Հիմա ցանկանում եմ բացասական կերպար կերտել. Մարիամ Ադամյան

itylife.am-ը այսօր հյուրընկալել է երիտասարդ դերասանուհի Մարիամ Ադամյանին:

Citylife.am. Մարիա՛մ, հարցազրույցներից մեկում նշել եք՝ չկար մի շրջան, որ դերասանուհի դառնալուց բացի այլ բանի մասին երազեիք. այս երազանքն ունի՞ ինչ-որ արմատներ, մեծացելեք թատերական միջավայրու՞մ:

Մարիամ. Ոչ, թատերական միջավայրում չեմ մեծացել: Ընտանիքում ոչ ոք այս ոլորտից չէ: Հաճախել եմ երաժշտական դպրոց, և բոլորը մտածում էին, որ ջութակահար եմ դառնալու: Իսկ ես երբեք որևէ այլ մասնագիտության մասին չեմ մտածել: Ջութակի դասերին սիրով էի հաճախում, բայց մայրս էր ուղղորդել, ես գիտեի, որ ջութակը չի լինելու իմ ապագան: Իհարկե, մարդ չի կարող հասնել կատարելության որևէ բանում, բայց ես թե՛ թատրոնում, թե՛ ֆիլմերում ու սերիալներում փորձում եմ ինձ ճիշտ դրսևորել: Երաժշտական կրթությունն այժմ ինձ շատ է օգնում, և առհասարակ, չէ՞ որ որքան շատ բան գիտես, այնքան քո օգուտն է:

Citylife.am. Մարիա՛մ, հիշու՞մ եք` ինչպիսի դրսևորումներ էր ունենում Ձեր՝ այդքան մեծ երազանքը:

Մարիամ. Ես երբեք չեմ կանգնել հայելու առաջ և ինչ-որ փորձեր արել կամ կանգնել աթոռի վրա և ասմունքել: Ես ավելի լուրջ տեղերում էի ինձ պատկերացնում: Փակում էի աչքերս և ինձ պատկերացնում «Տիտանիկ» ֆիլմում:

Citylife.am. 2013 թվականից աշխատել եք «Թատրոն 32»-ում, այժմ ներգրավված եք մի քանի ներկայացումներում.ինչպիսի՞նն է հայ հանդիսատեսը:

Մարիամ. Հայ հանդիսատեսը վատը չէ, ուղղակի նրան պետք է մատուցել ճիշտ բան: Ներկայացումներին դահլիճները հիմնականում լեցուն են լինում: Եթե թատրոնում մատուցվի որակյալը, հետաքրքիրը, մարդիկ կգնան, կվճարեն դրա համար և մեծ սիրով կնայեն:

Citylife.am. Կա կարծրատիպ, որ երիտասարդները թատրոնասեր ու ընթերցասեր չեն. համամի՞տ եք:

Մարիամ. Համամիտ չեմ: Ինքս շփվում եմ կարդացող մարդկանց հետ, և չեմ պատկերացնում կյանքն առանց թատրոնի, գրքերի և արվեստի մասին պատկերացումների: Հաճախ եմ լինում թատրոնում որպես հանդիսատես: Իսկ ո՞վ է ասել, որ թատրոնը պետք է միշտ լեփ լեցուն լինի: Տարիներ առաջ այլ էր. հիմա կա համացանց, և եթե այժմ այդքան մարդ հաճախում է թատրոն, շատ գովելի է:

Citylife.am. Արդեն մի քանի տարի է խաղում եք նաև սերիալներում. ո՞րն է մարդկանց կողմից սերիալի վատ ընկալման պատճառը:

Մարիամ. Պատճառները շատ են: Առաջին պատճառը սերիալների երկար տևողությունն է, իսկ այն, ինչը երկար է տևում , ձանձրացնում է: Հեռուստադիտողի ներքին զգայարանները բավականին ուժեղ են. նա միանգամից զգում է՝ որակյալ է արդյոք սերիալը, թե ոչ: Մարդիկ միշտ նայում են սերիալ, բայց երբեք չեն ասում, որ այն հիասքանչ արվեստ է: Հաջորդ պատճառը փորձառու դերասանների կողքին ոչ այդքան տաղանդավոր դերասանների հայտնվելն է: Հեռուստադիտողը դրան չի ադապտանում: Ամենևին նկատի չունեմ դերասանական կրթության բացակայությունը, խնդիրը շնորհքի բացակայությունն է: Ի վերջո սերիալը երբեք չի համարվել բարձրակարգ արվեստ: Իհարկե, կան արտասահմանյան սերիալներ, որոնք այդ կոչմանն արժանի են,  բայց հայկական սերիալային կուլտուրան դեռ չի հասել դրան:

Citylife.am. Որո՞նք են այն առաջնային քայերը, որոնց միջոցով կարելի է մոտենալ այդ կուլտուրային:

Մարիամ. Առաջին հերթին պետք է ֆինանսավորում լինի, այնուհետև` թե՛ ստեղծագործական, թե՛ դերասանական խմբի կողմից լուրջ մոտեցում: Սերիալը չպետք է շատ երկար տևի: Ի վերջո, սերիալը պետք է ստեղծեն իրենց գործին գիտակ մարդիկ:

Citylife.am. Աշխատում եք բավականին փորձառու դերասանների հետ. ընդունու՞մ եք քննադատություններ:

Մարիամ. Աշխատում եմ այնպիսի դերասանների հետ, ովքեր այդ քննադատությունը ինձ տալիս են որպես խորհուրդ: Իմ տեսակը շատ որսացող է. ամեն խոսք ու դիտողություն միանգամից վերցնում եմ:

Citylife.am. Մարիա՛մ, կարևորու՞մ եք, թե որ կերպարն է ձերը՝ գլխավորը, թե երկրորդականը:

Մարիամ. Կարևորը կերպարը լինի հետաքրքիր, ունենա մտածողություն, տրամաբանություն, ճակատագիր: Երբեմն երկրորդական կերպարներն ունենում են շատ ավելի հետաքրքիր ճակատագիր, բայց մեզ մոտ, ցավոք, հիմնականում չեն աշխատում երկրորդական կերպարների ճակատագրի վրա. ինչ-որ բան թերի է մնում:

Citylife.am. Ներգրավված եք և՛ սերիալում, և՛ թատրոնում, խաղացել եք նաև գեղարվեստական ֆիլմում. կա՞ մի առաջարկ, որին անհամբեր սպասում եք:

Մարիամ. Ամեն անգամ, երբ ընդունում եմ որևէ առաջարկ, այն այդ պահին ինձ համար շատ սպասված է լինում: Հիմա շատ եմ ուզում հանդես գալ բացասական կերպարով, նման կերպար երբեք չեմ կերտել: Ինչպես նաև ուզում եմ խաղալ շատ հետաքրքիր գեղարվեստական ֆիլմում: Ուզում եմ նոր կերպարներ կերտել թատրոնում: Շատ եմ սիրում, պաշտում եմ թատրոնը, պատրաստ եմ ողջ ժամանակս տրամադրել թատրոնին:

Մարիա՛մ, շնորհակալ եմ դրական և բովանդակալից զրույցի համար: Ձեզ նորանոր հաջողություններ եմ մաղթում: