«Վակ քոնսալթինգ»–ը կենսաօրգանական թափոնների ոչնչացման համալիր կստեղծի

Հոկտեմբերի 11–ին տեղի կունենան «Վակ քոնսալթինգ» ՍՊԸ–ի կողմից ներկայացված կենսաօրգանական (սպանդայրին) և այլ օրգանական թափոնների ոչնչացման համալիրի վերաբերյալ հանրային քննարկումները:

2014 թ.–ից ընկերության մասնագետները ուսումնասիրություններ են իրականացրել գյուղատնտեսական և անասնաբուծական տնտեսություններում, հիվանդանոցներում, բժշկական կենտրոններում, որի նպատակն էր պարզել առաջացող օրգանական թափոնների ծավալները, դրանց մոտավոր կազմը և հատկությունները, դրանք հավաքելու և ջերմային եղանակով վնասազերծելու ու ոչնչացնելու համար:

Կատարած հետազոտությունների արդյունքում 2016 թ. ընկերության ղեկավարությունը որոշում է կայացրել հիմնել կենսաօրգանական թափոնների ջերմային վնասազերծման համալիր: 

Հաշվի առնելով նախկին փորձը, համալիրի հիմնական տեղադրման վայր ընտրվել է ԳՆ Սննդամթերքի անվտանգության պետական ծառայության «Սննդամթերքի անվտանգության ոլորտի ռիսկերի գնահատման և վերլուծության գիտական կենտրոն»–ի տարածքը՝ վարձակալական հիմունքներով:

Ընկերությունն այս վայրն ընտրել է հաշվի առնելով այն հանգամանքը, որ կենտրոնում անցյալ դարի 80–ական թվականներին գործել է կիզարան: Ներկայում այդ կիզարանը չի շահագործվում, սակայն վառարանները և հիմնական ծխատար խողովակները պահպանվել են:

«Վակ քոնսալթինգ»–ը վարձակալել է օրգանական թափոնների ոչնչացման համալիր և դրա միջոցով նախատեսում է իրականացնել կենսաօրգանական, կլինիկական և նմանատիպ այլ թափոնների վնասազերծում: Գործունեության առաջին փուլում կօգտագործվի միայն նշված համալիրը, սակայն հետագա ուսումնասիրությունների արդյունքում հնարավոր կլինի վերագործակցել ՍԱՈՌԳՎԳ կենտրոնի կիզարանը: Ըստ նախագծի՝ գործունեության հիմնական պատվիրատուներն են լինելու սպանդանոցները, խոշոր անասնապահական տնտեսությունները և մսամթերք արտադրող կազմակերպությունները, հիվանդանոցները և բժշկական կենտրոնները, գյուղմթերք վերամշակող կազմակերպությունները, օրգանական նյութեր օգտագործող կամ արտադրող ձեռնարկությունները:

Այս ամենի համար ընտրվել է ИУ–300М մակնիշի ջերմային վնասազերծման համալիր, որը կարող է օգտագործվել ինչպես ստացիոնար պայմաններում, այնպես էլ՝ տեղափոխվել պատվերների վայր: Համալիրի շահագործման հիմնական վայրը կլինի ՍԱՈՌԳՎԳԿ տարածքը, ուր կընդունվեն թափոնները և կիրականացվի դրանց ջերմային վնասազերծումը:

Նախագծից տեղեկանում ենք, որ ՍԱՈՌԳՎԳԿ տարածքում կան բազմաթիվ փակ շինություններ, բետոնապատ հատակներով, որտեղ կարելի է ժամանակավորապես պահեստավորել թափոնները: Հետագայում նույնպես հիմնական գործունեությունը կծավալվի ստացիոնար պայմաններում, քանի որ հիմնական պատվիրատուները կլինեն խոշոր ձեռնարկությունները: Միևնույն ժամանակ, այլ վայրերից բավականաչափ մեծ պատվերների դեպքում կիրականացվի համալիրի տեղափոխում պատվերների վայր, կընտրվի բոլոր նախնական բնապահպանական և անվտանգության պայմաններին համապատասխանող տեղամաս, կտեղադրվի համալիրը և կվնասազերծվեն բոլոր կուտակված թափոնները:

Նշենք, որ համալիրի ժամային արտադրողականությունը կկազմի 70 կգ, մեկ բեռնումը՝ 300 կգ, վնասազերծման մեկ ցիկլը՝ 4 ժամ: Օրական առավելագույն արտադրողականությունը կկազմի 600 կգ՝ 2 բեռնում: Համալիրը կաշխատի շաբաթական 5 օր, 11 ամիս տարեկան, քանի որ 1 ամիս կպահանջվի համալիրի ընթացիկ և պրոֆիլակտիկ վերանորոգման համար: Լիարժեք ծանրաբեռնվածության դեպքում տարեկան առավելագույն արտադրողականությունը կկազմի 132 տ:

Ըստ նախագծի հեղինակների՝ օրգանական թափոնների բարձր ջերմաստիճանային այրումից առաջացած մնացորդները սանիտարահիգիենիկ տեսակետից անվտանգ են լինելու: Բացի այդ մինչև համալիրի թողարկումը նախատեսվում է մշակել թափոնի անձնագիր, համաձայնեցնել այն Բնապահպանության նախարարության հետ և թափոնի տեղադրումը իրականացնել ըստ այդ անձնագրի: