Ով–ով, բայց գոնե Թուրքիան չպիտի խոսի օկուպացիայից, օրը ցերեկով օկուպացրեց ԵՄ անդամ երկրի՝ Կիպրոսի 38 տոկոսը. Էդուարդ Շարմազանով

Թուրքիային պաշտպանության նախարարի հայտարարությունները նորություն չեն, ևս մեկ անգամ ապացուցեց, որ Թուրքիան անելիք չունի Արցախի հակամարտության կարգավորման հարցում: Այսօր ՀՀԿ ԳՄ նիստից հետո նման հայտարարություն արեց ՀՀԿ խոսնակ, ԱԺ փոխնախագահ Էդուարդ Շարմազանովն՝ անդրադառնալով Թուրքիայի պաշտպանության նախարար Նուրեթթին Ջանիքլին հայտարարությանը, թե Թուրքիայի և Ադրբեջանի Զինված ուժերը միասնական են և անհրաժեշտության դեպքում պատրաստ են ամեն կերպ աջակցել միմյանց: 

«Թուրքիան չի կարող ներգրաված լինել Արցախի հանրապետության կարգավորման հարցում, որովհետև Թուրքիան հստակ ադրբեջանամետ  դիրքորոշում ունի, ինչպես նաև թե՛ ռազմական, թե՛ քաղաքական, թե ՛ տնտեսական օժանդակություն է ցույց տվել Ադրբեջանին և այլն։ Թուրքիան այն պետություն է, որն սատարել է Ադրբեջանի հանցագործ քաղաքականությունն Ապրիլյան պատերազմի ժամանակ: Նման հայտարարությամբ Թուրքիայի ՊՆ ևս մեկ անգամ ապացուցում է, որ Ադրբեջանը ոչ այլ ինչ է, քան թուրքական հանրապետությունը և քարտեզի վրա առաջացել է 1918 թվականի մայիսի 27 –ին` թուրք Նուրի փաշայի զինվորական ինտերվենցիայի արդյունքում»,- շարունակեց Էդուարդ Շարմազանովը:

Ինչ վերաբերում է Թուրքայի ՊՆ նախարարի  հայտարարության այն հատվածին, թե, անպայման, պետք է ազատագրել «օկուպացված» Ղարաբաղը, ԱԺ փոխնախագահն ասաց. «Ղարաբաղում չկան օկուպացված տարածքներ, Ադրբեջանն է օկուպացրել Արցախի տարածքները, իսկ Թուրքիան բոլորի աչքի առաջ օրը ցերեկով օկուպացրեց ԵՄ անդամ երկրի՝ Կիպրոսի 38 տոկոսը, ով-ով, բայց գոնե Թուրքիան չպիտի խոսի օկուպացիայից»,-եզրափակեց Էդուարդ Շարմազանովը:

Հիշեցնենք, որ Բաքվում գտնվող Թուրքիայի պաշտպանության նախարար Նուրեթթին Ջանիքլին հայտարարել է, թե Թուրքիայի և Ադրբեջանի Զինված ուժերը միասնական են և անհրաժեշտության դեպքում պատրաստ են ամեն կերպ աջակցել միմյանց։

Իսկ ՀՀ արտաքին գործերի նախարարի տեղակալ Շավարշ Քոչարյանը հայտարարել է, որ Թուրքիան շարունակում է միջամտել Լեռնային Ղարաբաղի հիմնախնդրի հարցում, ինչն էլ թույլ չի տալիս կարգավորման գործընթացում առաջընթաց արձանագրել։