Եթե ուսանողության թիվը չմեծանա, իշխանությունները կքնեցնեն տարկետման հարցը

Արդեն մի քանի օր է՝ ինչ «Զինվորական ծառայության և զինծառայողի կարգավիճակի մասին» օրենքի նոր նախագծի դեմ ուսանողների դասադուլն ու բողոքի ցույցերը շարունակվում են: Ուսանողները պայքարում են տարկետման իրավունքի սահմանափակման դեմ:

Քաղաքագետ Գագիկ Համբարյանը, խոսելով ուսանողների բողոքի մասին, Past.am–ի հետ զրույցում կարծիք հայտնեց, որ ուսանողների փոքրաթիվ քանակը մեծ խնդիր է առաջացնում նրանց համար:

«Եթե ուսանողության թիվը չմեծանա, իշխանությունները կքնեցնեն հարցը, և իրենց համար ֆորսմաժորային իրավիճակներ չեն լինի: Գաղտնիք չէ, որ բոլոր երկրներում իշխանությունները միշտ էլ խուսափել են ուսանողական ցույցերից՝ այն խնդիր է բոլոր իշխանությունների համար: Մեզ մոտ ևս բացառություն չէ: Բայց քանի որ նրանց թիվը մեծ չէ, իշխանությունները հանգիստ են այդ առումով: Իշխանության ներկայացուցիչները հանդիպումների փորձեր են կատարում՝ երկկողմանի զրույցների միջոցով բողոքը մեղմելու համար: Բայց եթե ցուցարարների թիվը չաճեց, որևէ զիջման չեն գնա, իսկ եթե հակառակը լինի, կգնան և կբավարարեն ուսանողների պահանջը: Չի բացառվում, որ այդ դեպքում օրենքը ժամանակավորապես չընդունվի, և այդ անցումը որոշ ժամանակ ևս ձգձգվի»,–ասաց նա:

Ակցիայի վերաբերյալ դիրքորոշումները տարբեր են: Մարդկանց որոշակի մասն, այնուամենայնիվ, փորձում է ակցիայի հետևում այլ ուժեր տեսնել: Մի հատված էլ դասադուլն ուսանողների ազնիվ մղման արդյունքն է համարում: Անդրադառնալով դիտարկմանը, քաղաքագետը նշեց. «Բավականին երկար ժամանակ է, ինչ Հայաստանում տեղի ունեցող ակցիաների հետևում որոշ քաղաքական ուժեր փորձում են ինչ–որ անձանց կամ ուժերի փնտրել: Որևէ ուժի, որը կարող էր կանգնած լինել ուսանողների ակցիայի հետևում, այս պահին չեմ տեսնում:  Ուսանողներն իրենց բողոքը արդարացի ներկայացնում են: Իրենք իրավունք ունեն իրենց կարծիքը հայտնել և բողոքել: Բայց եթե այս գործընթացը երկարի, իհարկե, կհայտնվեն որոշ քաղաքական ուժեր, որոնք կփորձեն այս ամենն օգտագործել իրենց սեփական ռեյտինգը բարձրացնելու համար: Օրինակ՝ տրանսպորտի թանկացման դեմ ցույցերից որոշ ժամանակ անց հայտնվեցին որոշ քաղաքական ուժեր: Նույնը նաև տեղի ունեցավ «Էլեկտրիկ Երևանի» ժամանակ: Բայց այս պահին կա միայն այն փաստը, որ նրանք ակտիվ երիտասարդներ են, որոնք ունեն իրենց սեփական կարծիքը և պայքարում են իրենց կարծիքը առաջ տանելու համար»:

Քաղաքագետը նշեց, որ դեմ է օրենքին ոչ թե նրա համար, որ այն լավը չէ, այլ որ իշխանությունները փորձում են կոռուպցիոն երևույթները փնտրել այնտեղ, որտեղ դրանք ավելի քիչ են:

«Չեն փորձում դրանք փնտրել այնտեղ, որտեղ կոռուպցիան ահռելի չափերի է հասել: Չեմ կարծում, որ տարկետման իրավունքից զրկելով, իշխանությունները կպայքարեն կոռուպցիոն երևույթների դեմ, և մեծահարուստների երեխաներն, ի վերջո, բանակ կգնան: Իհարկե, չեմ ժխտում՝ բուհերում կոռուպցիա կա, բայց այն մասշտաբի չէ, որը կարող է ազդել բանակ գնացող երիտասարդների թվաքանակի վրա: Շատ մեծ ազդեցություն ունեն զինկոմիսարիատները, որոնց միջոցով ահռելի գումարներ են «տեղաշարժվում»: Այդ կոռուպցիայի միջոցով հանկարծ պարզվեց, որ օլիգարխների երեխաները մասսայաբար կամ էպիլեպսիկ են, կամ հարթաթաթ: Բոլորը բանակից ազատվում են զինկոմիսարիատների միջոցով»,–եզրափակեց Գ. Համբարյանը:

Աննա Բադալյան