներում առավել բարձր ձայնով կխոսի ՀԱՄԱՍ–ի ահաբեկչական խմբավորում լինելու մասին:

Եվ միայն իսրայելական ձախերը, այդ թվում՝ Հաարեցն է մտահոգություն հայտնում, թե քաթարյան ճգնաժամի արդյունքում Իսրայելն առնվազն մտահոգվելու, ոչ թե ուրախանալու առիթ ունի: Նախ՝ վերջին շրջանում Իրանից տարածություն պահպանած ՀԱՄԱՍ–ը նորից կփարվի Իրանին (բերվում է հատուկ ծառայության այն տեղեկությունը, թե օրերս Իրանի, Հըզբոլլահի ու ՀԱՄԱՍ–ի ներկայացուցիչները հանդիպել էին Լիբանանում, ինչին Փաստն անդրադարձել էր), ինչն արդեն իսկ վտանգավոր է: Երկրորդ՝ ՀԱՄԱՍ–ին մեկուսացնելուց հետո Իսրայելն առավել կմեծացնի ահաբեկչությունների վտանգը և կկորցնի երրորդ կողմի, ասենք՝ սաուդիների միջոցով դրա ղեկավարության հետ բանակցելու կամ նրա վրա ճնշում գործադրելու լծակները, հարցը միայն ՑԱԽԱԼ–ին թողնելով:

Ուղիղն ասած՝ մեզ նույնպես այս երկրորդ տեսակետն է առավել ճշմարտացի թվում, սակայն, չի բացառվում նաև, որ հիշյալ ճնշումներից հետո ՀԱՄԱՍ–ը նոր երկխոսություն սկսի ՖԱԹՀ–ի ու Ինքնավարության փաստացի ղեկավար Մահմուդ Աբասի հետ, միավորվելով այդ կուսակցությանը: Դա, իհարկե, այս պահին անհավատալի է թվում, բայց՝ ոչ անհնարին: Եվ կստացվի, որ քաթարյան ճգնաժամը նախ և առաջ, կմիավորի հենց պաղեստինցիներին: