ԱՄՆ–ն սրում է իրավիճակը Սիրիայի հարավում

INTERNATIONAL NEWS 16 June, 2017 20:01

Երեկ ուշ երեկոյան արաբական Al Masdar գործակալությունը թեժ լուրերի շարքում էր զետեղել սիրիական հարավում ընթացող իրադարձությունները: Հաղորդվում էր, թե պաշտոնական բանակը նոր ուժեր է կենտրոնացրել Պալմիրայի մերձակայքում գտնվող Աս–Սուխնայի և ռազմավարական կարևորություն ունեցող Արաք դաշտավայրի շրջանում, որպեսզի վճռորոշ գրոհ ձեռնարկի ԴԱԻՇ–ի ներկայի ֆորպոստի՝ Դեյր ալ–Զորի ուղղությամբ:

Սիրիական աղբյուրները հաստատեցին այս տեղեկությունը՝ հաղորդելով, որ Հոմսի հյուսիսում՝ Թալբիս քաղաքի մերձակայքում, կառավարական ուժերն արդեն իսկ լուրջ գրոհ են ձեռնարկել իսլամիստների դեմ, վերջիններիս մեծ կորուստներ պատճառելով: Նույն պահին Al Masdar–ը հավելեց, որ ընդհարում է տեղի ունեցել նաև արևմտյան կոալիցիայի կողմից օժանդակվող Սիրիայի ազատ բանակի և կառավարական ու պրոասադյան ուժերի միջև (հավանաբար, լիբանանյան Հըզբոլլահին ու իրանական կամավորականներին նկատի ունեն՝ պրոասադյան ուժեր ասելով, որովհետև թեժ լուրերի շարքում նշվում էր, թե ԱՄՆ F–15E ինքնաթիռը Աթ–Թանֆի իր բազայի երկնքում խորտակել է իրանական БПЛА Shahed 129 անօդաչուն), ինչից հետո միջազգային լրատվամիջոցները, մասնավորապես՝ Ռոյթըրզը հաղորդեց, թե ԱՄՆ–ն մտադիր է պատժել Դամասկոսին՝ ընդլայնելով իր ռազմական ներկայությունը Սիրիայում և Հորդանանից HIMARS ռեակտիվ համակարգը տեղափոխելով Աթ–Թանֆի իր սահմանային ռազմաբազա:

Ռուսաստանում, հավանաբար, այդ պահին ավելի շատ նախագահ Վլ. Պուտինի ուղիղ կապի վրա էին կենտրոնացած, այդ պատճառով էլ բոլորը հապաղեցին արձագանքում: Բայց քիչ անց այստեղ էլ խոր անհանգստություն դրսևորվեց փաստի առնչությամբ, մեջտեղ եկան նաև գնահատականներ, ըստ որոնց՝ ամերիկյան արտադրության բարձր շարժունակությամբ համազարկային կրակի ռեակտիվ համակարգի՝ HIMARS–ի (High Mobility Artillery Rocket System), տեղակայումն անխուսափելիորեն նոր բախում կհրահրի Սիրիայի հարավում:

Այդ մտահոգությունն ավելի սրվեց, երբ դարձյալ Ռոյթըրզը, վկայակոչելով Սիրիայի ազատ բանակի բրիգադի հրամանատարներից մեկին, բացատրեց, թե ինչ ասել է ամերիկյան ներկայության ընդլայնում Սիրիայի հարավում: Պարզվում է՝ ճիշտ Սիրիայի կառավարական ուժերի քթի տակ՝ Էզ–Զաքֆայում, ԱՄՆ–ն որոշել է երկրորդ ռազմաբազան հիմնել՝ հընթացս նաև Սիրիայի ընդդիմադիրների ազատ բանակին հավելյալ զինելով: Եվ չնայած Կոալիցիայի հակաահաբեկչական օպերացիաների շտաբի ներկայացուցիչ Ռայան Դիլլոնը չէր հաստատել փաստը՝ Ռոյթըրզին հայտնելով, որ Աթ–Թանֆը շարունակում է միակ ռազմաբազան լինել, որտեղ ԱՄՆ–ն վարժեցնում է իր դաշնակիցներին, գործակալությունը դրան հավատ չի ընծայել, որովհետև գեներալը մինչ այդ էլ HIMARS–ի տեղակայումն էր հերքել, ինչը քիչ անց անմիջապես Պենտագոնից հաստատվեց:

Գալով դարձյալ HIMARS–ին՝ հարկ է նշել, որ մինչ այս ԱՄՆ–ն այս համակարգերը երբեք անմիջականորեն Սիրիայում չէր գործածել: Դրանք մշտապես ԴԱԻՇ–ի դեմ գործի են դրվել Հորդանանում և Թուրքիայում՝ M777 Հաուբիցների հետ միասին, և այժմ, երբ Ասադը հաջողություն է գրանցում հարավը վերահսկելու գործում՝ շարժվելով Դեյր–ալ–Զոր, ամերիկյան այս որոշումն իսկապես այլ բան չես կոչի, քան՝ սադրանք և ընդհուպ՝ Դամասկոսին ուղղված սպառնալիք:

Կատակ բան չէ՝ համակարգի մարտական մեքենան 290 ձիաուժ հզորություն և 85 կմ/ժ արագություն ունի, ինչը նշանակում է, որ ընդամենը հաշված րոպեների ընթացքում ԱՄՆ կարող է հարվածներ տեղալ մինչև իսկ Ասադի նստավայրի ուղղությամբ: Ու թե սրան ինչպես կպատասխանեն Ասադն ու նրա դաշնակիցները, դեռ վաղ է ասել:

Փաստ է միայն այն, որ պաշտոնական բանակի ռազմական պատվիրակությունը ճիշտ ժամանակին հայտնվեց Բաղդադում, որտեղ սահմանային անվտանգության համատեղ ապահովման ուղղված բանակցություններ վարեց Իրաքի զինված ուժերի ներկայացուցիչների հետ: Իրաքյան աղբյուրների վկայակոչմամբ՝ որոշում է կայացվել «համատեղ գործողությունների կենտրոն ստեղծել` սահմանամերձ շրջաններում ահաբեկչական խմբավորումների վրա ճնշման ուժեղացման նպատակով», ինչն, իհարկե, կարևոր հանգամանք է Սիրիայի բանակի թիկունքը հարավում ապահովելու տեսանկյունից:

Գոհար Սիմոնյան