Հյուսիսային Կորեայի հրթիռների համար բոլորն են հասանելի

INTERNATIONAL NEWS 5 July, 2017 18:03

Հյուսիսային Կորեայի իշխանություններն առաջին անգամ հայտարարել են Խվանսոն–14 միջմայրցամաքային բալիստիկ հրթիռի հաջող փորձարկման վերաբերյալ, որն, իբր, ի վիճակի է հասնել Ամերիկա, և ինչպես տեղի իշխանություններն են վկայել՝ ցանկացած այլ մայր ցամաք:

Ճապոնական զինվորականները BBC–ին հայտնել են, որ տեղական ժամանակով 3:40–ին, իսկ Գրինվիչի ժամանակով՝ 0:40–ին, Խվանսոն–14 միջմայրցամաքային բալիստիկ հրթիռը հյուսիսկորեական Փհենյան–Պուկտո զորակայանից արձակվել և 37 րոպեում անցել է ուղիղ 930 կիլոմետր տարածություն, ծովի մակերևույթից բարձրանալով 2800 կիլոմետր՝ ընկնելով Ճապոնական ծովում նշագծված Ճապոնիայի տնտեսական տարածք: Տեղի մամուլը գոհունակություն է հայտնել գոնե այն փաստի առիթով, որ իշխանությունները նախապես հասցրել են զգուշացնել իրենց ջրերում լողացող նավերին, որոնք անվտանգության հետ կապված նախնական միջոցառումներ են ձեռնարկել:

Ի դեպ, ասել, որ տեղի ունեցածը զարմացրել է բոլորին, նշանակում է ոչինչ չասել, որովհետև փորձագետները նման ուժգնության և հնարավորություններով բալիստիկ հրթիռի արտադրության համար տարիների աշխատանք էին կանխատեսել: Բայց փաստը մնում է փաստ, և դրա առնչությամբ Ճապոնիայի վարչապետ Սինձո Աբեն հայտարարել է, թե Հյուսիսային Կորեայի գործողություններն այժմ արդեն վտանգի առավել մեծ մակարդակի մասին են վկայում, որն անհրաժեշտ է չեզոքացնել: Հարավային Կորեայի նախագահ Մուն Չժե Ինն էլ ազգային անվտանգության խորհրդի արտահերթ նիստի գումարման հրահանգ է տվել՝ փորձելով հաշվարկել, թե Սեուլի հետագա քայլերը որոնք պիտի լինեն:

Պակաս մտահոգված չեն նաև Սպիտակ տանը, որտեղ չնայած վերջին միջադեպի հետ կապված ամերիկա–չինական լարված հարաբերություններին՝ Պեկինին կոչ են արել շտապ հակազդման միջոցառումներ ձեռք առնել: ԱՄՆ նախագահ Դոնալդ Թրամփն անձամբ է իր թվիթերյան միկրոբլոգում մեկնաբանել Հյուսիսային Կորեայի կողմից բալիստիկ հրթիռի արձակման փաստը՝ հետևյալ գրառումն անելով. «Հյուսիսային Կորեան հենց նոր հերթական հրթիռն արձակեց։ Այդ տղան իր կյանքում որևէ այլ զբաղմունք չունի՞, ինչ է։ Դժվար է հավատալ, որ Ճապոնիան ու Հարավային Կորեան կշարունակեն հանդուրժել սա։ Հավանաբար Չինաստանը վերջապես քայլ կանի և մեկընդմիշտ վերջ կդնի այս անհեթեթությանը»,– գրել է ԱՄՆ նախագահը, որն ընդամենը մեկ օր առաջ էր խնդրո առնչությամբ հեռախոսազրույց ունեցել Ճապոնիայի և Չինաստանի ղեկավարների հետ:

Գոհար Սիմոնյան