«Գնթունիքի» տնօրենն ու հաշվապահը Ապարանի քաղաքապետի թեկնածու

Past.am   Նոյեմբերի 5–ին տեղական ինքնակառավարման մարմինների հերթական ընտրություններ են անցկացվելու Արագածոտնի, Արարատի, Արմավիրի, Գեղարքունիքի, Լոռու, Կոտայքի, Շիրակի, Սյունիքի, Վայոց ձորի և Տավուշի մարզերի թվով 66 համայնքներում, իսկ Արարատի մարզի Արտաշատ, Լոռու մարզի Շիրակամուտ և Սյունիքի մարզի Գորիս համայնքներում անցկացվելու են արտահերթ ընտրություններ: Այս մասին հաղորդագրություն է տարածել ԿԸՀ պաշտոնական կայքը:

Հաղորդագրությունից տեղեկանում ենք, որ նշված համայնքներից 15–ում կայանալու են միայն համայնքի ղեկավարի, 17 համայնքում` միայն ավագանու անդամի, և 37 համայնքում միաժամանակ անցկացվելու են և՛ համայնքի ղեկավարի, և՛ ավագանու անդամի ընտրություններ:

Օրերս գումարված արտահերթ նիստում Կենտրոնական ընտրական հանձնաժողովն էլեկտրոնային վիճակահանությամբ բաշխել է տեղական ինքնակառավարման մարմինների ընտրությունների տեղամասային ընտրական հանձնաժողովների նախագահների և քարտուղարների պաշտոններն Ազգային ժողովում խմբակցություն ունեցող կուսակցությունների, կուսակցությունների դաշինքների միջև:

Հերթական ընտրությունների համար ձևավորված թվով 496 տեղամասային ընտրական հանձնաժողովների նախագահների և քարտուղարների պաշտոնները մեծամասամբ բաժին են ընկել ՀՀԿ–ականներին, այն է՝ 274: Դրա մոտ կեսի թվով պաշտոն է ստացել «Ծառուկյան» կուսակցությունների դաշինքը` 146:

Իսկ

«Ելք» կուսակցությունների դաշինքն ու ՀՅԴ–ն ստացել են համապատասխանաբար 43–ական ու 33–ական պաշտոն:

Արտահերթ ընտրությունների համար ձևավորված թվով 31 տեղամասային ընտրական հանձնաժողովների նախագահների և քարտուղարների պաշտոններն էլ բաշխվել են հետևյալ համամասնությամբ` ՀՀԿ–17–ական,
«Ծառուկյան» դաշինք` 9–ական,
«Ելք» դաշինք` 3–ական և
Հայ Յեղափոխական Դաշնակցություն՝ 2–ական:

Ըստ Կենտրոնական ընտրական հանձնաժողովի կայքում հրապարակված նոյեմբերի 5–ին կայանալիք հերթական ընտրությունների նախապատրաստման ու անցկացման հիմնական միջոցառումների ժամանակացույցի՝ թեկնածուների առաջադրումը սկսվել է հոկտեմբերի 1–ից և կտևի ընդամենը 6 օր՝ մինչև հոկտեմբերի 6–ը ներառյալ: Գրանցումը կկատարվի արդեն հոկտեմբերի 6–11–ն ընկած ժամանակահատվածում: Թեկնածուները իրենց գույքի և եկամուտների մասին հայտարարագրերը համապատասխան տարածքային հանձնաժողով ներկայացնելու համար մինչև հոկտեմբերի 16–ը ժամանակ կունենան: Դե իսկ քարոզչությունը կսկսվի հոկտեմբերի 18–ից ու կտևի մինչև նոյեմբերի 3–ի կեսգիշեր:

Արտահերթ ընտրությունների դեպքում պատկերը մի փոքր այլ է: Այստեղ դեռևս առաջադրումներ չեն սկսվել: Դրանք կլինեն հոկտեմբերի 11–15–ն ընկած ժամանակահատվածում, իսկ գրանցումն էլ՝ հոկտեմբերի 15–17–ը ներառյալ: Հայտարարագրերի ներկայացման ժամկետն էլ կտևի մինչև հոկտեմբերի 22–ը:
Հոկտեմբերի 3–ի դրությամբ թեկնածուների առաջադրում տեղի է ունեցել միայն վեց մարզի 13 համայնքում: Ըստ ԿԸՀ համապատասխան փաստաթղթի՝ մեմամասամբ մեկական թեկնածուներ են առաջադրված:

Օրինակ, Ապարանի քաղաքագլուխ դառնալու ցանկություն դեռևս երկու հոգի ունեն՝ «Գնթունիք» ՍՊԸ–ի հիմնադիր–տնօրեն Կարեն Եղիազարյանը և իր աշխատակից, «Գնթունիքի» ավագ հաշվապահ Հովհաննես Ալեքսանյանը: Ընդ որում, եթե Եղիազարյանին առաջադրել է ՀՀԿ–ն, ապա նրա ենթակայությամբ աշխատող Ալեքսանյանը հանդես է եկել ինքնառաջադրմամբ:

Ինչպես երևում է առաջադրված թեկնածուների աղյուսակից՝ խոշորացման ենթակա համայնքների ղեկավարները նույնպես առաջադրվել են, և կարելի է ենթադրել, որ խոշորացված համայնքների ընտրությունները բավական թեժ պայքարով կընթանան՝ հաշվի առնելով գրեթե բոլոր արդեն նախկին գյուղապետերի՝ կրկին ընտրվելու ցանկությունը: