Գեղարքունիքի մարզպետ Կարեն Բոթոյանը ներկայացրեց խոշորացված Ճամբարակ եւ Շողակաթ համայնքների նորընտիր ղեկավարներին

Գեղարքունիքի մարզպետ Կարեն Բոթոյանն այսօր խոշորացված Ճամբարակ եւ Շողակաթ համայնքներում ներկայացրեց նորընտիր ղեկավարներ Վազգեն Ադամյանին եւ Սուլիկո Շուշանյանին: «Արմենպրես»-ի տեղեկացմամբ՝ հանդիպումներին մասնակցեցին խոշորացված համայնքների կազմերում միավորված նախկին համայնքների ղեկավարներ,աշխատակազմերի ներկայացուցիչներ, նորընտիր ավագանու անդամներ:

«Նոյեմբերի 5-ի ՏԻՄ ընտրություններում ժողովուրդն արտահայտեց իր կամքը՝ կատարելով իր ընտրությունը, որի արդյունքները մենք ընդունում ենք ու շնորհավորում նորընտիր ղեկավար Վազգեն Ադամյանին՝ նրան ցանկանալով բեղմնավոր աշխատանքային գործունեություն, նորանոր հաջողություններ: Մենք մեր հնարավորության սահմաններում պետք է աջակցենք եւ սատարենք Վազգեն Ադամյանին, նորընտիր ավագանու անդամներին, որ Ճամբարակ համայնքը շարունակի քայլ առ քայլ զարգանալ ու առաջ ընթանալ, որ նորընտիր ղեկավարն ու ավագանին արդարացնեն ընտրողների տված քվեները»,-շնորհավորանքի խոսքում նշեց մարզպետը:Միաժամանակ Կարեն Բոթոյանը շնորհակալություն հայտնեց Ճամբարակի արդեն նախկին քաղաքապետ Յուրա Ավալյանին, Ճամբարակ համայնքի կազմ մտած Անտառամեջ, Ձորավանք, Դպրաբակ, Կալավան, Թթուջուր, Գետիկ, Մարտունի, Այգուտ, Վահան նախկին համայնքների ղեկավարներին՝ ՏԻՄ համակարգի եւ համայնքների կառավարման ու զարգացման գործում ներդրած ավանդի համար, հույս հայտնելով, որ նոր պայմաններում նրանք իրենց ուժերն ու փորձն ի նպաստ կբերեն իրենց բնակավայրերի հետագա զարգացմանը:
Ճամբարակի նորընտիր համայնքապետ Վազգեն Ադամյանն իր հերթին հավաստիացրեց, որ պատրաստ է անդուլ աշխատանքով իր պարտքը վերադարձնել ժողովրդին:
«Շնորհակալ եմ ինձ տրված մեծ վստահության համար: Հիմա ես  ինձ ընտրած կամ չընտրած բոլոր քաղաքացիների ղեկավարն եմ ու բոլորին կոչ եմ ուղղում՝ միավորվել մեկ նպատակի ու գաղափարի շուրջ, մեր միասնական ջանքերն ուղղել մեր համայնքի զարգացմանը, բարեկեցիկ կյանքի ապահովմանը: Պատրաստ եմ աշխատել բոլորի հետ, ովքեր ի վիճակի են ու պատրաստ՝ արդարացնելու ընտրողների եւ մեր սպասելիքները: Արդեն ընտրությունների արդյունքներից հետո չպետք է լինի յուրային կամ հակառակորդ հասկացություն, ամեն ինչ լինելու է համերաշխության, փոխըմբռնման պայմաններում»,-ներկաներին վստահեցրեց Վազգեն Ադամյանը:
Կարեն Բոթոյանը շնորհավորեց նաեւ Շողակաթ համայնքի նորընտիր ղեկավար Սուլիկո Շուշանյանին եւ համայնքի ավագանու անդամներին:

«Սուլիկո Շուշանյանը ղեկավարման իր հարուստ փորձով, ներդրած ջանքերով քայլ առ քայլ առաջ է տարել նախկին Շորժա համայնքը: Համոզված եմ, որ այդ նույն փորձն ու ջանքերը նա կգործադրի Շողակաթի կազմ մտած մյուս նախկին համայնքներում, իսկ մենք մեր ուժերի ներածին չափով նրա ու նորընտիր ավագանու կողքին կլինենք բոլոր կարեւոր ձեռնարկներում»,-նշեց մարզպետը: Սուլիկո Շուշանյանն էլ իր հերթին վստահեցրեց, որ անհետեւանք չի թողնի ոչ մի հիմնախնդիր, ոչ մի հուզող հարց, որ կբարձրացվի տեղերից:«Մենք պետք է միասնական ջանքերով հասնենք նրան, որ մեր նորաստեղծ համայնքը ոչ միայն մարզում, այլ նաեւ Հայաստանի Հանրապետությունում դառնա ամենաօրինակելի խոշորացված համայնքը:Բոլոր բնակավայրերի մարդկանց, բոլոր ունակ ուժերի հետ աշխատելու ենք միայն համերաշխության ու փոխադարձ հարգանքի պայմաններում»,-հավաստիացրեց Սուլիկո Շուշանյանը:
Մարզպետ Կարեն Բոթոյանի շնորհակալական խոսքը Շողակաթ համայնքում Ծափաթաղ, Դրախտիկ, Ջիլ, Արդանիշ, Աղբերք նախկին համայքների ղեկավարներին փոխանցեց Գեղարքունիքի մարզպետարանի աշխատակազմի տեղական ինքնակառավարման եւ հանրապետական գործադիր մարմինների տարածքային ծառայությունների համակարգման վարչության պետ Վանիկ Հարությունյանը:

Խոսրով Խլղաթյան