Քրդերը կոնկրետ պատասխան են սպասում ԱՄՆ–ից

Սպիտակ տան պաշտոնական կայքէջում սեպտեմբերի 30–ին բաց խնդրագիր է հրապարակվել՝ (petitions.whitehouse.gov) իրաքյան Քուրդիստանի անկախությանն օժանդակելու նպատակով: «Բոլոր արդարամիտ մարդիկ վրդովված են այն բանից, որ անկախությանն ուղղված՝ քրդերի օրինական, դեմոկրատական և խաղաղ ձգտումներն Իրաքի, Իրանի և Թուրքիայի կառավարությունների կողմից ընդունվում են ուժի չարաշահմամբ, սպառնալիքներով և ծաղրուծանակի մարտավարությամբ»,–ասված է խնդրագրում, որի հեղինակները մտադիր են 100000 ստորագրությունների միջոցով ամերիկյան կառավարության ուշադրությունը հրավիրել խնդրո առարկայի վրա: Խնդրագիրն, այսպիսով, ԱՄՆ կառավարությունից պահանջում է.

• Միանշանակ պաշտպանել քուրդ ժողովրդին Իրաքում,

• Դեմ կանգնել ցանկացած սպառնալիքներին, ուժի կիրառմանը, շրջափակմանը, տեղաշարժման սահմանափակմանը և քրդերին ահաբեկելու փորձերին:
• Հնարավոր բոլոր եղանակներով օժանդակել ազատ, անկախ և սուվերեն Քուրդիստանի խաղաղ կազմավորմանը:

Հետաքրքիր է, որ այս ձեռնարկը հաջորդեց նախորդ օրը պետքարտուղար Ռեքս Թիլերսոնի ելույթին, որում հետևյալն էր ասվել. «Նահանգները չեն ճանաչում միակողմանի հանրաքվեն: Քվեարկությունը և դրա արդյունքները լեգիտիմ չեն: Մենք շարունակում ենք պաշտպանել միասնական, դաշնային, ժողովրդավար և բարգավաճող Իրաքին»: Պետքարտուղարը Բաղդադին ու Էրբիլին կոչ էր արել նաև զերծ մնալ ուժի կիրառումից, խնդիրը լուծել երկխոսությամբ և բոլոր ջանքերը կենտրոնացնել ԴԱԻՇ–ի դեմ պայքարի վրա, ինչը, պարզվում է, շփոթեցրել է քրդերին: Kurdistan24 TV–ի փոխանացմամբ՝ Ինքնավարության նախագահ Մասուդ Բարզանիի մամլո խոսնակը հոկտեմբերի 1–ին հրապարակել է ԱՄՆ–ին ուղղված քրդական պաշտոնական պատասխանը՝ կոչ անելով հարգել քուրդ ժողովրդի օրինական իրավունքը: «Քուրդիստանի ժողովուրդը, որ հատկապես Սադդամ Հուսեյնի, այնուհետ՝ ԴԱԻՇ–ի դեմ պայքարում, հետևողականորեն և էնտուզիազմով պաշտպանեց Նահանգներին, խորապես հիասթափված է պետքարտուղար Թիլերսոնի հայտարարությունից: Բոլոր երկրներից ամենաշատը ԱՄՆ–ն պիտի գնահատեր և հարգեր քրդերի անկախության որոշումը, որ ձևավորվել է սեպտեմբերի 25–ին անցկացված ազատ, թափանցիկ և խաղաղ հանրաքվեում... չնայած նրան, որ մենք բարձր ենք գնահատում ԱՄՆ–ի կոչը՝ հանրաքվեից հետո բռնություններ չգործադրելու վերաբերյալ, ստիպված ենք ամրագրել, որ ո՛չ Նահանգները, ո՛չ էլ մեկ այլ երկիր ոչինչ չարին քրդերի նկատմամբ 2005–ից շարունակվող՝ Բաղդադի հակասահմանադրական և անօրինական վերաբերմունքը կանխելու համար»,– ասված է Բարզանիի գրասենյակից տարածված հայտարարության մեջ, որում նաև հույս է հայտնվում, որ ԱՄՆ–ն կփոխի իր դիրքորոշումը՝ մասնակցելով Էրբիլ–Բաղդադ երկխոսությանը: Ի դեպ, չնայած Բաղդադի մերժումին՝ խաղաղ բանակցությունների որոշումը կայացվել է քրդական Բարձրագույն քաղաքական խորհրդի ձևափոխված Հանրաքվեի կոմիտեի կողմից: Եվ սա նույնպես ակնհայտ է դարձնում այն հանգամանքը, որ քուրդ–ամերիկյան հարաբերությունները թևակոխել են նոր փուլ, որում քրդերն այլևս կոնկրետ փոխհատուցում են պահանջում ԱՄՆ–ից՝ տասնամյակներ շարունակ տարածաշրջանում ամերիկյան քաղաքականության գործուն աջակիցները լինելու փաստարկով: Մի բան, որ համարյա անլուծելի խնդրի առաջ է կանգնեցնում Վաշինգտոնին՝ առանց այդ էլ անհանգիստ տարածաշրջանում ձևավորվող Թեհրան–Բաղդադ–Անկարա ալյանսի և այլ իսլամական երկրների դիմադրության, Մոսկվայի անկանխատեսելի արձագանքի, Իսրայելի քրդամետ համառության, տարածաշրջանում վարվող հակաահաբեկչական պայքարի և բազում այլ պատճառներով: «Ոչ մի երկիր և որևէ ճնշում չի կարող փոխել մեր դիրքորոշումը»,– հայտարարել է քրդերի առաջնորդ Մասուդ Բարզանին՝ ազդարարելով ամերիկյան «և նալին, և մեխին» քաղաքականության ավարտը: Ինչպիսի արդյունքով՝ դժվար է ասել:

Էջը պատրաստեց Գոհար Սիմոնյանը