Ֆիզուլիի տուժած բնակիչները Ադրբեջանի նախագահին պետք է հարցապնդում անեն, թե ինչու են իրենց գյուղում հենակետ տեղադրում. Գագիկ Համբարյան

Ղարաբաղա-ադրբեջանական շփման գծում հուլիսի 4-ին տեղի ունեցած իրադարձությունները տանում են պատերազմի: Այս մասին Tert.am-ի հետ զրույցում ասաց քաղաքագետ Գագիկ Համբարյանը:  

Իսկ պատճառն այն է, որ նախորդ տարվա ապրիլյան պատերազմից հետո ԵԱՀԿ Մինսկի խումբն այդպես էլ չկարողացավ Ադրբեջանին պարտադրել իրագործել Վիեննայում ձեռք բերված, ապա Սանկտ Պետերբուրգում վերահաստատված պայմանավորվածությունները:

«Ադրբեջանական կողմը 1 տարի է՝ օգտագործում է այս հանգամանքը: Պաշտոնական Բաքուն Արցախի ու Ադրբեջանի սահմանային գրեթե բոլոր խաղաղ բնակավայրերը դարձրել է հզոր ռազմական հենակետեր: Ուստի ես դրական եմ գնահատում հայկական կողմի պատասխանը Ադրբեջանի կողմից զինադադարի կոպտագույն խախտման դեպքին, երբ նրանք առաջին անգամ օգտագործեցին վերջերս գնած T-107 համակարգը»,- ասաց Գագիկ Համբարյանը:

Ըստ նրա՝ հայկական կողմը ոչ միայն պետք է հարվածի ադրբեջանական հենակետերին, այլև՝ բնակավայրերին, որտեղ գտնվում են այդ հենակետերը: Համբարյանն ասաց, որ հենց պաշտոնական Բաքուն է, որ Հայաստանին այլ ելք չի թողնում:

«Այլ տարբերակ մեզ չի մնում: Հայկական կողմին բացարձակ ձեռնտու չէ զինադադարը խախտել: Հայկական կողմի համար նախընտրելի է հարցի կարգավորման բանակցային ճանապարհը: Ադրբեջանը երբևէ չի թաքցրել, որ զինադադարի խախտողը հենց ինքն է: Ադրբեջանական կողմը պարտադրում է իր խաղը, որին մենք պետք է պատասխանենք, իսկ պատասխանը մենք չենք հնարել, այն իսրայելական է: Իսրայելն այդպես էր պայքարում պաղեստինյան ահաբեկիչների դեմ: Մենք էլ նույնն ենք անում:

Ահաբեկչական Ադրբեջանը, որը ռմբակոծում է մեր դիրքերը, պետք է պատասխան տա իր հասարակությանը, թե ինչու են զոհվում իր բնակիչները: Իսկ պատճառն այն է, որ բնակավայրերը դարձել են հենակետեր: Ադրբեջանական ահաբեկչական պետության դեմ պետք է պայքարենք ադրբեջանական հանրությանը Իլհամ Ալիևի դեմ հանելով: Ֆիզուլիի տուժած բնակիչները Ադրբեջանի նախագահին պետք է հարցապնդում անեն, որ եթե իրենց գյուղում հենակետ են տեղադրում, ուրեմն պետք է ապահովեն նաև գյուղի բնակչության անվտանգությունը»,- նշեց Գագիկ Համբարյանը:

Ավելի վաղ Արցախի Հանրապետության պաշտպանության նախարարությունը հայտնել էր, որ հուլիսի 4-ին արցախա-ադրբեջանական հակամարտ զորքերի շփման գծի տարբեր հատվածներում հակառակորդը շարունակել է խախտել հրադադարի պահպանման ռեժիմը:

Մասնավորապես, ժամը 11:30-11:35 սահմաններում արևելյան ուղղությամբ ադրբեջանական կողմը կիրառել է 82 միլիմետրանոց ականանետ (4 արկ), նույն հատվածում ժամը 12:45-12:55-ի սահմաններում՝ հաստոցավոր հակատանկային նռնականետ (3 արկ), հարավային ուղղությամբ, ժամը 13:35-ին՝ 60 միլիմետրանոց ականանետ (3 արկ), 19:10-ին՝ 60 միլիմետրանոց ականանետ (2 արկ)։ Իսկ 20:20-20:30-ի սահմաններում Ալխանլու գյուղում տեղակայված ռազմակայանից ադրբեջանական զինուժը ՏՌ-107 տիպի համազարկային հրթիռային կայանքներից կրակ է բացել (5 արկ) հարավային ուղղությամբ գործող զորամասերից մեկի հրամանատարական կետի ուղղությամբ՝ 20:48-ին կիրառելով նաև 82 միլիմետրանոց ականանետ (3 արկ):

Հակառակորդի նախահարձակ ակտիվությունը ճնշելու համար ՊԲ առաջապահ զորամասերը ժամը 20:31-20:40-ի սահմաններում ստիպված են եղել ձեռնարկել պատասխան գործողություններ, ինչի արդյունքում վնաս է հասցվել Ալխանլու գյուղում տեղակայված կրակակետին: ՊԲ համապատասխան ծառայությունների կողմից տրամադրված հավաստի տվյալներով՝ հակառակորդն ունի կորուստներ: