Ի՞նչ են պատմում վախերը ձեր մասին

Մեզնից յուրաքանչյուրն իր վախերն ունի։ Cluber.com.ua-ը գրում է, որ ֆոբիաները հաճախ արձագանք են կյանքի այս կամ այն իրավիճակին։ Հոգեբանները պատմել են, թե ինչի մասին են վկայում մեր վախերը։

Վախ մթությունից՝ նիկտոֆոբիա։ Ուրախ եք, լավատես, դասվում եք վառ երևակայություն ունեցող անձանց շարքին։ Ստեղծագործ եք, բազմաշնորհ։ Հնարավոր է՝ հենց այդ պատճառով է ձեզ այդքան դուր գալիս ուշադրության կենտրոնում լինելը։ Մթության մեջ ոչինչ տեսանելի չէ, այդ պատճառով էլ ձեր ուղեղը սկսում է սարսափներ «նկարել»։ Երևակայությունը ճիշտ ուղու վրա դրեք՝ գրականություն, նկարչություն և այլն։

Վախ հանրային ելույթից՝ լոգոֆոբիա։ Մի փոքր փակ մարդ եք, ով հանգիստ և միայնություն է սիրում։ Հաճախ եք խորասուզվում սեփական մտքերի մեջ և ամենից բարձր գնահատում եք իսկական ընկերությունը։ Հարկավոր չէ փակվել ինքներդ ձեր մեջ և մտածել վատ բաների մասին։ Բոլորն էլ սխալներ են թույլ տալիս։

Վախ օձից՝ օֆիդիոֆոբիա։ Ձեզ վստահությամբ կարելի է լավ ընկեր համարել։ Երբեք միայնակ չեք թողնի դժվար իրավիճակներում և պատրաստ եք ցանկացած իրավիճակում օգնության ձեռք մեկնել։ Ձեր վախը գենետիկորեն ունեն գրեթե բոլոր, այն հարկավոր է ապրելու համար։ Այդ պատճառով էլ դրանից ազատվելու համար սթափ գնահատեք իրավիճակը։ Իրականում կա՞ն վախենալու պատճառներ։

Վախ արյունից՝ հեմոֆոբիա։ Ուշադիր եք ձեր արտաքինի և առողջության նկատմամբ։ Միշտ ուշադրություն եք դարձնում ճիշտ սննդին, սպորտին և ֆիզիկական աշխատանքին, ինքնազարգացմանը։ Հնարավոր է՝ մանուկ հասակում լուրջ վնասվածք եք ստացել, ինչը հանգեցրել է ֆոբիայի առաջացմանը։ Դրանից ազատվելու համար հարկավոր է զարգացնել ուժը, նպատակասլացությունն ու դատողությունը։

Վախ սարդերից՝ արախնոֆոբիա։ Այս վախը հատուկ է լիդերներին, ովքեր կարող են մոտիվացնել մարդկանց, նրանց տանել իրենց ետևից։ Հաջողակ եք։ Ընտանիքում վերջին խոսքը ձերն է։ Դա, իհարկե, վատ չէ, բայց վախը հաղթահարելու համար հարկավոր է «հանել թագը» և մյուսներին ձայնի իրավունք տալ։ Բավական է ամեն ինչ ինքներդ անեք։ Սովորեք թուլանալ։

Վախ կեղտից ու միկրոբներից՝ միզոֆոբիա։ Հանգիստ և կարգապահ եք։ Միակ բանը, որ կարող է ստիպել նյարդայնանալ, անկարգությունն է։ Անփոխարինելի աշխատակից եք, քանի որ կարողանում եք ուշադրություն դարձնել մանրուքներին։ Ձեզ հարգում են, իսկ աշխատակիցները երբեմն նախանձով են լցվում ձեր հաջողությունների նկատմամբ։ Շատ զգացմունքային եք և բռնկուն։ Այդ պատճառով հարկավոր է շուրջը հանգստության ու բարության մթնոլորտ ստեղծել։ Մի մոռացեք ղեկավարել սեփական զգացմունքները։

Վախ՝ ծաղրածուներից՝ կոուլրոֆոբիա։ Չափազանց կտրուկ եք, ով չի վախենում ճշմարտությունն ասել՝ նայելով մարդու աչքերին։ Երբեմն ամաչում եք սեփական բառերից։ Ամեն դեպքում մտերիմներից նմանատիպ պարզություն և անկեղծություն եք սպասում։ Հարկավոր է մտածել՝ արդյոք ճի՞շտ է բոլորին մատնացույց անել նրանց սխալներն ու թերությունները։ Միգուցե հարկավոր է դուրս գալ դատավորի դերից։

Վախ բարձրությունից՝ ակրոֆոբիա։ Բարդ մարդ եք. սա կարելի է ասել վստահությամբ։ Բաց եք նոր ծանոթությունների համար և սիրում եք հարստացնել կենսափորձը, բայց անհայտ ամեն բան վախեցնում է ձեզ։ Դա է պատճառը, որ միանման իրավիճակներում կարող եք ձեզ տարբեր կերպ դրսևորել։ Բարձրությունից շատերն են վախենում, սակայն կարելի է գլուխ հանել դրանից։ Աշխատեք սառնասիրտ լինել։ Երբ տրամաբանությունը գերակայի զգացմունքներին, վախը կանհետանա։

Վախ ամբոխից՝ դեմոֆոբիա։ Չեք սիրում, երբ խախտում են անձնական տարածության սահմանները։ Ձեզ հարմար է ցանկացած վայրում, միայն թե մարդիկ, որքան հնարավոր է՝ քիչ լինեն։ Չեք սիրում կոնֆլիկտի մեջ մտնել և խորհուրդներ լսել։ Սովոր եք բոլոր որոշումներն ինքնուրույն կայացնել։ Սեփական վախը հաղթահարելու համար հարկավոր է սովորել վստահել մյուսներին։ Պարտադիր չէ բոլորին. գոնե ամենաարժանիներին։ Բացեք հոգին զրուցակցի առաջ և փորձեք ընդհանրություններ և ոչ թե՝ տարբերություններ գտնել։

Վախ միայնությունից՝ մոնոֆոբիա։ Ողջ հոգով սիրում եք երեկույթներ, շփում և մեծ շրջապատ։ Ազատ ժամանակն ուրախ անցկացնելու հնարավորությունը ոչ մի դեպքում բաց չեք թողնի։ Ուշադրության կենտրոնում գտնվելը ձեզ համար պարզապես անհրաժեշտություն է։ Եթե կողքին չկա սիրելի մարդ, սկսում եք կարծել, որ ձեզ հետ ինչ-որ բան այն չէ։ Սովորեք առաջին հերթին՝ ինքներդ ձեզ ուշադություն դարձնել։ Հոբբի գտեք, սկսեք ճանաչել ձեր ներաշխարհը։ Աշխատանքն ինքներդ ձեզ վրա կարող է հրաշալի բուժում լինել։