«Արի տուն»-ն արդեն 7-րդ անգամ է Հայաստանում համախմբում սփյուռքահայ պատանիներին եւ աղջիկներին

SOCIETY 31 July, 2017 14:29

ՀՀ սփյուռքի նախարարությունն արդեն 7-րդ անգամ հյուրընկալում է «Արի տուն» երիտասարդների հայրենաճանաչության ծրագրի մասնակիցներին աշխարհի 14 երկրներից՝ Լիբանանից, Ռուսաստանից, ԱՄՆ-ից, Քուվեյթից, Սիրիայից եւ այլն: 102 սփյուռքահայ պատանի եւ աղջիկ ժամանել են հայրենիք՝ ծանոթանալու Հայաստանի գեղատեսիլ վայրերին, ուսանելու հայոց լեզուն եւ պարզապես ընկերանալու աշխարհի տարբեր ծայրերից եկած հայրենակիցների հետ:

ՀՀ սփյուռքի փոխնախարար Սերժ Սրապիոնյանը ողջունեց ծրագրի մասնակիցներին եւ մաղթեց նրանց բարի երթ:

«Հայաստանում դուք կհյուրընկալվեք ջերմ ընտանիքներում, կծանոթանաք մեր առօրյային, երբեմնի տեսարժան վայրերին, որոնք պարզապես զբոսաշրջային վայրեր չեն, այլ ձեր պատմությունն են, ձեր ինքնության վկայությունը: Շատ բաներ ունեք ձեզ հետ տանելու այստեղից: Մեր գրողներն այստեղ ստեղծագործում էին, գրում պանդուխտին առ Հայաստան բերելու միտումով, իհարկե մենք ձեզ պանդուխտ չենք համարում, դուք մեր հավատարիմ հայրենակիցներն եք, որ մի օր բռնելու եք տունդարձի ճանապարհը»,-«Արմենպրես»-ի հաղորդմամբ՝ ասաց փոխնախարարը՝ ծրագրի ամենափոքր մասնակցին՝ Լիբանանից ժամանած 13-ամյա Հովիկ Շավուշյանին հանձնելով ավանդական շապիկն ու գլխարկը:

16-ամյա Արեն Գաբուզյանը ժամանել է Ռուսաստանից, առաջին անգամ է ծրագրին մասնակցում, սակայն մշտապես այցելել է Հայաստան: Նրա կարծիքով՝ ծրագիրը, նախեւառաջ, յուրահատուկ հարթակ է տարբեր երկրներից ժամանած հայրենակիցների հետ ծանոթանալու, նրանց ավելի լավ ճանաչելու համար:

«Հայաստանում եղել եմ Տաթեւի վանքում, Գառնիի տաճարում, սակայն դեռ շատ վայրեր ունեմ այցելելու»,- ասաց նա:

Հարցին, թե ի՞նչ զգացողություններ ունի հայրենիքում, նա պատասխանեց՝ այստեղ ուղղակի լավ է:

18-ամյա Արմիկ Հեքիմյանը ծնվել եւ ապրում է Լիբանանում: Նա իր այցը խորհրդանշական է համարում, քանի որ առաջին անգամ է հայրենիքում:

«Շատ լավ զգացողություններ ունեմ այստեղ, մեծ ակնկալիքներով եմ եկել, որ մի շարք տեղերում կլինեմ, կճանաչեմ Հայաստանը, ձեռք կբերեմ նոր ընկերներ: Մի քանի օր է, ինչ այստեղ եմ, եւ կարող եմ ասել, որ հատկապես շատ եմ սիրել այստեղի կյանքը, կցանկանայի հետագայում ուսումս շարունակել Հայաստանում»,- ասաց Արմիկը:

Երիտասարդներն «Արի տուն» ծրագրով կարող են հյուրընկալվել բարեկամների տանը, իսկ դրանց բացակայության դեպքում՝ Երևան քաղաքի վարչական շրջանների, ՀՀ մարզպետարանների և ՀՀ սփյուռքի նախարարության կողմից ընտրված ընտանիքներում: Երիտասարդներն ընտանիքներում հյուրընկալվում են անհատույց: Ծրագրին մասնակցության համար խմբերի և անհատների հավաքագրումը և Հայաստան այցելության գործընթացն իրականացվում է Սփյուռքի համայնքային կառույցների, կրթօջախների, հայկական կազմակերպությունների կողմից` տվյալ երկրում ՀՀ դիվանագիտական ներկայացուցչությունների աջակցությամբ: Ծրագրին մասնակցելու համար կարող են դիմել նաև անհատապես՝ տեղեկացնելով համապատասխան համայնքային կառույցին: Հայաստան այցելող երիտասարդներն իրենց ճանապարհածախսը հոգում են սեփական կամ հովանավորների միջոցներով:

«Արի տուն» ծրագրի շրջանակում ՀՀ սփյուռքի նախարարությունն ապահովում է երիտասարդների դիմավորումը և ճանապարհումը, կազմակերպում է հայոց լեզվի դասընթացներ, այցելություններ թանգարաններ, շրջայցեր Հայաստանի տեսարժան վայրերով: Ճամբարային փուլում իրականացվում են նաև ուսուցողական ծրագրեր` հայոց լեզվի, հայրենագիտության, ազգային երգի ու պարի դասընթացներ: Կազմակերպվում են հանդիպումներ Հայաստանի պետական, հասարակական, մշակութային գործիչների հետ և այլն: Պտույտների ժամանակ անվտանգությունն ապահովելու նպատակով նրանց ուղեկցում են բժիշկը և ոստիկանական անձնակազմը: