Ավստրալիան ժամանակավորապես հեռու կմնա Սիրիայից

INTERNATIONAL NEWS 21 June, 2017 14:02

Երեկ արդեն տեղեկացրել էինք, որ այն բանից հետո, երբ ԱՄՆ հրամանատարության ներքո գործող միջազգային կոալիցիայի ռազմական ինքնաթիռներն անցած կիրակի կործանեցին սիրիական բանակին պատկանող ռազմական ինքնաթիռը, որը Սիրիայի Ռաքքայի հարավում հակաահաբեկչական գործողություն էր իրականացնում, Ռուսաստանը փոխեց Սիրիայի երկնքում կրակ բացելու կարգը և հայտարարեց, որ կոալիցիայի բոլոր թռչող օբյեկտներն այսուհետ որպես ռազմական թիրախ է դիտարկելու: Ընթերցողին տեղեկացրել էինք նաև այն մասին, որ ռուսական կողմը չեղարկել է Թռիչքների ապահովման և միջադեպերի կանխման վերաբերյալ՝ ԱՄՆ–ի հետ կնքած մեմորանդումը, ինչն անհանգստության մեծ առիթ էր դարձել ողջ աշխարհի, միջազգային կառույցների և հատկապես կոալիցիայի անդամ–երկրների համար:

Բնական էր, ուրեմն, որ երբ Ավստրալիայի իշխանությունները երեկ հայտարարեցին, թե Ռուսաստանի հայտարարությունից հետո Սիրիայում ժամանակավորապես դադարեցնում են բոլոր տեսակի օդային գործողությունները կոալիցիայի շրջանակներում, փաստը չափազանց մտահոգեց ԱՄՆ–ին թե՛ կոալիցիայի ապագայի, թե՛ Ռուսաստանի հետ հետագա հարաբերությունների տեսանկյունից:

Ի վերջո, Ավստրալիան այն դաշնակիցներից էր, որն անմիջապես համաձայնեց 6 կործանիչներով, վառելիքով ապահովող 1 ինքնաթիռով ու 1 ռադիոնավիգացիոն սարքերով զինված ինքնաթիռով մասնակցել կոալիցիայի գործողություններին: Ճիշտ է՝ մեկ տարի առաջ այդ երկիրը չանսաց ԱՄՆ հորդորին՝ ավելացնել իր ռազմական ներկայությունը Սիրիայում, սակայն, նախկին ուժերով շարունակեց հավատարմորեն կատարել իր ստանձնած պարտավորությունները, որոնց չեղարկումն այժմ կարող է վարակիչ լինել նաև մյուսների համար:

Նահանգներում, ուրեմն, շտապեցին շտկել իրավիճակը: Այստեղ նորից ու նորից բացատրեցին, թե իրենք ոչ թե սադրել են Ռուսաստանին, այլ ընդամենն օգտվել են Սիրիայում իրենց զորքերի ինքնապաշտպանության իրավունքից: «Բնականաբար, մենք կանենք հնարավորը, որպեսզի պաշտպանենք մեր իրավունքները»,– Սպիտակ տանը կայացած բրիֆինգում հայտարարել է մամլո խոսնակ Շոն Սփայսերը: Ինչ վերաբերում է Պենտագոնին՝ դրա բացատրության մեջ փոփոխություն է նկատվել. այստեղ չնայած շարունակել են պնդել, որ Սիրիայի կառավարական ուժերը ոչ թե ԴԱԻՇ–ի, այլ ԱՄՆ դաշնակիցների ուղղությամբ է ռումբեր նետել, սակայն, միաժամանակ խոստովանել են, որ ռումբերը ոչ թե քրդերի, ինչպես վաղօրոք էր ասվում, այլ զինված ընդդիմության գրոհայինների ուղղությամբ են նետվել: Մյուս կողմից էլ մամուլում արտահոսք է հայտնվել առ այն, որ ԱՄՆ պետքարտուղար Ռեքս Թիլերսոնը ՌԴ–ի հետ կառուցողական հարաբերությունների ստեղծման նոր ծրագիր է մշակել, որով, իբր, Սպիտակ տունը կփորձի Կրեմլի հետ համաձայնության գալ ոչ միայն Սիրիայի, այլև Փհենյանի, Թեհրանի, միջուկային, կիբերանվտանգության և այլ հարցերի շուրջ: Միաժամանակ, նախատեսվում է Մոսկվային համոզել, որպեսզի զերծ մնալ ԱՄՆ–ի նկատմամբ ագրեսիվ գործողություններից։ Հակառակ դեպքում Վաշինգտոնը խոստանում է համարժեք պատասխան Կրեմլի ագրեսիային։

Կհամաձայնի՞ Մոսկվան Վաշինգտոնի առաջարկին՝ դժվար է ասել: Բայց հարկ է նշել, որ ինքնաթիռի կործանումից անմիջապես հետո Սիրիայի հարավում ծանր զինտեխնիկայի 7–րդ բեռնաթափման փաստը հաստատ բանակցություններ սկսելու և լավ արդյունք ակնկալելու ամենաուղիղ ճանապարհը չէ...

Գոհար Սիմոնյան