Թրամփն ընկալելի չէ նաև հանրապետականների՞ համար

INTERNATIONAL NEWS 13 June, 2017 18:02

ԱՄՆ դեմոկրատականները մտադիր են օրինական ճանապարհով նախագահ Թրամփին զերծ պահել Ռուսաստանի դեմ պատժամիջոցները մեղմելու հավանական մտադրությունից և նոր պատժամիջոցներ կիրառել այդ երկրի դեմ` ԱՄՆ–ի նախագահական ընտրություններին միջամտելու մեղադրանքով:

Պարզվում է, սակայն, հանրապետականների մեջ էլ կան մարդիկ, որ կողմ են դեմոկրատների դիրքորոշմանը: Սենատոր Լինդսի Գրեմն, օրինակ, CBS TV–ին տված հարցազրույցում հայտարարեց, թե ՌԴ–ի հանդեպ նոր պատժամիջոցներն արդարացված են, և եթե նախագահ Թրամփը վետո դնի օրինագծի վրա՝ կդավաճանի ամերիկյան ժողովրդավարությանը: Նա իհարկե, նաև հերքեց դեմոկրատների՝ Թրամփ–Կրեմլ կապերի առնչությամբ մեղադրանքները, բայց միաժամանակ կենտրոնացավ ամերիկյան ընտրությունների վրա ռուսական ներազդման մտադրության, դա ապացուցող բազում փաստերի և այն մասին, որ ռուսները ջանում են ողջ աշխարհում խարխլել դեմոկրատիան: Հարցին, թե ինչո՞ւ է Թրամփն այդ դեպքում ծանր տանում ընթացող հետաքննությունը, փաստարկվեց, թե ոմանք թացը չորի հետ են խառնում և, շահարկելով ռուսական միջամտության հանգամանքը, նախագահին ակնարկում են, որ նա ընտրություններում հաղթել է անազնիվ ճանապարհով, ինչը որևէ աղերս չունի ճշմարտության հետ:

Այնպես որ ԱՄՆ–ը կպատժի Ռուսաստանին՝ հայտարարել է սենատորը, այսպիսով մեղադրելով և՛ այն հանրապետականներին, որոնք, չհավատալով ռուսական ներազդմանը, առաջարկում են դադարեցնել հետաքննությունը, և՛ դեմոկրատներին, որոնք լինչականության ուղին են բռնել՝ խոսելով իմպիչմենթի մասին: «Հետաքննությունն իսպառ դադարեցնելու և Մոսկվայի հետ հարաբերությունները պոզիտիվորեն վերաբեռնելու մասին խոսող հանրապետականները նույնքան ճշմարիտ են, որքան լինչականների ամբոխը, որին նախագահ Թրամփն էլ իր հերթին կերակրում իր թվիթներով: Պարոն նախագահ, դու՛ք եք ձեր ամենադաժան թշնամին, դադարեցրե՛ք դա»,– ուղիղ եթերից հայտարարել է հանրապետական սենատորը՝ բացատրելով, որ շարքերում քիչ չեն այդկերպ մտածող մարդիկ:

Ստացվում է՝ Թրամփն այժմ նաև հանրապետականներին ընկալելի լինելու խնդիր ունի, որոնք սկսել են հաճախ տարվել տարվել երբեմն ծիծաղ առաջացնող մեղադրանքներով ու ՀԴԲ էքս–ղեկավար Ջեմյս Կոմիի նմանությամբ՝ միանգամից երկու աթոռի վրա նստելու պահվածքով: Դա քիչ է, այժմ էլ Մերիլենդ նահանգի և Կոլումբիայի շրջանի գլխավոր դատախազներ Կառլ Ռասինն ու Բրայան Ֆրոշն են նոր գլխացավանք հնարել՝ Թրամփին կասկածելով Սահմանադրության հակակոռուպցիոն հոդվածների խախտման մեջ և «օտարերկրյա կառավարություններից միլիոններ ստանալում»:

Վերջիններս երկու դատական հայց են ներկայացրել Թրամփի դեմ՝ առաջինում կենտրոնանալով փաստի վրա, որ նախագահ դառնալուց հետո նախագահը որոշել է պահպանել իր սեփականության իրավունքը՝ անձնական բիզնեսում հաշվետու պահելով կառավարիչներին, իսկ երկրորդ դեպքում՝ վաշինգտոնյան Trump International Hotel–ի վրա, որտեղ ի սկզբանե այլ տեղում նախատեսված՝ Քուվեյթի դեսպանատան կազմակերպած մեծ միջոցառումն էր տեղի ունեցել: Փաստորեն, չնայած նախընտրական շրջանի սուր քննադատությանը, դատախազներն այժմ էլ կասկածի են ենթարկել Թրամփի մերձավորարևելյան, մասնավորապես՝ սաուդիների հետ շփումները, որոնք նույնպես մեծ թվով համարներ էին պատվիրել հենց Թրամփի հյուրանոցում, ինչը կարող է նոր և շատ մեծ քաղաքական խնդիր դառնալ՝ հաշվի առնելով Թրամփի վերջին այցն ու դրան հետևած մերձավորարևելյան իրադարձությունները:

Գոհար Սիմոնյան