Եվրոպային այժմ էլ Czexit է սպառնում

INTERNATIONAL NEWS 21 June, 2017 18:03

Օրեր առաջ Past.am-ը տեղեկացրել էր իր ընթերցողին այն մասին, որ Եվրահանձնաժողովն իրավական գործընթաց է սկսել ԵՄ երեք անդամների՝ Չեխիայի, Հունգարիայի և Լեհաստանի դեմ, որոնք, տարին սկսելուց ի վեր, փաստացի հրաժարվել են ներգաղթյալներ ընդունել Բրյուսելի կողմից հաստատված կանոնների ու քվոտաների համաձայն: Գրել էինք նաև, որ Բրյուսելն արդեն իսկ ծանուցումներ էր ուղարկել Վարշավա, Բուդապեշտ և Պրահա՝ պաշտոնապես տեղեկացնելով, որ Վիշեգրադյան խմբի երեք երկրներն էլ այժմ ստիպված են լինելու կանգնել ԵՄ ներքին կանոնադրությունը խախտելու հարցով հետաքննության, այնուհետ նաև՝ խստորեն պատժվելու և 10 մլն դոլար տուգանք վճարելու փաստի առջև:

Այսպիսով, ճիշտ ժամանակն է տեղեկացնել, որ հատկապես Պրահան ամբողջ այս ընթացքում այնքան ակտիվորեն է ընդդիմացել Բրյուսելին, որ եվրապաշտոնյաների շրջանում, Brexit–ին զուգահեռ, այլևս Czexit տերմինն է շրջանառվում: Ընդ որում՝ բավական հիմնավոր կերպով, որովհետև Չեխիայում մեծ հռչակ վայելող Վացլավ Կլաուսը, որ նախագահեց երկիրը 2000–2013 թթ. ընթացքում, այս անգամ էլ չվախեցավ ասպարեզ մտնել և արտահայտելով հանրային տրամադրությունները՝ հայտարարել, թե «վրա է հասել Եվրամիությունից դուրս գալու ժամանակը, ինչը Չեխիայի միակ ճիշտ ընտրությունը կլինի»:

Իհարկե, Բրյուսելում հույս ունեն, թե 75–ամյա փորձառու գործիչը, որ հայտնի է իր եվրոսկեպտիցիզմով, հանրային իրական տրամադրությունների արտահայտողը չէ, և կառավարությունն էլ կվարանի անցնել այն նույն փշոտ ճանապարհով, որով այժմ Լոնդոնն է ընթանում՝ արդեն իսկ մեկնարկած բանակցությունների ֆոնին: Սակայն, քիչ չեն նրանք, որոնք կարծում են, թե եվրոպական երեցներից մեկի շուրթերով ճշմարտությունն է խոսում ոչ միայն Չեխիայի, այլ ընդհանրապես եվրոպական ինտեգրացիայի ապագայի վերաբերյալ: «Եվրոպայի քաղաքական էլիտան ավելի շահագրգիռ է եվրոպական ազգային պետությունների քայքայմամբ, քան ահաբեկչության դեմ պայքարով: Այս զանգվածային միգրացիան կկործանի մեր աշխարհամասը, որի փոքր երկրներն այլևս որևէ նշանակալի դերակատարում չունեն Բրյուսելի համար: Պրոցեսն անհրաժեշտ է կանգնեցնել»,– հայտարարել է Կլաուսը, որը հայտնի է նաև ներկայի Եվրոպան՝ «հետդեմոկրատական», իսկ Գերմանիային, Ֆրանսիային ու Իտալիային՝ «անմիտ ծանրաքաշներ» որակելու՝ իր թևավոր մտքով:

Հարկ է նշել, որ Չեխիայի ներկայի նախագահ Միլոշ Զեմանն էլ հետ չի մնում նրանից, որը Բրյուսելի պահվածքը որակել է իբրև «գրոհ՝ ուղղված ազգային պետության սուվերենության հանդեպ»: «Տկարամտության արդյունք»,– սա էլ վարչապետ Բուգուսլավ Սոբոտկայի որակումն է, որը նաև հայտարարել է, թե Պրահան պատրաստ է իր շահերը պաշտպանել Եվրոպական դատարանում:

Չեխ լրագրողներն էլ հին չեխական մի անեկդոտ են շրջանառում. Չեխոսլովակիայում պայքար է ընթանում օկուպանտ ֆաշիստների դեմ, որին նաև կարմիրբանակայիններն են մասնակցում: Մի ծեր չեխ շատ հանգիստ հողն է փորում, իսկ այդ պահին, ճիշտ նրա կողքին, ֆաշիստների արձակած կրակոցից կարմիրբանակային է ընկնում: Չեխ ծերուկն անխռով շարունակում է հող փորել, բայց երբ քիչ անց մեկ այլ կարմիրբանակային է կրակոցից մեռնում, գլուխն է քորում ու քթի տակ ասում՝ Չէ՜, եղբայր, փոքրաթիվ չեխերս չենք կարող մեր կյանքն այսպես վտանգել:

Ասել կուզի՝ Չեխիան փոքր երկիր է, որտեղ առանց այդ էլ քիչ միգրանտներ չկան: Եվ հիմա, եթե կառավարությունը համաձայնի Բրյուսելի քվոտաներով մահմեդականներ ընդունել Աֆրիկայից, հանրությունն իրեն չափազանց վտանգված կզգա: Այստեղ սարսափում են Հունաստանի և Իտալիայի ճամբարներում ապրող 120000 միգրանտներին նայելով, և քանի որ Բրյուսելում էլ բանի տեղ չեն դրել կառավարության խնդրանքը՝ ապահովել ԵՄ արտաքին սահմանների անվտանգությունն ու մանրամասն ստուգել իրենց երկիր ուղարկվող միգրանտների կենսագրությունը, ցանկացած քաղաքական գործիչ, որը կենթարկվի Բրյուսելի ճնշմանը, ուղղակի քաղաքական ինքնասպանություն կգործի՝ համոզված են փորձագետները: Այնպես որ, սպասել է պետք Czexit–ի, եթե, իհարկե, այս ընթացքում ոչինչ չփոխվի: