Արա Աբրահամյանն իր հիմնած կուսակցությամբ փորձելու է տարբերվել Գագիկ Ծառուկյանից

 Ռուսաստանի հայերի միության նախագահ Արա Աբրահամյանը մինչև կուսակցության ստեղծման մասին հայտարարելը խորհրդակցել է ՀՀ նախագահ Սերժ Սարգսյանի հետ և ներկայացրել իր դիրքորոշումը: Գիտություններ ի ազգային ակադեմիայի դահլիճում կայացած ասուլիսի ժամանակ Աբրահամյանն ասաց, որ իր նպատակն իշխանափոխությունը չէ, ինքը գալիս է Հայաստան, քանի որ «չի կարող ճոխ սեղանի առաջ նստել, երբ Հայաստանում կան սոված մարդիկ»:

Լրագրողի հարցին, թե «արդյոք չի տեսնում նմանություններ իր եւ Գագիկ Ծառուկյանի միջեւ», Աբրահամյանը պատասխանեց. «Ես գիտեմ մի բան` կուսակցությունը չպետք է լինի բիզնես: Դուք կզգաք մեր կուսակցության եւ գաղափարախոսության տարբերությունը մյուսներից: Նայեք իմ անցած ճանապարհին: Ինձ տասնյոթ երկիր պարգեւատրել է իր բարձրագույն շքանշանով: Ես դաշտում չեմ տեսնում մարդու, ով ունի այնքան հնարավորություն, այնքան փորձ ու կապ, որքան ես: Իմ ընկերներից մեկը ֆրանսիական «Ռենո»-ի սեփականատերն է»,- ասաց Արա Աբրահամյանը: Նրա ընկերներից մեկն էլ ԱÖ �թուր Բաղդասարյանն է: Շրջանառվող լուրերը, որ իր կուսակցությանը կարող են միանալ «Օրինաց երկիրն» ու ՀԺԿ-ն, Աբրահամյանը ոչ հերքեց, ոչ էլ հաստատեց. «Ես կուսակցություն եմ բացելու, ով կմիանա` կմիանա: Մենք բոլորին կընդունենք եւ կաշխատենք»:

Երկրի նախագահ ընտրվելու հավակնությունների վերաբերյալ հարցին ի պատասխան` Աբրահամյանը նախ հարցրեց «Ո՞ր երկրի»: Ինչ վերաբերում է երկրի օրենսդրությանը, համաձայն որի, ՀՀ նախագահը պետք է վերջին 5 տարին Հայաստանում բնակվելիս լինի, Աբրահամյանը զայրացած ասաց.

«Դուք ուզում եք ասել, որ ես իրավունք չունե՞մ վարչապետ կամ նախագահ դառնալու: Ես այդ ամեն ինչը գիտեմ, հավատացե՛ք, գիտեմ: Խնդիրը գնում է կուսակցության մասնակցությանը խորհրդարանական ընտրություններին, խոսքը երկրի մասին է, ամեն ինչ լավ է լինելու: Ես միշտ եղել եմ ՀՀ քաղաքացի, ես տարեկան տասնութ անգամ լինում եմ  Հայաստանում»,- ասաց Արա Աբրահամյանը: Միաժամանակ, Ռուսաստանի հայերի միության նախագահն ասաց, որ ինքը ռուս է, իրեն զգում է ռուս եւ երբ Ամերիկայից իջնում է Ռուսաստան, օդանավակայանում իրեն ընդունում են որպես ռուսի:

«Բայց ես հայ եմ եւ հպարտանում եմ իմ հայրենիքով, իմ Մալիշկայով, իմ գյուղով: Որ ասում եմ ռուս եմ, չի նշանակում, որ ազգությամբ եմ ռուս, ես հոգով սրտով հայ եմ: Ես ՄԱԿ-ում հաճախակի ելույթ եմ ունենում եւ խոսում հայերի մասին: Ես լիարժեք հայ եմ, կարող եք չկասկածել, ես սրտով ինտերնացիոնալ մարդ եմ»,- ասաց Աբրահամյանը` հավելելով, որ կուսակցություն ստեղծելով ինքը չի ցանկանում կարիերա ստեղծել: «Ես բիզնեսմեն եմ, ես իմ ժամանակի մեծ մասը ներդնում եմ հասարակական կազմակերպությունների հետ աշխատանքում: Ինձ շատ են քննադատում ռուսերեն խոսելու համար, դու ք` ռուսերեն խոսացողներդ մի կառույց բացեք, աշխատեք, ինձ էլ ազատեք: Իմ քայլերում վատ բան չկա, այն, ինչ անում եմ, իմ ժողովրդի համար եմ անում»,- ասաց Արա Աբրահամյանը` հավելելով, որ կուսակցությունը ֆինանսական խնդիրներ չի ունենա եւ ներդրումները լինելու են իր անձնական միջոցներից: Մոտ ապագայում Երեւանում նա կուսակցության գրասենյակ է բացելու, իսկ թե կուսակցության անունն ինչ է լինելու, Աբրահամյանն ասաց, որ դեռ որոշված չէ: