Հաղթանակ ու պարտություն երեք քվեով

Կիրակի հանրապետության 69 համայնքներում կայացած տեղական ինքնակառավարման մարմինների ընտրությունների քվեարկության մասնակիցների նախնական թիվը 243 հազար 335 է, կամ մասնակցել է ընտրողների 50,06%–ը: Դրանցից 3–ում անց են կացվել համայնքի ղեկավարի արտահերթ ընտրություններ, իսկ 34–ը խոշորացված համայնքներ են:

Ըստ ԿԸՀ կայքի՝ ընտրական տեղամասերում ընտրողների գրանցման նպատակով գործածված թվով 843 տեխնիկական սարքավորումները քվեարկության ողջ ընթացքում աշխատել են անխափան: Քվեարկության ընթացքում առաջացած տեխնիկական խնդիրներին տրվել են օպերատիվ լուծումներ: Քվեարկության ավարտից հետո բոլոր ընտրական տեղամասերում սահմանված կարգով տպվել են ավարտական տեղեկանքները:

Ըստ մեր ամփոփման՝ այս ընտրությունների արդյունքում ունեցանք երկու ԲՀԿ–ական, երկու դաշնակցական, 11 անկուսակցական ու 37 ՀՀԿ–ական համայնքի ղեկավար:

ԿԸՀ կայքում դիտելով ընտրությունների արդյունքները՝ տեսնում ենք, որ ընդամենը մեկ համայնքում է կին գյուղապետ ընտրվել: Խոսքը Գեղաքարի մասին է, որտեղ վերընտրվել է ՀՀԿ–ական Կարինե Մարտիրոսյանը: Նա միակ թեկնածուն էր, և գյուղի 135 ընտրողից 88–ը կողմ է եղել նրա վերընտրվելուն:

Շատուշատ համայնքներում նույնպես միայն մեկ թեկնածու է եղել, քանի որ մեծամասամբ 2–րդ կամ 3–րդ թեկնածուները կա՛մ ինքնաբացարկ են հայտարարել, կա՛մ էլ՝ հետ են վերցրել իրենց փաստաթղթերը: Ու այդ բոլոր համայնքներում էլ միակ թեկնածուն ընտրվել է, քանի որ կողմ քվեարկողների թիվը գերազանցել է դեմ–ին: Օրինակ՝ Կապանում վերընտրվել է Աշոտ Հայրապետյանը, և այստեղ ընտրողների մի զգալի հատված դեմ է եղել նրա վերընտրվելուն: 18 հազար 713 ընտրողից կողմ է քվեարկել 12 հազար 538–ը, իսկ 5073–ն էլ ասել է՝ ոչ: Ու թեև այդ ավելի քան 5 հազար կապանցու դեմ լինելը փոքր թիվ չէ, բայց այնուամենայիվ հաղթել է Հայրապետյանը:

Սա միակ դեպքն է կիրակի օրվա ընտրություններից, երբ ընտրողների մեկ երրորդը դեմ է լինում միակ թեկնածուին: Մնացած դեպքերում տեսնում ենք, որ դեմ քվեարկողների թիվը տատանվում է մի քանի հոգուց մինչև մի քանի տասնյակ ու մի քանի հարյուր:

Շատ հետաքրքիր են նաև այն դեպքերը, երբ երկու թեկնածուների միջև ձայների տարբերությունը տատանվում է մի քանի տասնյակով կամ պարզապես մի քանի թվով: Օրինակ՝ այդ առումով բացառիկ է Արարատի մարզի Նշավան համայնքը: Այստեղ ընտրվել է անկուսակցական Մյասնիկ Հովհաննիսյանը, ով իր հակառակորդ, հանրապետական Պապ Հակոբյանից առավել է եղել ընդամենը 3 ձայնով: Ընդամենը երեք ընտրողի կողմնորոշումը հօգուտ իրեն թույլ է տվել հաղթել այս ընտրություններում:

Շիրակի մարզի Մարմարաշենում արդեն 174 ձայնի առավելությամբ դաշնակցական Կարեն Արշակյանը հաղթել է ՀՀԿ–ական Թորգոմ Սահակյանին, նրանք ունեցել են համապատասխանաբար՝ 1463 ու 1289 քվե: Ծաղկահովիտում նույնպիսի պատկեր է եղել՝ 2467 քվե ստացած անկուսակցական Նորաին Հակոբյանը հաղթել է 2366 քվե ստացած հանրապետական Գոռ Հունանյանին: Մեկ այլ համայնքում էլ՝ Ախթալայում նույնպես ՀՀԿ–ն պարտվել է ինքնառաջադրմամբ հանդես եկած անկուսակցական Արկադի Թամազյանին 176 ձայնով:

Հավելենք, որ կիրակի օրվա ամենաբացառիկ արդյունքները Գորիսում էին, թեկնածուներից Առուշ Առուշանյանը ստացել էր քվեների գրեթե 99%–ը՝ ավելի ստույգ 98,4%: Նրա օգտին էր քվեարկել 12 հազար 945 գորիսեցի, իսկ Սամվել Հարությունյանի օգտին՝ միայն 56:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ