«Բռնապետի փողերը չպետք է ազդեն մեր ժողովրդավարական որոշումների վրա». գերմանացի պատգամավոր

Ադրբեջանի իշխանությունների կողմից եվրոպացի պաշտոնյաներին կաշառելու հետքերը տանում են նաև Գերմանիա: Այս առնչությամբ գերմանական հայտնի Deutshe Welle թերթն անցկացրել է սեփական հետաքննություն:

Ըստ հրապարակված տեղեկությունների, սկանդալի կենտրոնում է հայտնվել մասնավորապես Բունդեսթագի նախկին պատգամավոր Էդուարդ Լինթները, ով գումար է ստացել Ադրբեջանի իշխանություններից՝ նրանց շահերը Եվրոպայում առաջ տանելու համար: Լինթները Բունդեսթագի նախկին պատգամավոր է, ով 2003–2010 թթ. Գերմանիան ներկայացրել է ԵԽԽՎ–ում: 2012–2014 թթ. նրա բանկային հաշվին բրիտանական կեղծ (ֆիկտիվ) ընկերություններից փոխանցվել է 891000 եվրո:

Deutshe Welle–ի հարցմանն ի պատասխան՝ Լինթները հաստատել է, որ Ադրբեջանից գումարներ է ստացել: Նա պատմել է, որ իր գլխավորած Գերմանա–ադրբեջանական հարաբերությունների զարգացման ընկերությունն ստեղծվել է Բաքվում գործող ոչ առևտրային կազմակերպության կողմից, որն իր հերթին ֆինանսավորվել է այդ երկրի կառավարության կողմից: «Ես ու իմ աշխատակիցները ֆինանսական առումով որևէ կասկածելի բան չենք նկատել: Իսկ մեր ընկերության գլխավոր խնդիրներից մեկը եղել է ԼՂ հակամարտության կարգավորմանն օժանդակելու նպատակով խորհրդարանական ու քաղաքական ցանկացած նախաձեռնությանը նպաստելը»,– գերմանական պարբերականին պատմել է Լինթները:

Նա նաև հայտնել է, որ համատեղ աշխատանքի շրջանակներում իր «ադրբեջանցի գործընկերները» իրեն խնդրել են պատվիրակության կազմ հավաքել 2013 թ. և 2015 թ. նախագահական և խորհրդարանական ընտրությունների ընթացքը դիտարկելու համար: Ի դեպ, այդ դիտորդական առաքելության արդյունքում Լինթները նշել էր, որ Ադրբեջանում ընտրությունները կայացել են ժողովրդավարական նորմերի համաձայն և «համապատասխանել են այնպիսի չափանիշների, որոնք գործում են, օրինակ, Գերմանիայում»: Ու դա այն դեպքում, երբ ԵԱՀԿ–ն իր զեկույցում նշել էր, որ «ընտրությունների ընթացքի վրա բացասաբար են ազդել ազատ խոսքի, հավաքների սահմանափակումները, ինչը բոլոր թեկնածուների համար չի ապահովել խաղի հավասար կանոններ»:

Գերմանացի նախկին պատգամավորի վերաբերյալ բացահայտումները քննադատության մեծ ալիք են առաջացրել Գերմանիայում: Եվրախորհրդարանի պատգամավոր և «Կանաչների» ներկայացուցիչ Սվեն Գիգոլդը երկրի Մաքսային ծառայությանը կոչ է արել վերահսկել Ադրբեջանի իշխանությունների կողմից գումարների փոխանցումը Լինթների հիմնադրած Գերմանա–ադրբեջանական հարաբերությունների զարգացման ընկերության հաշվեհամարներին: «Բռնապետի փողերը չպետք է ազդեն մեր ժողովրդավարական որոշումների վրա»,– ասել է նա՝ նկատի ունենալով Իլհամ Ալիևին:

Իսկ հիմա մի փոքր Ադրբեջանի արձագանքի մասին: Այս բացահայտումներին Բաքվի արձագանքը խիստ բուռն է: Ընդ որում, ըստ ադրբեջանցի պաշտոնյաների, դրանց հետևում կանգնած է ամերիկացի հայտնի միլիարդատեր Ջորջ Սորոսը և հայկական սփյուռքը՝ հենց նրանք են վճարել այդ «մտացածին» հոդվածների ու բացահայտումների համար:

Երեկ էլ ադրբեջանական կայքերից մեկը վարկած էր առաջ քաշել, թե իբր այդ ամենն արվել է Եվրոպայում Ադրբեջանի վարկը նվազեցնելու և «Հարավային գազային միջանցք» ծրագրի ապագան հարցականի տակ դնելու համար: Բայց Ադրբեջանում կատվի նման մեջքի վրա ընկնել չեն սիրում: Ու իրենց պատկերացումներով հակահարված են տվել այդ հրապարակումներին՝ նշելով, որ Հարավային գազային միջանցքն ավելի շատ պետք է Եվրոպային, քան թե Ադրբեջանին: Ուստի թող իրենք էլ մտածեն:

Բայց Եվրոպայում այլ բան են մտածում: Մեծ Բրիտանիայի ընդդիմությունը վարչապետ Թերեզա Մեյին հորդորել է հետաքննություն սկսել՝ կապված Ադրբեջանի իշխանությունների կողմից փողերի լվացման գործի ու դրանում բրիտանական ընկերությունների ունեցած ներգրավվածության մասին: Ի պատասխան Մեյի խոսնակը նշել է, որ Հանցագործությունների ազգային գործակալությունը կուսումնասիրի լրատվամիջոցների հրապարակած տեղեկությունները և ըստ այդմ որոշում կկայացնի: