Վարդենիս քաղաքում շուքով նշվեց Հայաստանի Հանրապետության Անկախության տոնը

Սեպտեմբերի 20-ին Գեղարքունիքի մարզի Վարդենիս քաղաքում շուքով նշվեց Հայաստանի Հանրապետության Անկախության հռչակման 26-րդ տարեդարձը: «Արմենպրես»-ի տեղեկացմամբ՝ միջոցառմանը մասնակցում էին Գեղարքունիքի մարզպետ Կարեն Բոթոյանը, ՀՀ ԱԺ պատգամավորներ Ռաֆիկ Գրիգորյանը եւ Հրանտ Մադաթյանը, ՀՀ ԶՈւ բանակային երկրորդ կորպուսի հրամանատար, գնդապետ Դավիթ Մանուկյանը, մարզի իրավապահ մարմինների եւ համայնքների ղեկավարներ, պետական կառավարման եւ տեղական ինքնակառավարման մարմինների , կրթամշակութային հաստատությունների ներկայացուցիչներ, դպրոցականներ, հյուրեր:

Միջոցառման մասնակիցները մարզպետ Կարեն Բոթոյանի գլխավորությամբ նախ ծաղիկներ խոնարհեցին Մեծ Հայրենականում եւ Արցախյան հերոսամարտում իրենց կյանքը նվիրաբերած վարդենիսցի քաջորդիների հիշատակը հավերժացնող հուշարձաններին, ապա Վարդենիսի Սուրբ Աստվածածին եկեղեցում մասնակցեցին Հանրապետական Մաղթանքի արարողությանը, որն անցկացվեց Գեղարքունյաց թեմի առաջնորդական տեղապահ Կիրակոս վարդապետ Դավթյանի ղեկավարությամբ եւ հոգեւոր դասի մասնակցությամբ:

«Թող ամուր մնան մեր երկրի սահմանները, երկինքը՝ խաղաղ: Մաղթում եմ, որ մեր զինվորներն անփորձանք ավարտեն իրենց ծառայությունը, որ մեր հայրենիքը ծաղկի ու զորանան մեր ժողովրդի ստեղծագործ մտքով ու ուժով»,-իր առաջնորդական մաղթանքը հղեց Կիրակոս վարդապետ Դավթյանը:

Պետական այրերն այնուհետ ընդունեցին տոնական շքերթը. քաղաքի կենտրոնական փողոցով հանդիսավոր երթով անցան Վարդենիսի եւ հարակից համայնքների դպրոցականները եւ ՀՀ ԶՈՒ բանակային երկրորդ կորպուսի զինծառայողները: Միջոցառման մասնակիցները օգտվեցին բանակային բացազատված դաշտային խոհանոցից, դիտեցին ՀՀ ԱԻՆ փրկարար ծառայության Գեղարքունիքի մարզային վարչության ստորաբաժանման փրկարարների ցուցադրական ելույթները, ինչպես նաեւ՝ Վարդենիս քաղաքի ստեղծագործական կենտրոնների սաների քանդակագործական, գեղանկարչական, ձեռագործ եւ այլ բնույթի աշխատանքները, որոնք նվիրված էին ՀՀ Անկախության 26-րդ տարեդարձին:

«Հայաստանի Անկախությունն արժևորվում է այնքանով, որքանով որ հայ ժողովուրդը դարեր շարունակ զուրկ է եղել պետականությունից: Մեր սերունդը երջանիկ է, քանի որ ձեռք է բերել դարերով երազած այդ անկախությունը: Մենք այսօր հպարտ ենք, որ ունենք Հայոց Եռագույնը, ՀՀ Զինանշանը եւ պետական Օրհներգը: Սրանք անփոխարինելի արժեքներ են, որը մենք պարտավոր ենք պահպանել եւ փոխանցել գալիք սերունդներին»- իր շնորհավորանքի խոսքում նշեց Գեղարքունիքի մարզպետ Կարեն Բոթոյանը:

Տոնակատարությունը եզրափակվեց հայկական էստրադայի աստղերի ներկայացրած համերգային ծրագրով:

Գեղարքունիքի մարզպետարանի կրթության, մշակույթի եւ սպորտի վարչության պետ Գարիկ բադալյանի հավաստմամբ՝ Հայաստանի Հանրապետության Անկախության տոնին նվիրված միջոցառումները սեպտեմբերի 21-ին կշարունակվեն Գեղարքունիքի մարզի մնացած քաղաքներում ու գյուղերում, կրթամշակութային հաստատություններում:

Խոսրով Խլղաթյան