Թրամփի համար փոս փորողներն իրենք փոսն ընկան

INTERNATIONAL NEWS 29 June, 2017 15:08

Վերջին օրերին Թրամփի՝ ռուսական կապերով պայմանավորված սկանդալն անսպասելի շրջադարձ ունեցավ: Նախ՝ վերջնականապես ճշտվեց նրան Կրեմլի հետ կապող կոմպրոմատների սկզբնաղբյուրը, որ New York Times–ի փոխանցմամբ՝ Fusion GPS–ն է: Այնուհետ հիշյալ ընկերությունը հրաժարվեց համագործակցել Սենատի հատուկ կոմիտեի հետ, որտեղ հիմա ոչ այնքան սկզբնապես պլանավորված գործով են զբաղվում, այլ Fusion GPS–ին ֆինանսավորողների հայտնաբերմամբ և նրա կառավարական կապերով:

Ի վերջո, հենց դրա ձեռքում էին հայտնվել, իբր, հետախուզական մարմիններից ստացված տվյալները, որոնք էլ Fusion GPS–ի թեթև ձեռքով հաստափոր հատորյակի էին վերածվել: Չխոսենք արդեն այն մասին, որ հենց այս ընկերությունն է տարիներ շարունակ զբաղվել հանրապետականների սև PR–ով: Ի դեպ, New York Times–ի հետաքննության արդյունքում, ակնհայտ է դարձել նաև ընկերության՝ դեմոկրատների հետ ունեցած կապը, ինչպես նաև այն, որ Fusion GPS–ի համահիմնադիրներից Փիթեր Ֆրիչը միայն մի նվիրաբերությամբ ուղիղ 1մլն. դոլար է փոխանցել դեմոկրատական թեկնածու Հիլարի Քլինթոնի հիմնադրամին: Եվ այս համատեքստում հարկ է նշել նաև, որ անկախ Թրամփի նկատմամբ վերաբերմունքից՝ վերջին շրջանում դեմոկրատների շարքերում էլ հայտնվեցին բազմաթիվ մարդիկ, այդ թվում՝ սենատորներ/կոնգրեսմեններ, որոնք սկսեցին հրապարակավ կասկածել Կրեմլի հետ՝ Թրամփի ունեցած կապերի առնչությամբ:

Ավելին՝ նրանցից ոմանք տեսակետ հայտնեցին, որ այդպես էլ որևէ կերպ չապացուցվող դոսյեն, արդեն կես տարի, փաստացի կաթվածահար է անում օրենսդիր մարմինը, որը, լուրջ գործով զբաղվելու փոխարեն, անընդհատ այս խնդրին է բախվում՝ ավելի ու ավելի խճճվելով: Բնականաբար, վերոնշյալ փաստն էլ իր հերթին լուրջ սկեպտիզիմ առաջացրեց նրանց շրջանում: Իսկ արդեն հաջորդ նորությունը բոլորին ստիպեց մտածել ոչ թե ռուսական, այլ հենց ներամերիկյան դավադրության մասին, որում մասնակցի կամ նույնիսկ ուղղորդողի դերակատարում է ստանձնել ամերիկյան մեդիան:

Հակառակ դեպքում ոչ մի տրամաբանության չի ենթարկվում CNN–ի պատասխանատու խմբագիր Ռիչ Բարբիերիի՝ հանրության սեփականությունը դարձած ներքին գրագրությունը, ըստ որի՝ արգելվում է եթեր հեռարձակել թեկուզ անուղղակիորեն ՌԴ–ին վերաբերող որևէ նյութ՝ առանց անձամբ պատասխանատու խմբագրի կամ TV–ի հետ կապված Premium Content Video ընկերության փոխնախագահ Ջեյսոն Ֆարկասի հետ համաձայնեցնելու: Ի դեպ, ինֆորմացիայի արտահոսքը կայացած փաստ դարձավ այն բանից հետո, երբ CNN–ը նախ՝ հրաժարվեց հերքել իր հրապարակած կեղծ տեղեկությունն այն մասին, որ նախագահ Թրամփի խորհրդական Էնթոնի Սկարամուկսիի նկատմամբ նույնպես ռուսական գործով հետաքննություն է անցկացվում, ապա արդեն, արտահոսքից հետո, ջնջեց հրապարակումը և ուշացած ներողություն խնդրեց բոլորից: Վստահաբար, դա էլ չէր արվի, եթե ամերիկյան մեդիան մոնիթորինգի ենթարկող Project Veritas–ի աշխատակցի ներկայությամբ CNN–ի պրոդյուսեր Ջոն Բոնիֆիլդը չանկեղծանար ու չնշեր, որ ՌԴ–ին ու Թրամփին առչնվող բոլոր նյութերը, ինչպես մնացած տեղերում, հիմնականում կեղծվում են: Եվ դա այն դեպքում, երբ իրենք ամենաշատն են խոսում, օրինակ, ռուսական RT–ի, Sputnik–ի կեղծիքների և ուղեղների լվացման մասին:

Կարճ ասած՝ պրոցեսը հետաքրքիր հուն է տեղափոխվում: Եվ այնքան, որ հիմա էլ Թրամփին մոռացած՝ նույն դեմոկրատները սկսել են մեղադրել Օբամային, որն, իբր, ամիսներ առաջ է տեղեկացված եղել ռուսական ծրագրերի վերաբերյալ և բավարար ուշադրություն չի դրսևորել: Արդյունքում Թրամփը Թվիթերում մի լավ ծիծաղեց բոլորի վրա՝ գրելով, թե դժվար է հասկանում Օբաման օգնե՞լ, թե խանգարել է Հիլարիին: Նա նաև հաղթանակ է որակել այն փաստը, որ եթե իրեն չէին հավատում, այժմ ստիպված կլինեն հավատալ անկախ Project Veritas–ին, որտեղ պնդում են, թե ամերիկյան մամուլը փակում է ճշմարիտ տեղեկատվության՝ հանրության հասցնելու բոլոր ուղիները…