Նախարարի տեղակալի ավիատոմսը արժեցել է 1600 դոլար, գործուղումը՝ 2200. «Փաստ»

SOCIETY 14 June, 2017 10:30

«Փաստ» օրաթերթը գրում է.

2016 թ. ընթացքում Էներգետիկ ենթակառուցվածքների և բնական պաշարների նախարարությունը արտասահմանյան 56 գործուղում է ունեցել: Նշվածից մեծ մասը՝ 30 գործուղում, ֆինանսավորել է հրավիրող կողմը: Մնացած 26 գործուղման ընդհանուր ծախսը կազմել է 19 միլիոն 32 հազար 841 դրամ, որից ավիատոմսերի գնման համար ծախսվել է 7 միլիոն 620 հազար 781 դրամ, իսկ օրենսդրությամբ սահմանված այլ վճարումները կազմել են 11 միլիոն 412 հազար դրամ:

Նախարարության աշխատակիցներն իրենց 2016 թ. ընթացքում կատարած գործուղումների արդյունքում այցելել են աշխարհի 24 երկիր և 26 քաղաք: Քաղաքների աշխարհագրությունը բավական խայտաբղետ է: Էներգետիկայի նախարարության աշխատակիցները որտեղ ասես, որ չեն եղել՝ Աբու Դաբիից մինչև Նյու Յորք ու Թաիլանդից մինչև Մանիլա (Ֆիլիպիններ):

Նախարարությունից բավական շատ գործուղումներ են ունեցել նախարարի տեղակալ Հայկ Հարությունյանը և արտաքին կապերի վարչության պետ Տիգրան Մելքոնյանը՝ համապատասխանաբար 11 և 12 գործուղում:

Պետական բյուջեից վճարված գործուղումներից որպես ամենաթանկը առանձնանում է նախարարի տեղակալ Հայկ Հարությունյանի դեպի ԱՄՆ գործուղումը, որի ընդհանուր ծախսը կազմել է 1 միլիոն 601 հազար 840 դրամ: Ավիատոմս գնելու համար ծախսվել է 391 հազար 558 դրամ, իսկ օրենսդրությամբ սահմանված վճարումները կազմել են 1 միլիոն 210 հազար 282 դրամ: Վերջինս մեկնել էր Նյու Յորք որպես պատվիրակության անդամ և այնտեղ էր գտնվել հոկտեմբերի 6–13–ը:

Ըստ թանկության հաջորդը դեպի Իրան միջկառավարական համատեղ հանձնաժողովի 14–րդ նիստին մասնակցելու նպատակով նախարարության չորս աշխատակցի՝ Աշոտ Մանուկյանի, Հայկ Խաչատրյանի, Արա Սիմոնյանի և Տիգրան Մելքոնյանի գործուղումն է, որը կազմել է 1 միլիոն 599 հազար 397 դրամ: Սրանից ավիատոմսերի ձեռքբերման համար ուղղվել է 657 հազար 963 դրամ, իսկ մնացած 941 հազար 434 դրամը օրենսդրությամբ նախատեսված այլ վճարումներն են:

1 միլիոն 357 հազար 982 դրամ է կազմել նախկին նախարար Լևոն Յոլյանի, նրա տեղակալ Արեգ Գալստյանի և բաժնի պետ Արտեմ Պետրոսյանի դեպի Վիեննա գործուղումը: Վերջինների ավիատոմսերի գնման համար պետբյուջեից հատկացվել է ընդհանուր 454 հազար 328 դրամ, իսկ մնացած 628 հազար 290 դրամն էլ նախատեսվել է գիշերակացի և սննդի համար: Նրանք գործուղվել էին մասնակցելու Վիեննայում կայացած եռօրյա Ատոմային էներգիայի միջազգային գործակալության գլխավոր կոնֆերանսին:

Գրեթե նույնքան գումար է ծախսվել ապրիլի 11–13–ն ընկած ժամանակահատվածում դեպի Վիեննա միայն նախարարի տեղակալ Հայկ Հարությունյանի գործուղման համար, այն է՝ 1 միլիոն 93 հազար 544 դրամ կամ 2 հազար 200 ԱՄն դոլար: Վերջինիս ավիատոմսը արժեցել է 798 հազար դրամ, իսկ 295 հազար 544 դրամն էլ հատկացվել է օրենսդրությամբ սահմանված այլ վճարումների համար: Ստացվում է, որ մի դեպքում 3 պաշտոնյայի գործուղումը նույն քաղաք կազմում է 1 միլիոն 357 հազար դրամ, իսկ մեկ ուրիշ դեպքում միայն մեկինը՝ 1 միլիոն 93 հազար դրամ:

Հայկ Հարությունյանի մեկ այլ՝ դեպի Աբու–Դաբի գործուղման ծախսերը կազմել են 831 հազար 686 դրամ, որից ավիատոմսը՝ 390 հազար դրամ է արժեցել:

1 միլիոն դրամից ավելի գումար է վճարվել նաև նախարարի մեկ այլ տեղակալի՝ Լևոն Գալստյանի դեպի Փարիզ գործուղման նպատակով, ավելի ստույգ՝ 1 միլիոն 96 հազար 848 դրամ, որից ավիատոմսի և մնացած ծախսերի համար նախատեսվել է համապատասխանաբար՝ 582 հազար և 514 հազար 848 դրամ: Գալստյանը մայիսի 9–12–ը գտնվել է Փարիզում «Միջուկային էներգետիկայի ֆինանսներ» խորագրով համաժողովին մասնակցելու նպատակով:

Նախարարի տեղակալ Լևոն Շահվերդյանի դեպի Բաղդադ քառօրյա գործուղումն էլ արժեցել է 950 հազար դրամ, որից ավիատոմսը գնվել է 400 հազար դրամով, իսկ 550 հազար դրամն էլ ծախսվել է կեցության և սննդի համար:

Շարունակությունը` «Փաստ» օրաթերթի այսօրվա համարում