Մաստարան ու Զարինջան կարկուտից գրեթե 100%–ի հասնող վնաս են կրել

SOCIETY 8 July, 2017 12:02

Երկու օր առաջ Հայաստանի մի շարք համայնքներում կարկուտ է տեղացել: Եվ մասնավորապես Արագածոտնի մարզի մի շարք գյուղերում ուժեղ կարկուտից ավերվել են ցանքատարածություններ, դաշտեր ու մրգատու ծառեր:

Ինչպես տեղեկանում ենք Արտակարգ իրավիճակների նախարարության հիդրոօդերևութաբանության ծառայությունից՝ դիտարկվող տարածքներում՝ Արագածոտնի մարզի Դդմասար, Արևուտ, Դաշտադեմ, Ցամաքասար, Զարինջա, Մաստարա, Սուսեր, Գետափ համայնքներում, Շիրակի մարզի մարզի Ողջի, Լանջիկ, Սառնաղբյուր, Ձիթանքով համայնքներում և Վայոց ձորի Վարդահովիտ համայնքում տեղացել է կարկուտ: Այդ տարածքները չեն պաշտպանվում հիդրոմետ ծառայության կողմից: Սակայն պաշտպանվող տարածքներից կարկուտ է տեղացել Արագածավան ու Արտենի համայնքներում:

Արագածոտնի մարզի՝ հակակարկտային կայաններ չունեցող Մաստարա և Զարինջա համայնքների ցանքատարածությունները գրեթե 100%–ով վնասվել են: Այս մասին Past.am-ին տեղեկացրին այդ համայնքերի ղեկավարները:

Մաստարայի գյուղապետ Սարգիս Ավետիսյանը նշեց, որ կարկուտը համայնքին մեծ վնասներ է հասցրել: Եվ մեր զանգահարելու ժամանակ նա Արագածոտնի մարզպետարանի Գյուղատնտեսության և բնապահպանության վարչության պետ Յուրա Ազատյանի հետ դաշտերով շրջում էր՝ վնասի հաշվարկ անելու և այնուհետև մարզպետարան ներկայացնելու համար:

«Մոտավորապես 400 հա մակերեսի վրա է տեղացել, վնասել է ցորենի ու գարու դաշտերը: Տեղ–տեղ լրիվ է ջարդել, տեղ–տեղ էլ՝ կիսով չափ: Բայց հիմնականում ավիրել է»,– ասաց համայնքի ղեկավարը:

Հարցին, թե փոխհատուցման ակնկալիքներ ունե՞ն՝ պատասխանեց, որ մարզպետարան, այնտեղից էլ՝ կառավարություն ներկայացնելուց հետո միայն պարզ կլինի: Գյուղապետը նաև նշեց, թե համագյուղացիները դեպքից շատ նեղված են, բայց ինչպես նա է ասում՝ փորձանք ա, եղել ա:

Գարու և ցորենի դաշտեր են ավիրվել նաև Արագածոտնի Զարինջա համայնքում: Համայնքապետ Սևադա Մանուկյանը մեզ հետ զրույցում նշեց, որ այս պահին դեռևս դժվար է հաշվարկելը, քանի որ կարկուտից 1–2 օր հետո միայն հնարավոր է լինում ամբողջական պատկեր ստանալ:

Սակայն արդեն իսկ պարզ է, որ գյուղի բոլոր ցանքատարածությունները վնասվել են, քանի որ կարկուտը համայնքի ամբողջ վարչական տարածքով մեկ է տեղացել:

«Հարևան գյուղերն էլ, բոլորին անխտիր վնաս է պատճառել: Վնասվել են ցորենի, գարու, կորնկանի դաշտերը: Վերջինն արդեն հնձվել էր»,– պատմեց նա:

Հարցին, թե որքա՞ն ժամանակից էին նախապատրաստվում ցորենի ու գարու բերքը հավաքել՝ գյուղապետը պատասխանեց, որ իրենց գյուղում այդ բերքի հավաքման ժամանակը հուլիսի վերջին է՝ հուլիսի 28–ից մինչև օգոստոսի 10–ն ընկած ժամանակահատվածը:

Համայնքապետից նաև հետաքրքրվեցինք, թե հնարավո՞ր է նախնական, մոտավոր հաշվարկ անել և իմանալ չվնասվելու դեպքում հավաքվելիք բերքը որքա՞ն կլիներ և ըստ այդմ գյուղացիների՝ ֆինանսական կորուստները գնահատել: Սրան Սևադա Մանուկյանը պատասխանեց, որ նախորդ տարի բարենպաստ եղանակի պայմաններում մեկ հա–ից 3–5 տոննա բերք են ստացել: Իսկ այսօր մարդիկ իրենց ամբողջ բերքը կորցրել են:

«Չեմ չափազանցնում, վնասն ամենաքիչը կազմել է 60–70%: Կարող է ամբողջ 600 հա տարածքի մեջ մի 10 հա լինի, որ 60% մնացած լինի, մնացածը՝ 80–100%–ով վնասվել է»,– ասաց նա:

Հարցին, թե համագյուղացիներն օգնություն ակնկալում են՝ պատասխանեց, որ գուցե նրանց վարկերի մարման ժամկետները հետաձգվեն կամ անվճար սերմացու տրամադրեն:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ