Օրենքով սպաներին 21-րդ տարում ևս որոշ արտոնություն հասնում է, ուղղակի գործնականում չի կիրառվում. ՀՀ ԶՈւ նախկին սպան ճշգրտում է «Ելքի» նախագիծը

«Գույքահարկի մասին» գործող օրենքով պարտադիր զինվորական ծառայության մեջ գտնվող ՀՀ Զինված ուժերի սպաներին 21-րդ տարում ևս արտոնություն է տրվում, սակայն արդեն սահմանափակումներով.  մեկնաբանելով Ելք» խմբակցության կողմից շրջանառության մեջ դրված «Գույքահարկի մասին» օրենքի նախագիծը Tert.am-ի հետ զրույցում ասաց ՀՀ Զինված ուժերի նախկին սպա, ով չցանկացավ ներկայանալ:  

«Եթե մինչև 20 տարին լրանալը մեքենաների քանակի և շարժիչի հզորության սահմանափակում չկա, ապա 20 տարին լրանալուց հետո սահմանափակում է դրվում, որ անձը ազատվում է գույքահարկից միայն 1 մեքենայի համար և մինչև 150 ձիաուժ հզորության հաշվարկով»,-օրենքին հղում կատարելով ասաց նա: 

Հիշեցնենք, որ «Ելք» խմբակցության կողմից շրջանառության մեջ դրված նախագծերից մեկը վերաբերում է «Գույքահարկի մասին» օրենքով ՀՀ  Զինված ուժերի սպաների համար արտոնություններին: Ըստ «Ելք» խմբակցության ղեկավար Նիկոլ Փաշինյանի հակիրճ բացատրության՝ ՀՀ Զինված ուժերի սպաները, մինչև ծառայության 20-րդ տարին ազատված են գույքահարկից, իսկ 21-րդ տարում արդեն զրկվում են այդ արտոնությունից։ «Նախագծով առաջարկում ենք գույքահարկից ազատման արտոնությունը սպաների համար պահպանել ողջ ծառայության ընթացքում, ինչպես նաև նման արտոնություն տալ զինվորական ծառայության մեջ գտնվող բոլոր անձանց, այդ թվում՝ պայմանագրայիններին»,-գրել էր նա։

Նշենք, որ ըստ օրենքի՝ պարտադիր ժամկետային ծառայության ժամկետի ավարտից հետո, գույքահարկից ազատվում են նաև Հայաստանի Հանրապետության զինված ուժերում և այլ զորքերում ծառայություն անցած` ռազմաուսումնական հաստատություններն ավարտած անձինք` հասարակական և (կամ) արտադրական նշանակության շինություն չհանդիսացող մեկ շինության մասով, որի հարկման բազան չի գերազանցում 40.0 մլն դրամը և մեկ փոխադրամիջոցի մասով, որի հարկման բազան չի գերազանցում 150 ձիաուժը:

ՀՀ Զինված ուժերի նախկին սպայի խոսքով՝ խնդիրն այլ տեղ է, որ արտոնություններ սահմանված են, բայց գործնականում չեն կիրառվում: «Այսինքն՝ քանի դեռ 20 տարին չի լրացել ամեն ինչ հստակ գործում է պարտադիր ծառայության մեջ գտնվող սպաների համար,  խնդիրն առաջանում է արդեն 20 տարին լրանալուց հետո»,-ասաց նա և բացատրեց, թե պատճառն ինչումն է:

«Օրինակ` տվյալ դեպքում քաղաքապետարանից պահանջում են տեղեկանք ավտոտեսչությունից, թե քանի մեքենա ունի անձն իր անունով գրանցված: Իսկ տվյալ տեղեկանքը վերցնելը արժե 4300 դրամ: Օրինակի համար ասեմ ձեզ, որ իմ մեքենայի գույքահարկը 6000 դրամ է, որից ըստ օրենքի ես պետք է ազատվեմ, քանի որ ռազմաուսումնական հաստատություն եմ ավարտել, ծառայել եմ զինված ուժերում 20 տարուց ավելի և մինչև 150 ձիաուժ մեկ մեքենայի համար պետք է ազատվեմ: Սակայն իմ օրինական իրավունքից չեմ կարող օգտվել, քանի որ եթե ես պետք է 4300 դրամ մուծեմ պետավտոտեսչությունում տեղեկանքի համար, մի 2000 դրամ էլ ծախսեմ մեքենաս այս ու այն կողմ քշելու համար, դառնում է, որ օրենքով ես ունեմ արտոնություն, սակայն իրականում չունեմ»,-ասաց նա:

Ի դեպ, ԶՈւ սպան հստակեցրեց, որ ՀՀ գույքահարկի մասին օրենքում արտոնություն է սահմանված պարտադիր ժամկետային ծառայության մեջ գտնվող զինծառայողներին՝ անկախ նրանց կոչումից և պաշտոնից:  «ՀՀ զինծառայության մասին օրենքով պարտադիր զինվորական ծառայություն է համարվում պարտադիր զորակոչվածները և ռազմաուսումնական հաստատություն ավարտած զինծառայողների հետուսումնական ծառայությունը: Այսինքն, եթե սպան, ենթասպան, սերժանտը կամ շարքայինը պայմանագրային հիմունքով են ծառայում, ապա նրանք այդ արտոնությունից չեն կարող օգտվել: Հետևաբար, ըստ օրենքի՝ տվյալ արտոնությունից օգտվում են միայն ռազմաուսումնական հաստատություն ավարտած սպաները և կարող են օգտվել ժամկետային ծառայության զինծառայողները: Մինչդեռ ժամկետային ծառայության զինծառայողները իրականում չեն օգտվում, քանի որ անտեղյակ են դրանից»,-ասաց նա և ողջունեց առաջարկը, որ պետք է արտոնություն տալ զինվորական ծառայության մեջ գտնվող բոլոր անձանց, այդ թվում նաև պայմանագրայիններին: