Եթե Հայաստանը ճիշտ ուղղությամբ զարգանա, արդյունքն աննկարագրելի լավը կլինի

Երևան քաղաքի ավագանու անդամ, տնտեսագետ Մնացական Պարակշիևի կարծիքով, մենք աշխարհում ամենաանտաղանդ ազգը չենք, որպեսզի չկարողանանք ծաղկող տնտեսություն ունեցող և գրավիչ երկիր կառուցել: Պարզապես հարկավոր է ճիշտ ուղղությամբ շարժվել, ինչը հիմա այդպես չէ:

«Ես համոզված եմ, որ բոլորիս համատեղ ջանքերով Հայաստանը իրոք ժամանակակից և ծաղկող տնտեսություն ունեցող երկիր լինելու բոլոր պոտենցիալներն ունի: Պարզապես հարկավոր է ճիշտ ուղղությամբ շարժվել և նպատակաուղղված քաղաքականություն վարել»,– Past.am-ի հետ զրույցում ասաց Մ. Պարակշիևը:

Ի դեպ, Երևանի վերջին ավագանու նիստի ժամանակ, երբ քննարկվում էր «Կանազի» մշակութային տունը 10 տարով Հրանտ Թոխատյանին շահագործման հանձնելու հարցը, նա նույնպես կողմ է քվեարկել, քանի որ, իր կարծիքով՝ եթե որևէ մեկը պատրաստ է կիսաքանդ որևէ կառույցի վերանորոգման համար ներդրում իրականացնել, ապա դա միայն պետք է ողջունել:

«Այդ տարածքը չի նվիրաբերվել, այլ 10 տարով անհատույց տրվել է օգտագործման, այն պայմանով, որ այնտեղ պետք է ներդրում կատարվի: Ներդրումային ծրագիրը ամրագրվելու է նաև պայմանագրում: Եթե շեղումներ լինեն, ապա քաղաքապետարանը կարող է այն չեղարկել, բայց ես չեմ կարծում, որ նման ընթացք կունենա այս նախագիծը»,– ասաց Մ. Պարակշիևը:

Նրա խոսքով, մայրաքաղաքում շատ կան կիսափլված շինություններ: Դրանք փրկելու երկու տարբերակ կա՝ կա՛մ պետք է հանձնել մասնավորին, պայմանով, որ այնտեղ ներդրումներ արվեն, կա՛մ պետությունը պետք է իր գումարներով այն վերանորոգի ու աշխատատեղեր բացի:

«Համաշխարհային փորձը ևս ցույց է տալիս, որ սա է միակ ճանապարհը, բայց ցավոք Երևանի ներկա քաղաքային բյուջեն պարզապես թույլ չի տալիս նման ծրագրեր իրականացնել: Այս պայմաններում ո՞րն է ավելի լավ՝ որ դրանք նույն ձևով շարունակեն մնա՞լ, թե փրկվեն հետագա քայքայումից: Երկրորդ տարբերակն ինձ համար միանշանակ ավելի ընդունելի է, այդ իսկ պատճառով էլ ես կողմ եմ քվեարկել ոքրոշմանը»,– ասաց Մ. Պարակշիևը:

Խոսելով ավագանու վերջին նիստի ժամանակ ընդունված՝ «Երևանի զարգացման հնգամյա ծրագրի» մասին, նա նշեց, որ այն բավականին լավ ծրագիր է, որով նախատեսվում է առաջիկա 5 տարիների ընթացքում լուծել շատ հարցեր: 
«Ես որպես տնտեսագետ հասկանում եմ, որ դրանք մեծ գումարներ պահանջող ծրագրեր են, որոնց մի մասը պետք է իրականացվեն բյուջեի գումարներով, մյուս մասը՝ մասնավոր ներդրողների մասնակցությամբ: Կարևոր է, որ ծրագիրն իրականացվի, որը կապված է մի շարք այլ գործոններից»,– ասաց Երևանի ավագանու անդամը:

Այդ գործոններից ամենակարևորը գրավիչ միջավայրի առկայությունն է: Մ. Պարակշիևի կարծիքով, ներկայում Հայաստանում պայմաններն այնքան էլ գրավիչ չեն ներդրումներ իրականացնելու համար, իսկ կառավարությունը դեռ շատ գործ ունի անելու միջավայրը գրավիչ դարձնելու համար: Այս առումով, նոր հեծանիվ հորինել պետք չէ, քանի որ դրանք վաղուց ապացուցված աքսիոմատիկ ճշմարտություններ են, իսկ հաջողության հասնելու միակ գրավականը քաղաքական կամքի դրսևորումն ու հավասարության սկզբունքի շարունակական պահպանումն է:

«Մնացած հարցերում ես որևէ լուրջ խոչընդոտ չեմ տեսնում: Հայաստանի ներդրումային պոտենցիալը շատ–շատ մեծ է, բայց օգտագործվում է դրա չնչին մասը: Եվ ես ավելի քան համոզված եմ, որ եթե մեզ հաջողվի նման մթնոլորտ ձևավորել, Հայաստանը կկարողանա շատ մեծ ծավալների ներդրումներ ներգրավել: Հարկավոր է նաև արագացնել տեմպերը: Նման պայմանների դեպքում շատերն առանց հրավերի կգան, և շատ կարճ ժամանակ հետո Հայաստանը բոլորովին այլ երկիր կդառնա: Այդ դեպքում արդեն մեզ հուզող բոլոր հարցերը՝ արտագաղթը, ուղեղների հոսքը և այլն, կվերանան: Արտագաղթը կփոխվի ներգաղթով, և երկիրը կծաղկի: Եվ դա կարող է լինել միայն և միայն քաղաքական կամքի և օրենքի առջև բոլորի համար հավասար պայմանների առկայության պարագայում»,– համոզված է Մ. Պարակշիևը:

 

 Արմինե Գրիգորյան