Բնապահպանության նախարարությունը մշակում է «Գեղի» ՓՀԷԿ–1–ի կառուցման համար ջրօգտագործման թույլտվության նախագիծ

SOCIETY 17 June, 2017 16:52

ՀՀ բնապահպանության նախարարության աշխատակազմի ջրային ռեսուրսների կառավարման գործակալության կողմից ՀՀ ջրային օրենսգրքի և ՀՀ կառավարության որոշումների պահանջների համաձայն՝ մշակվում է «Զանգեզուրի պղնձամոլիբդենային կոմբինատ» ՓԲԸ–ի՝ Սյունիքի մարզի Գեղի համայնքի վարչական տարածքում Ողջի գետի Գեղի վտակի վրա՝ Գեղի ջրամբարով «Գեղի» ՓՀԷԿ–1–ի կառուցման նպատակով ջրօգտագործման թույլտվության նախագիծը:

Բնապահպանության նախարարությունից տեղեկացնում են, որ բոլոր շահագրգիռ անձինք, ովքեր կցանկանան ծանոթանալ փաստաթղթի մշակման աշխատանքներին և փաստաթղթի նախագծի նախնական տարբերակին, կարող են աշխատանքային օրերին ժամը 17–ից–18–ը դիմել ջրային ռեսուրսների կառավարման և պահպանության մարմին:

Ծանուցմամբ ներկայացրած փաստաթղթի նախագծի նախնական տարբերակի վերաբերյալ դիտողություններ և առաջարկություններ ներկայացնելու դեպքում փաստաթղթի քննարկումը տեղի կունենա մյուս շաբաթ՝ հունիսի 20–ին ժամը 16:00–ին, Կառավարական 3–րդ տուն, 5–րդ հարկ, 541 սենյակ հասցեով:

Գեղի գետը հոսում է Սյունիքի մարզում: Սկիզբ է առնում Զանգեզուրի լեռների կենտրոնական մասի արևելյան լանջերից և ձախից միախառնվում Ողջի գետին: Երկարությունը 30 կմ է:

Հիշեցնենք, որ դեռևս 2013 թ. հունվարի 1–ի դրությամբ ՀՀ հանրային ծառայությունները կարգավորող հանձնաժողովի կողմից տրված կառուցման լիցենզիաների համաձայն՝ Գեղի գետի վրա տրված են եղել ևս երկու ՓՀԷԿ–երի կառուցման համար լիցենզիաներ: Առաջինը «Գեղի–1» ՓՀԷԿ–ը, որը շահագործող ընկերությունն է «ՏԱՍՄԱՆ» ՍՊԸ–ն: Երկրորդը՝ «Գեղի–2» ՓՀԷԿ–ն է, որը շահագործում է «ԷՐԵՄԻՐԷՆԵՐԺԻ» ՍՊԸ–ն: ՓՀԷԿ–որի գործունեության արդյունքում Գեղի գետը ՓՀԷԿ–երի խողովակների մեջ է վերցնում 9140 մետր գումարային տարածք, ինչը կազմում է գետի 30–46%–ը։ Իսկ «ԷկոԼուր» բնապահպանական լրատվական հարթակի «Էկոլոգիական ռիսկերի գնահատման մոդել»–ի համաձայն՝ դա հանգեցնելու էր գետի ճգնաժամային վիճակի։ Նշենք, որ «Գեղի–2» ՓՀԷԿ–ը շահագործման էր հանձնվել դեռևս 2013թ–ին: Պարզ է դառնում, որ երկրորդ ՓՀէկ–ի կառուցումը սարերի հետևում չէ:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ