Թերեզա Մեյը ռուսներին որպես փրկօղակ է գործածում

Մեծ Բրիտանիայի վարչապետ Թերեզա Մեյն իր պաշտոնավարման ողջ ընթացքում սուր քննադատության է ենթարկել Ռուսաստանին՝ հատկապես արևմտյան երկրների ներքին գործերին միջամտելու և կիբերլրտեսություն ծավալելու համար:

Բայց այն մտքերը, որ հնչեցին երեկ՝ լոնդոնյան սիթիի քաղաքապետի կազմակերպած բանկետի ընթացքում, փորձագետների աչքին նոր իմաստ ստացան հատկապես ԱՄՆ նախագահ Դոնալդ Թրամփի և ՌԴ նախագահ Վլադիմիր Պուտինի վիետնամական հանդիպման համատեքստում, որից հետո Թրամփը դարձյալ հայտարարեց, որ հավատում է ԱՄՆ ընտրություններին ռուսների չմիջամտելու վերաբերյալ Պուտինի խոսքերին, այնուհետ թվիթերյան միկրոբլոգում գրեց, թե միայն հիմարներն ու ատելության քարոզիչները կարող են դեմ լինել Ռուսաստանի հետ նորմալ հարաբերություններին: Թերեզա Մեյը, սակայն, այլ կարծիքի է:

Նրա խոսքով՝ չնայած Լոնդոնը երբևէ չի ցանկացել հավերժ ռազմական կոնֆրոնտացիայի գնալ Ռուսաստանի հետ, սակայն, ակնհայտ է, որ այդ երկիրը չի դադարում «կազմաքանդել բաց հասարակությունները», միջամտում է արևմտյան ընտրություններին և ֆեյք–նորությունների միջոցով սեպ է խրում արևմտյան երկրների միջև:

Այսպիսով, նույնիսկ իր կուսակիցների շրջանում քննադատության արժանացող և անգամ իմփիչմենթով վտանգված վարչապետը լոնդոնյան բանկետն ինչ–որ առումով որպես իր իշխանությանը նետված փրկօղակ օգտագործեց՝ արտաքին քաղաքականության տեսանկյունից առանցքային դիտող իր ելույթում խստացնելով հռետորաբանությունը ռուսների նկատմամբ և կոնկրետ ուղերձներ հղելով այդ երկրին:

Այդ ուղերձը, ըստ Մեյի, շատ պարզ է՝ Մոսկվան այսուհետ պիտի այլ ճանապարհ ընտրի իր համար և դադարի կիբերհարձակումներ գործել եվրոպական կառավարությունների ու խորհրդարանների դեմ: «Ռուսաստանը կարող է Արևմուտքի գործընկերը լինել միայն այն ժամանակ, երբ կանոնների համաձայն սկսի խաղալ… այդ երկիրը մի անգամ չի խախտել եվրոպական մի շարք երկրների օդային տարածքը և սեպ խրել ու կիբերլրտեսության թիրախավորված կամպանիա է առաջ տարել…

Մենք գիտենք, թե ինչի եք ձգտում, բայց դուք ոչնչի չեք հասնի այն պատճառով, որ թերագնահատում եք մեր ժողովրդավարության կայունությունը, ազատ և բաց հասարակությունների մշտական ձգողականությունը և եվրոպական երկրների հավատարմությունն ալյանսներին, որոնք միավորում են մեզ»,–հայտարարել է Թերեզա Մեյը, որն, ինչպես գիտեք, արդեն մարտին պատրաստվում է վերջնականապես լքել Եվրամիության շարքերը՝ դժգոհելով հենց Բրյուսելի հաստատած խաղի կանոններից: Ընդ որում, որպեսզի հատկապես վերջին առումով ապահովագրի ինքն իրեն, ճիշտ Թրամփի նմանությամբ՝ Մեյը բրիտանական Brexit–ն անուղղակիորեն որպես զուտ տնտեսական ձեռնարկ է ներկայացրել, նշելով, որ ԵՄ–ն լքելով՝ Լոնդոնը կշարունակի հավատարիմ լինել ՆԱՏՕ–ին, կձգտի նոր համաձայնության լիբերալ արժեքներով առաջնորդվող ԵՄ–ի հետ և նաև ամուր տնտեսական կապերի միջոցով բաստիոն կդառնա՝ եվրոպական կարգերը խախտելու՝ ռուսական փորձերի դեմ:

Հետաքրքիր է, որ Մեծ Բրիտանիայի վարչապետի այս ելույթը հնչեց ոչ միայն Թրամփ–Պուտին հանդիպումից անմիջապես հետո, այլև նախկինում Ռուսաստանին շատ ավելի խիստ քննադատության ենթարկած արտգործնախարար Բորիս Ջոնսոնի՝ Մոսկվա կատարելիք այցի շեմին: Ընդ որում, հարկ է նշել նաև, որ ի տարբերություն Մեյի՝ Ջոնսոնը բավականին մեղմել է իր հակառուսական տոնը և ՌԴ–ի հետ անհրաժեշտ հարաբերությունները Լոնդոնի տեսանկյունից որակել է «զգուշավոր, բայց մասնակից» ձևակերպմամբ: Ավելին՝ նա խորհրդարանականների առջև հայտարարել է, որ չունի որևէ ապացույց առ այն, որ Ռուսաստանը միջամտել է բրիտանական ընտրություններին, կամ՝ Brexit–ին, ինչպես այժմ շատերն են հետին թվով հայտարարում: Հանգամանք, որ չի վրիպել շատերի ուշադրությունից և այժմ նաև Մեյ–Ջոնսոն հետագա հակասությունների ու ներքաղաքական նոր զարգացումների համատեքստում է դիտարկվել: