Ռուսաստանը պետք է շարունակի ջանքերը ԼՂ հակամարտության կարգավորման ուղղությամբ. ՌԴ Ռազմավարական մշակումների կենտրոնի հայեցակարգ

Ռուսաստանի Ռազմավարական մշակումների կենտրոնն առաջիկա տարիների համար երկրի տնտեսական զարգացման ծրագրից հետո հրապարակել է նաև ՌԴ արտաքին քաղաքականության հայեցակարգը: Ինչպես տեղեկացնում է «Արմենպրես»-ը, ՌԴ ֆինանսների նախկին նախարար Ալեքսեյ Կուդրինի ղեկավարած կենտրոնի հրապարակած հայեցակարգը ներառում է մի շարք մոտեցումներ, որոնք վերաբերում են ԵԱՏՄ զարգացմանը, ՀԱՊԿ-ին, ՌԴ արտաքին քաղաքականությանը հետխորհրդային տարածքում. խոսվում է նաև ԼՂ հակամարտության կարգավորման մասին:  

«Ռուսաստանը և հարևան երկրները բախվում են անվտանգության ընդհանուր մարտահրավերների: Դա հրամայական է դարձնում Հավաքական անվտանգության պայմանագրի կազմակերպության առկայությունը, որպես հետխորհրդային տարածքում առաջատար ռազմաքաղաքական ինստիտուտի»,- նշվում է հայեցակարգում:

Հեղինակներն ընդգծում են, որ ահաբեկչության և արմատական իսլամիզմի սպառնալիքը ՀԱՊԿ երկրների համար առանցքայիններից մեկն է: Հիմնական ռիսկերը կապված են Կենտրոնական Ասիայի տարածաշրջանի հետ: Մերձավոր Արևելքում իրավիճակի ընդհանուր վատթարացումը բացասական է անդրադառնում նաև Կենտրոնական Ասիայի կայունության վրա:

«Ռուսաստանը պետք է նպաստի ՀԱԿՊ ներուժի զարգացմանը, արագ արձագանքման ուժերի ամրապնդմանը,  ինչպես նաև հակաահաբեկչական բաղադրիչի կատարելագործմանը: Կարևոր են նաև ՀԱՊԿ շրջանակում համագործակցության այլ ուղղությունները, այդ թվում՝ օդատիեզերական պաշտպանության ընդհանուր համակարգի զարգացումը»,- շեշտվում է փաստաթղթում:

Ընդգծվում է, որ հետխորհրդային տարածքում պահպանվում են մի շարք սառեցված հակամարտություններ՝ հավելելով, որ Ռուսաստանը պետք է շարունակի ջանքերը ղարաբաղյան հակամարտության կարգավորման ուղղությամբ՝ հանդես գալով որպես միջնորդ Հայաստանի և Ադրբեջանի երկխոսության միջև:

Հայեցակարգում նշվում է, որ հետխորհրդային տարածքը վերածվել է Ռուսաստանի և Արևմուտքի (ԵՄ և ՆԱՏՕ) կառույցների մրցակցության ասպարեզի: Հեղինակները հավելում են սակայն, որ արևմտյան կառույցներին ինտեգրումը կամ նրանց հետ սերտ համագործակցությունը երկարաժամկետ հեռանկարում կմնա գրավիչ ծրագիր հետխորհրդային տարածքի երկրների համար:

«Ռուսաստանը ևս հետաքրքրված է արևմտյան կառույցների հետ համագործակցությամբ՝ հարցերի լայն շրջանակով: Ռուսաստանին  անհրաժեշտ է ողջամիտ, հետևողական և գրավիչ ծրագիր հետխորհրդային տարածքի համար: Նա չի կարող և չպետք է հիմնվի նեոիմպերիալիստական հիմքերի, կամ Արևմուտքի  հետ կոշտ դիմակայության վրա: Պահանջվում է ապահովել իրավահավասար խորը փոխգործակցություն ինչպես արևմտյան, այնպես էլ արևելյան  նախաձեռնությունների հետ»,- նշվում է փաստաթղթում:  

Հայեցակարգի հեղինակները շեշտում են, որ Եվրասիական տնտեսական միության ի հայտ գալը որակյալ քայլ է դեպի առաջ՝ հետխորհրդային տարածաշրջանում փոխշահավետ և իրավահավասար ինտեգրացիոն կառույցների ստեղծման ուղղությամբ:

«Ռուսաստանը պետք է շարունակի տնտեսական միավորման հիմքի ստեղծումը՝ խուսափելով տալով քաղաքական բախումներից: ԵԱՏՄ-ն երիտասարդ ինտեգրացիոն միավորում է: Պահանջվում է նշանակալի աշխատանք անդամ պետությունների օրենսդրությունների ներդաշնակեցման, ընդհանուր տարածքների ստեղծման, Միության արդյունավետության բարձրացման ուղղությամբ: Եվրասիական տնտեսական միությունն ունի միջազգային համագործակցության նշանակալի ներուժ: Անհրաժեշտ է զարգացնել Վիետնամի հետ ազատ առևտրի գոտու դրական փորձը, խթանել գործընկերային կապերը այլ երկրների և ինտեգրացիոն միավորների հետ: Այդ կապերում հատուկ տեղ պետք է զբաղեցնի ԵԱՏՄ-ի և չինական «Մետաքսի ճանապարհ» ծրագրի զուգակցումը: ԵԱՏՄ-ն պետք է ձգտի ԵՄ-ի կողմից որպես իրավահավասար գործընկերոջ ճանաչմանը, ապահովի ԵՄ-ԵԱՏՄ ապաքաղաքական երկխոսությանը»,- նշվում է Ռազմավարական մշակումների կենտրոնի հրապարակած հայեցակարգում:        

2016 թվականի ապրիլի 30-ին Ռուսաստանի Դաշնության նախագահ Վլադիմիր Պուտինն Ալեքսեյ Կուդրինին նշանակել էր նախագահին կից տնտեսական խորհրդի նախագահի տեղակալ: Ներկայումս Կուդիրինը գլխավորում է Ռազմավարական մշակումների կենտրոնը՝ լրագրողներին տեղեկացնելով, որ Պուտինի հանձնարարականով զբաղվելու է 2018-ից հետո Ռուսաստանի զարգացման ռազմավարությամբ՝ տարբեր ուղղություններով:

Արմեն Խաչատրյան