Մեծ Բրիտանիան Հայաստանի խորհրդարանի կարողությունները զարգացնելու ծրագիր կիրականացնի

Մեծ Բրիտանիայի և  Հյուսիսային Իռլանդիայի Միացյալ Թագավորությունը Հայաստանի Ազգային ժողովի կարողությունների զարգացմանը միտված ծրագիր կիրականացնի: Հունիսի 23-ին ՀՀ Ազգային ժողովի նախագահ Արա Բաբլոյանը և Հայաստանի Հանրապետությունում Մեծ Բրիտանիայի և Հյուսիսային Իռլանդիայի Միացյալ Թագավորության արտակարգ և լիազոր դեսպան Ջուդիթ Ֆարնուորթը ստորագրեցին նամակ-համաձայնագիր, որով Միացյալ Թագավորության կառավարությունը ՀՀ Ազգային ժողովի կարողությունների զարգացմանն ուղղված ծրագիր կիրականացնի:

[gallery id= 59197]

ՀՀ ԱԺ նախագահ Արա Բաբլոյանը համաձայնագրի ստորագրման արարողությունից հետո ընդգծեց, որ ստորագրել են մի փաստաթուղթ, որը նոր որակի համագործակցության մեկնարկ է: «Նոր Սահմանադրությամբ Հայաստանի Ազգային ժողովին վերապահված լիազորությունները և Ազգային ժողովի դերի բարձրացումը ենթադրում են օրենսդիր մարմնի գործառույթների ընդլայնում, մշտական հանձնաժողովների և աշխատակազմի կարողությունների ամրապնդում և կատարելագործում:  Այս առումով չափազանց կարևոր է լավագույն փորձի ուսումնասիրությունը և կիրառումը»,- «Արմենպրես»-ի հաղորդմամբ`  նշեց ՀՀ ԱԺ նախագահը:

Նա վստահեցրեց, որ ՀՀ ԱԺ-ն բաց է համագործակցության համար և հույս ունեն իրականություն դարձնել այն ծրագրերը, որ համատեղ ջանքերով կմշակվեն: «Մենք կանենք հնարավորը մեր աշխատանքի արդյունավետության բարձրացման և կառավարման նոր համակարգին սահուն անցում կատարելու համար»,- եզրափակեց Արա Բաբլոյանը:

Հայաստանի Հանրապետությունում Մեծ Բրիտանիայի և Հյուսիսային Իռլանդիայի Միացյալ Թագավորության արտակարգ և լիազոր դեսպան Ջուդիթ Ֆարնուորթը ընդգծեց, որ շատ ուրախ է ներկա գտնվել Հայաստանի Ազգային ժողովին աջակցություն ցուցաբերելու համաձայնագրի պաշտոնական ստորագրման արարողությանը: «Ընդլայնված լիազորությունները նաև իրենց հետ բերում են մեծ պատասխանատվություն խորհրդարանի բոլոր անդամների համար, որոնք իրենց որոշումների կայացման, օրենսդրական նախաձեռնությունների մշակման, ինչպես նաև կառավարության գործունեությունը վերահսկելու գործում ավելի հաշվետու կդառնան հայ ժողովրդի համար:  Սա է պատճառը, որ Հայաստանում բրիտանական դեսպանությունը ուրախությամբ ընդունեց հայկական կողմի առաջարկը` ամրապնդելու Հայաստանի Ազգային ժողովի կարողությունները, որպեսզի խորհրդարանն ավելի արդյունավետ կերպով ներկայացնի քաղաքացիների շահերը, պատգամավորներն աշխատեն ավելի թափանցիկ և լինեն ավելի հաշվետու և իրականացնեն վերահսկողության արդյունավետ գործառույթներ»,- ասաց դեսպանը:

Ջուդիթ Ֆարնուորթը հավելեց, որ Միացյալ Թագավորությունում ընթացիկ ամսվա ընթացքում կայացել են խորհրդարանական ընտրություններ` նկատելով, որ Հայաստանի և Միացյալ Թագավորության խորհրդարանները առաջիկա 5 տարիներին համընթաց են աշխատելու: «Սա հնարավորություն է ընձեռում սերտ կապեր հաստատել երկու խորհրդարանների միջև` ի հավելումն մեր համապատասխան խորհրդարանական բարեկամական խմբերի աշխատանքի: Ես հույս ունեմ, որ ծրագիրը, որի մեկնարկը մենք տալիս ենք այսօր, միայն սկիզբն է Միացյալ Թագավորության և Հայաստանի միջև խորհրդարանական հարցերում ավելի սերտ համագործակցության: Ես Հայաստանի Ազգային ժողովի, վարչապետի և նախագահի հետ քննարկումներից հասկացել եմ, որ հայկական կողմից այդ համագործակցությունը խորացնելու քաղաքական կամքը կա: Ես կոչ եմ անում Հայաստանի Ազգային ժողովի բոլոր խմբակցություններին ակտիվ մասնակցություն ունենալ մեկնարկող ծրագրին` հանուն Հայաստանի խորհրդարանի և հայ ժողովրդի բարօրության»,- եզրափակեց դեսպանը:

Ծրագրի անմիջական իրականացնողը ՀՀ Ազգային ժողովում կլինի Մարդկային զարգացման միջազգային կենտրոնն է: Կենտրոնի ղեկավար, ՀՀ ազգային ժողովի նախկին պատգամավոր Թևան Պողոսյանը լրագրողների հետ զրույցում ընդգծեց, որ Ազգային ժողովի նոր կանոնակարգի մշակման ընթացքում արդեն հասկանալի էր, որ շատ մարդիկ չեն տիրապետելու այն փոփոխություններին, որ արվում էին, որովհետև նոր կանոնակարգի քննարկումներն էլ շատ արագացված տեմպերով անցան: Հիմա մենք ունենք նոր խորհրդարան, իսկ ես շատ հանդիպումների ժամանակ բարձրաձայնել եմ այն մասին, որ մենք Ազգային ժողովի կարողությունների բարձրացման խնդիր ունենք, որպեսզի կարողանանք ստանալ այն խորհրդարան, որը զգալու է, որ ինքն է կանգնած կառավարման մոդելի հիմքում , որը կարողանալու է լիարժեք օգտագործել ոչ միայն օրենսդրական, այլ նաև վերահսկողական լիազորությունները: Եվ շատ ուրախ եմ, որ Միացյալ Թագավորության դեսպանատունը և Հայաստանի Ազգային ժողովի ղեկավարությունը որոշում են կայացրել նման ծրագիր իրագործել»,- ընդգծեց Պողոսյանը:

Նա նշեց, որ համապատասխան պայմանավորվածությունից հետո ՀՀ ԱԺ-ն և ՀՀ-ում Միացյալ Թագավորության դեսպանատունը մրցույթ են հայտարարել, իսկ  Մարդկային զարգացման միջազգային կենտրոնը գրել է ծրագիրը, մասնակցել է մրցույթին և հաղթել այն: Ծրագրի շրջանակներում նախատեսվում է աշխատանքներ տանել նորեկ պատգամավորների, խորհրդարանի մշտական հանձնաժողովների, խմբակցությունների, աշխատակազմի հետ: Թևան Պողոսյանն ընդգծեց, մեր պատգամավորների հետ աշխատելու են հիմնականում իրենց կենտրոնի հայ մասնագետները, սակայն հավելեց, որ իրենք խնդրելու են, որպեսզի ծրագրի իրականացման ընթացքում նաև Մեծ Բրիտանիայից մասնագետներ ժամանեն Հայաստան և կիսվեն իրենց փորձով: