Սահակաշվիլին կաթվածի է հասցնում Կիևին

Վրաստանի էքս–նախագահ, ուկրաինական Մայդանի ակտիվիստ, Օդեսայի նախկին նահանգապետ, անձամբ նախագահ Պյոտր Պորոշենկոյի կողմից քաղաքացիություն ստացած ու նրա կողմից էլ քաղաքացիությունից զրկված Միխեիլ Սահակաշվիլին սեպտեմբերի 10–ին իսկական մուկնուկատու խաղաց Կիևի հետ: Մի քանի օր առաջ նա հայտարարել էր, որ պատրաստվում է Ուկրաինա մտնել լեհական Կրակովեց անցակետից, բայց հանկարծ նստեց Պերեմիշլ քաղաքից Կիև ուղևորվող արագընթաց գնացքը և որոշեց ճանապարհի գեղեցկությամբ զմայլվելով հասնել Կիև:

Նրա այդ ձեռնարկը, սակայն, խափանվեց այն պատճառով, որ Ուկրաինական երկաթուղու ղեկավարությունն ուղղակի արգելեց Պերմիշլ–Կիև գնացքի ուղևորափոխադրումը, ինչի առնչությամբ նախկին վարչապետ, այժմ Բատկիվշինա կուսակցության նախագահ Յուլիա Տիմոշենկոն, որն ուղեկցում էր Սահակաշվիլուն, հայտարարեց, որ «Պորոշենկոն փաստացի գերի է վերցրել գնացքի ուղևորներին»:

Դրանից հետո Սահակաշվիլին կրկին հայտարարեց նախնական պլանին վերադառնալու մտադրության մասին, բայց շփոթեցնելով տեղի սահմանապահներին, որոնք հայտարարել էին, թե թույլ չեն տա, որ Սահակաշվիլին սահման հատի, փոխեց ուղղությունը և հասնելով Շեգինի անցակետ՝ իր անունը վանկարկող և ամուր պատ կազմած ամբոխի ուղեկցությամբ մտավ Ուկրաինա: Ավելի ուշ նա ուղեկիցների հետ միասին մեկնեց Լվով, որտեղ ի սարսափ իշխանությունների՝ հանրությունը նրան դիմավորեց ծափահարություններով ու քաջալերանքի տարբեր վանկարկումներով:

Միևնույն ժամանակ Ուկրաինայի իրավապահ մարմինները հանդես եկան ամենատարբեր հայտարարությամբ: Նախ՝ գլխավոր դատախազ Յուրի Լուցենկոն խոստացավ, որ բոլոր նրանք, ովքեր օգնել են Սահակաշվիլուն՝ սահմանն ապօրինի հատելու և իրավապահներին մարմնական վնասվածքներ հասցնելու գործին, խստորեն կպատժվեն: Ապա նաև ՆԳ նախարար Արսեն Ավագովը հայտարարեց, թե Սահակաշվիլին այժմ գործելու երկու տարբերակ ունի միայն՝ կամ վերադառնալ Շեգինի անցակետ և օրենքի համաձայն երկիր մուտք գործելու արտոնություն ստանա, կամ՝ իբրև փախստական, անցնել Միգրացիոն ծառայություն և սպասել գործի քննությանը: Ընդ որում, Ավագովը նույնպես շանթ ու որոտ տեղաց Սահակաշվիլուն օգնած անձանց հասցեին՝ վերջիններիս առաջարկելով արդեն իսկ կազմված քրեական գործի տիրույթում ինքնակամ այցելել ոստիկանություն: Իսկ որ ամենակարևորն է՝ Ավագովն անկարկեց, որ Կիևը պատրաստվում է կատարել բարեկամ երկրի պահանջը և Սահակաշվիլուն Վրաստանին արտահանձնել: 

Ի պատասխան՝ Սահակաշվիլու փաստաբանը հայտարարեց, թե ոչ ոք չի կարող իր պաշտպանյալի նկատմամբ բռնի գործողություններ իրականացրել, քանի որ, իբրև որևէ այլ երկրի քաղաքացիություն չունեցող անձ, նա հավելյալ պաշտպանության տակ է գտնվում նաև միջազգային իրավունքի տեսանկյունից: Բայց էլ հակադարձում ստացավ վարչապետ Գրոյսմանի կողմից, որը Սահակաշվիլու անօրինական քայլը գնահատեց իբրև Ուկրաինայի պետականության վրա արված հարձակում:

Ինչպես կլուծվի խնդիրը, և ինչպես կարձագանքի աշխարհը կատարվածին՝ դեռ պարզ չէ, բայց փաստ է, որ Սահակաշվիլին ի վիճակի է առանց այդ էլ երերացող իշխանությունների համար գլորման վեմ դառնալ՝ նույնիսկ իր անձով չպայմանավորված պատճառներով նոր Մայդան կամ՝ իշխանափոխություն հրահրելով:

Էջը պատրաստեց Գոհար Սիմոնյանը