ՆԱՏՕ–ն միաբանության՝ մասամբ հաջողված ուղերձ է հնչեցրել

INTERNATIONAL NEWS 1 July, 2017 19:09

Վերջին երկու օրերի ընթացքում ակտիվորեն է քննարկվում ՆԱՏՕ–ի անդամ/գործընկեր երկրների պաշտպանության նախարարների՝ բրյուսելյան հանդիպումը, որի արդյունքները ալյանսի գենսեկ Հենս Սթոլթենբերգը մամուլի ասուլիսի ժամանակ էր լրագրողների հետ կիսել: Դժվար է ասել՝ հանդիպումը փակ դռներից այն կողմ ինչպես է անցել իրականում, բայց ակնհայտ էր, որ ՆԱՏՕ–ի գենսեկը, հատկապես ԱՄՆ նախագահ Դոնալդ Թրամփի հետ լարված հարաբերությունները մասամբ կարգավորելուց հետո, փորձել է միաբանության ուղերձ հղել հանրությանը՝ հայտարարելով, թե ՆԱՏՕ–ի անդամ երկրները դաշինքի մարտական ներուժի ամրապնդման ուղղությամբ նոր նպատակներ են համաձայնեցրել։ «Մենք որոշել ենք ավելացնել անվտանգության ապահովումը բոլոր առանցքային ոլորտներում՝ ծանր սարքավորումներ, օդում վառելիքի լիցքավորում, արագ տեղակայման պատրաստ ուժերի թվաքանակի աճ...մասնավորապես՝ պետք է ավելացնենք այն մարտական օդանավերի քանակը, որոնք ունակ են հաղթահարել օդային հասանելիության արգելքի ժամանակակից համակարգերը»,– ասել է Սթոլթենբերգը՝ ակնարկելով, որ ալյանսի բյուջեն զգալիորեն է ավելացել այդ նպատակների հաղթահարման համար, իսկ ԱՄՆ–ն շարունակում է ներդրումների երկու քառորդի չափով դոնոր լինել:

Պենտագոնի ղեկավար Ջեյմս Մետիսը, սակայն, ավելի պերճախոս է գտնվել՝ հայտարարելով, թե ՆԱՏՕ–ի ռազմական ծախսերի ավելացումը պայմանավորված է, նախ և առաջ, այն համոզմամբ, որ Ռուսաստանը չի կարող ալյանսի գործընկերը լինել: «ՆԱՏՕ–ի ռազմական բյուջեի ավելացումը ցույց տվեց, որ անդամ պետությունները համակերպվել են այն մտքի հետ, որ Ռուսաստանը չի կարող այնպիսի գործընկեր լինել, ինչպիսին մենք էինք ցանկանում դեռ 90–ականներին տեսել նրան: Գոնե մոտ ապագայում դա անհնարին է»,– հայտարարել է գեներալ Մետիսը՝ այդկերպ բացահայտելով հաջորդ կարևոր ուղերձը: Այն է՝ ՆԱՏՕ–ն շարունակում է ՌԴ–ին թշնամի դիտարկել, և ռազմական բյուջեի ավելացումն այդ մտայնությունից ելնող համարժեք արձագանք է՝ դրանից բխող առաջիկա բոլոր գործողություններով:

Հաջորդ ուղերձի հեղինակը դարձյալ գենսեկ Հենս Ստոլտենբերգն էր, ով հաստատել է, որ ՆԱՏՕ–ն կմեծացնի իր ներգրավվածությունն Աֆղանստանում ընթացող հակաահաբեկչական պայքարին: Ճիշտ է՝ նա դիվանագիտական պահվածք է դրսևորել, միաժամանակ պնդելով, թե «դա չի նշանակի վերադարձ մարտական առաքելությանը», ինչը ԱՄՆ–ն էր ցանկանում, որովհետև բոլորը հակված են եղել խորհրդատվական–մարզումային «Վճռական աջակցություն» առաքելության շարունակականությանը, սակայն, BBC–ի նյութերից ակնհայտ է դառնում, որ այս հարցով նույնպես թեժ բանավեճ է ներսում ընթացել: Մասնավորապես, Պենտագոնի ղեկավարը դարձյալ չի կարողացել իրեն զսպել և հրապարակավ հայտարարել է, որ 2014–ին ՆԱՏՕ–ի զորքերի դուրսբերումն Աֆղանստանից հապշտապ որոշում էր, ինչին Սթոլթենբերգը կարճ է անդրադարձել՝ Այն ճշմարիտ էր: Ինչն էլ նշանակում է, որ ՆԱՏՕ–ի ներսում և՛ խնդիրները նույն կերպ չեն ընկալվում, և՛ դրանց ներկայացման վերաբերյալ են տարբեր մոտեցումներ առկա: Բրյուսելում, անկախ գործողություններից, հակված են ավելի զգուշավոր բառամթերք գործածել ընդհանրապես պլանների և մասնավորապես՝ Ռուսաստանի նկատմամբ, իսկ ահա ամերիկյան բազեները, որոնք մտադրվել են օկուպացնել Սպիտակ տունը, խնդիր չեն տեսնում խիստ թափանցիկ ու շատ կոնկրետ ռազմաշունչ տեքստեր հնչեցնելու առումով: Հավանաբար, դա է պատճառը, որ որոշում է կայացվել ՆԱՏՕ–ի հաջորդ գագաթնաժողովը արագ հրավիրել, և Սթոլթենբերգն էլ հաստատել է, որ այն կկայանա դարձյալ Բրյուսելում՝ մեկ ամսից էլ քիչ ժամանակ անց:

Գոհար Սիմոնյան