Սերժ Սարգսյանը կլինի այնտեղ, որտեղ կորոշի ինքն անձամբ, և ՀՀԿ-ն այդ որոշումը սատարելու է. Միհրան Հակոբյան

Ազգային ժողովի «Հայաստանի Հանրապետական կուսակցություն» խմբակցության պատգամավոր Միհրան Հակոբյանը գտնում է, թե 2018թ. վարչապետի թեկնածուի հարցի քննարկումները հնարածին են, և մամուլը, քաղաքական որոշ շրջանակներ փորձում են ինտրիգներ մտցնել, այնինչ ամեն ինչ շատ հստակ է: 

Tert.am-ի հետ զրույցում նա նշեց, որ 2017 թվականի խորհրդարանական ընտրությունների արդյունքում Հայաստանի Հանրապետական կուսակցությունը բավականին լավ արդյունք է գրանցել, ինչը թույլ է տալիս, որ ՀՀԿ-ն որոշում կայացնի, թե ով կլինի վարչապետ:

«Մի բան հստակ է, ով էլ լինի վարչապետը, կլինի ՀՀԿ-ի թեկնածուն՝ ՀՀԿ-ի և ՀՅԴ-ի որոշմամբ: Իսկ ինչ վերաբերում է թեկնածուներին և շրջանառվող անուններին, ապա ՀՀ նախագահն էլ ասել է, որ դեռ որոշում չկա: Իմ անձնական մոտեցումն այն է, որ Սերժ Սարգսյանը կլինի այնտեղ, որտեղ կորոշի ինքն անձամբ, և Հանրապետական կուսակցությունն այդ որոշումը սատարելու է: Սերժ Սարգսյանը երկար տարիներ եղել է ՀՀԿ ղեկավար, և նա կլինի այն պաշտոնում՝ ընդհուպ մինչև վարչապետ, որը ինքը կորոշի»,-ասաց նա:

Միհրան Հակոբյանը կարծում է, որ Սերժ Սարգսյանը Հայաստանի Հանրապետական կուսակցության արդյունավետ ղեկավար է, և նրա որոշումը ու առաջարկությունը ՀՀԿ-ն երբևէ չի մերժել և չի էլ մերժի: 

«Սերժ Սարգսյանը մեր հանրապետության, ներկայիս իրականության այն գործիչն է, ով ծանոթ է հանրապետության ներքին և արտաքին խնդիրներին. չկա մեկը Հայաստանում, որ Սերժ Սարգսյանի չափ տիրապետում է դրանց: 1988 թվականից Սերժ Սարգսյանը անշեղորեն գտնվում է ղեկավար ամենակարևոր պաշտոններում, և Սերժ Սարգսյանն է միակ մարդը, ով տիրապետում է արցախյան գործընթացին: Այս փորձառության, այս տրամաչափի գործիչը երևի թե իրավունք էլ չունի թողնել և հեռանալ, քանի որ պետությունը շատ վատ իրավիճակում է տարածաշրջանում, և Սերժ Սարգսյանն այն եզակի գործիչն է Հայաստանում, որ տիրապետում է խնդիրներին սկզբից մինչև վերջ, երկրորդը չկա»,-ասաց նա և նշեց, որ պետությունը, հայրենիքը ունի Սերժ Սարգսյանի կարիքը:

Ինչ վերաբերում է վարչապետություն ստանձնելու հարցում Սերժ Սարգսյանին «համոզողներին», ապա պատգամավորն ասաց. «Ես համոզողների պրոցես չեմ նկատել, այդպիսի խնդիր բացարձակ չկա, եթե պետք լինի, կհամոզենք էլ, և դրանից կոմպլեքսավորվել պետք չէ»:

Միհրան Հակոբյանը բացառեց նաև, որ կուսակցությունում կարող են «համոզողների» և «չհամոզողների» թիմեր լինել: 

«Համոզելու գործընթաց պետք է լինի, որ համոզես կամ չհամոզես, եթե այդ գործընթացը լինի, ես ինքս կլինեմ համոզողների շրջանակներում, բայց համոզելու խնդիր չկա»,-ասաց նա և նշեց, որ 2018 թվականին դեռ ժամանակ կա, և ինտրիգներ, սպեկուլյացիաներ փնտրել պետք չէ:

«Երբ որոշելու ժամանակը գա, Սերժ Սարգսյանն իր որոշիչ խոսքը կասի: ՀՀԿ-ում թիմեր չկան, ՀՀԿ-ն մեկ թիմ է, և այդ թիմի ղեկավարը Սերժ Սարգսյանն է»,-ասաց նա:

Ինչ վերաբերում է նրան, թե ինչ դեր կունենա վարչապետ Կարեն Կարապետյանի որոշումը, ապա Միհրան Հակոբյանն ասաց. «Անձերի որոշումներով չէ, կուսակցություններն ինստիտուտներ են`որոշումներ կայացնելու հստակ մեխանիզմներով. անձերի ցանկությունները և որոշումները երկրորդական բնույթի են»: 

Նա նշեց, որ չի կարծում, թե Կարեն Կարապետյանի և Սերժ Սարգսյանի մեջ այսօր հակասություններ կան և կոչ արեց ինտրիգներ չփնտրել:

Նա նաև կոռեկտ չհամարեց համեմատությունը Սերժ Սարգսյանի և Կարեն Կարապետյանի միջև, բայց նշեց, թե փաստ է, որ Սերժ Սարգսյանի տրամաչափի, փորձառության գիտելիքներ ունեցող գործիչ մենք չունենք: Անդրադառնալով Վիգեն Սարգսյանի անվան շրջանառությանը՝ նա ասաց, որ ինքը ևս 5 անուն կարող է ավելացնել: 

«Վիգեն Սարգսյանը պաշտպանության նախարարն է, էֆեկտիվ աշխատում է և բանակը տանում է բարեփոխումների հունով: Պաշտպանության նախարարի պաշտոնն այնպիսինն է, որ նախարարը միշտ ուշադրության կենտրում է, և մարդիկ մտածում են, որ պաշտպանության նախարարը կարող է վարչապետ, նախագահ դառնալ»,-ասաց նա և նշեց, որ այդ փորձը ունեցել ենք:

Հարցին, թե կուլիսներում ի՞նչ քննարկումներ են ընթանում այդ թեմայի շուրջ՝ նա պատասխանեց, որ կուլիսներ ընդհանրապես չկան, և որոշման ընդունման մեխանիզմը հստակ է: