Գեղարքունիքի մարզում համապետական շաբաթօրյակին մասնակցել են 269 կազմակերպություն, 412 անհատ ձեռներեց

SOCIETY 29 July, 2017 18:10

Գեղարքունիքի մարզի բոլոր համայնքներում հուլիսի 29-ի առավոտյան ժամերից «Մաքուր Հայաստան» ծրագրի շրջանակներում նախօրոք հայտարարված համապետական շաբաթօրյակն ընթանում է պետական մարմինների, մասնավոր կազմակերպությունների եւ քաղաքացիների ակտիվ ներգրավվածությամբ:

Ինչպես «Արմենպրես»-ին տեղեկացրեց Գեղարքունիքի մարզպետի տեղակալ, «Մաքուր Հայաստան» ծրագրի իրականացման նպատակով մարզպետարանում ստեղծված սանիտարական մաքրման, բարեկարգման եւ կանաչապատման հանձնաժողովի նախագահ Կարեն Հակոբյանը, հուլիսի 29-ին հայտարարված համապետական շաբաթօրյակին նախօրոք մասնակցության հայտ են ներկայացրել 269 կազմակերպություն, 412 անհատ ձեռներեց, 212 միավոր տեխնիկա: Ընդհանուր հաշվարկով՝ շաբաթօրյակին մասնակցում է 7009 քաղաքացի:«Մաքրվում են բնակավայրերի թաղամասերը, բնակավայրերից դուրս գտնվող դաշտամիջյան ճանապարհներն ու տարածքները, Սեւանա լճի ափամերձ գոտիները, միջպետական, հանրապետական ու մարզային նշանակության ճանապարհների եզրերը, պատմամշակութային հուշարձանների տարածքները, բոլոր այն վայրերը, որտեղ թե տեսանելի, թե աչքից հեռու աղբ կա կուտակված: Շաբաթօրյակին մասնակցում են հանրակրթական դպրոցների ուսուցիչներ եւ աշակերտներ, պետական ու տեղական ինքնակառավարման մարմինների, այլ կազմակերպությունների աշխատակիցներ, ճանապարհաշինարարներ, անհատ քաղաքացիներ:Կուտակված աղբը բեռնվում ու տեղափոխվում է մոտակա աղբավայրեր, որտեղ իրականացվում են աղբաթաղման աշխատանքներ»,-ներկայացրեց Կարեն Հակոբյանը:

Աստղաձորի գյուղապետարանից ստացված տեղեկատվության համաձայն՝ համապետական շաբաթօրյակին մասնակցել են Աստղաձորի համայնքապետարանի ողջ անձնակազմը , «Աստղաձորի մշակույթի կենտրոն» ՀՈԱԿ, Աստղաձորի ԱԱՊԿ ՊՈԱԿ հիմնարկի աշխատակիցները: Շաբաթօրյակին իրենց մասնակցությունն են բերել ցուցաբել նաեւ համայնքի բնակիչները: Մաքրվել է համայնքով անցնող միջպետական ճանապարհի եզրերը , ներհամայնքային եւ միջհամայնքային ճանապարհները , վերացվել են մոտ 30 աղբակուտակման վայրեր: Հավաքվել է 185 պարկ աղբ:

Մարտունու քաղաքապետարանից ստացված տեղեկատվության համաձայն՝ քաղաքի բոլոր հիմնարկ-ձեռնարկությունների անձնակազմերը միացել են համապետական շաբաթօրյակին՝ ապահովելով ինչպես կենտրոնական, այնպես էլ՝ երկրորդային փողոցների մաքրման աշխատանքներ: Շաբաթօրյակին մասնակցել են 600 մարդ, 15 միավոր տեխնիկա:

Գեղարքունիքի մարզպետարանի գյուղատնտեսության եւ բնապահպանության վարչության պետ, «Մաքուր Հայաստան» ծրագրի իրականացման նպատակով մարզպետարանում ստեղծված սանիտարական մաքրման, բարեկարգման եւ կանաչապատման հանձնաժողովի անդամ, Սեւանի տարածքի պատասխանատու Համբարձում Համբարձումյանի հավաստմամբ՝ շաբաթօրյակն ակտիվ է անցել ինչպես Սեւան քաղաքում, այնպես էլ տարածքի բոլոր համայնքներում:

«Մաքրվում են Սեւանի թերակղզու տարածքը, Սեւանի ափամերձ հանգստյան գոտիները, ճանապարհաեզրերը, անտառային հատվածներում թաքցված աղբը: Բոլոր համայնքներում վաղ առավոտից եռուզեռ է նկատվում»,-ներկայացրեց Համբարձում Համբարձումյանը: Գեղարքունիքում ընթացող համապետական շաբաթօրյակի ընթացքը դրական են գնահատում նաեւ Գավառի տարածքի պատասխանատու, Գեղարքունիքի մարզպետի տեղակալ Անդրանիկ Հակոբյանը , Վարդենիսի տարածքի պատասխանատու, Գեղարքունիքի փոխմարզպետ Արտաշես Նիկոյանը, Ճամբարակի տարածքի պատասխանատու, Գեղարքունիքի մարզպետարանի աշխատակազմի ղեկավարի տեղակալ Ալբերտ Աղեկյանը, Մարտունու տարածքի պատասխանատու, Գեղարքունիքի մարզպետարանի աշխատակազմի ղեկավար Սեւակ Խլղաթյանը: