«Արևային էներգետիկան Հայաստանում զարգանում է երկրաչափական պրոգրեսիայով»

Past.am-ը զրուցել է  «Շտիգեն» ընկերության հիմնադիր–տնօրեն, վերականգնվող էներգետիկայի փորձագետ Հայկ Շեկյանի հետ.

 

– Պարոն Շեկյան, ինչո՞ւ պետք է մարդն ավանդական էներգակիրներից անցում կատարի արևային էներգետիկային: Որքանո՞վ է այդ անցումը շահավետ հաճախորդների համար:

– Ավանդական էներգառեսուրսները և ծառայությունները արդեն իսկ թանկ են, և դրանց հետագա թանկացումը դամոկլյան սրի նման միշտ կախված է մեր ազգի գլխին: Տնտեսական խնդիրներ լուծելուց զատ, վերականգնվող էներգետիկան՝ հատկապես արևայինը, Հայաստանի համար ունի նաև էներգետիկ անվտանգության բարձրացման գործառույթ: Հատուկ շեշտադրում եմ արևայինը, որովհետև, ի տարբերություն հողմային էներգետիկայի, արևայինը մեզանում կիրառելի է ամենուր՝ թե՛ տնային տնտեսությունների ու փոքր բիզնեսների, թե՛ խոշոր գործարանների, հյուրանոցների և այլ արտադրական օբյեկտների համար:

– Որքանո՞վ են ՀՀ–ի, Արցախի քաղաքացիներն ու բիզնես շրջանակները տեղեկացված արևային էներգետիկ լուծումներից: Դրանք տեղադրելու գաղափարը որքանո՞վ է հետաքրքրում նրանց:

– Վերջին շրջանում մարդիկ ու բիզնես շրջանակներն ավելի տեղեկացված են դարձել, բայց խորությամբ չեն պատկերացնում՝ ո՞ւմ դիմել, ո՞րն է առավելությունը ու թերությունը: Երբեմն ականատես ենք լինում գերագնահատված սպասումների: Մարդիկ կան, որ մտածում են, թե արևային համակարգը դնելուց հետո գազի խողովակներն ու հոսանքի լարերը կտրելու են, անկախության դրոշ են բարձրացնելու տան վրա ու վերջ: Բայց այդպես չէ: Իրականում արևային համակարգերը ավանդական համակարգերի հետ մեկտեղ բարձրացնում են մարդկանց բարեկեցության և անվտանգության աստիճանը: Մենք մեր առաքելությունն ենք համարում արժանահավատ տեղեկատվության տարածումը և արևային էներգետիկայում միֆերի բացառումը: Մեր ընկերության կայքէջում, սոցիալական ցանցերի մեր պաշտոնական էջերում և այժմ նաև տեսահոլովակների միջոցով ցանկացած սպառող կարող է ստանալ արժանահավատ և լիարժեք տեղեկատվություն արևային բոլոր բարդության լուծումների վերաբերյալ, իսկ անհրաժեշտության դեպքում նաև կապ հաստատել մեր զանգերի կենտրոնի հետ:

– ՀՀ կառավարությունը հայտարարել է վերականգնվող էներգիայի ոլորտի զարգացումը խթանող քաղաքականության մասին: Պետական և մասնավոր հատվածի համագործակցությունն այս առումով ինչպե՞ս կգնահատեք:

– Երևի եզակի ոլորտներից է, որ համագործակցություն և կոորդինացում կա: Եթե ինչ–որ խնդիրներ ենք տեսնում, ազատ ենք դա ներկայացնել ոլորտի պետական քաղաքականությունը մշակող կառույցներին: Մյուս կողմից՝ կան խնդիրներ: Պետական գնումների գործընթացը մեզ համար արդյունավետ չէ: Մեկ դրամ էժան լինելու դեպքում պետությունը ստիպված է գնել էժան ապրանքը: Մյուս կողմից՝ չկա որակական գնահատման հնարավորություն, գնումների որակական հետևանքները ռիսկային են:

– Գնային ի՞նչ քաղաքականություն է որդեգրել Ձեր կողմից հիմնադրված «Շտիգեն» ընկերությունը, որ արևային էներգետիկայի լուծումները հասանելի և մատչելի լինեն ՀՀ քաղաքացիների համար:

– Ցանկացած ընկերություն փորձում է շահույթ ապահովել՝ դա բիզնեսի առաջին կանոնն է: Դրանով հանդերձ, մենք այսօր շուկայում առաջարկում ենք ամենացածր գները՝ հասկանալով մեր հաճախորդների ֆինանսական հնարավորությունները: Մենք փորձել ենք այնպիսի լուծում ստանալ, ըստ որի ապրանքի հետգնումը 3–4 տարում տեղի ունենա: Նման գնագոյացումը կարողանում ենք ապահովել միայն այն պատճառով, որ հանդիսանում ենք մի շարք աշխարհահռչակ արտադրողների պաշտոնական ներկայացուցիչը ոչ միայն Հայաստանում, այլև տարածաշրջանում, ու կարողացել ենք տարիների աշխատանքի արդյունքում վաստակել նրանց վստահությունը:

– Ի՞նչ արդյունքներ է գրանցել «Շտիգեն» ընկերությունը: Ի՞նչ պլաններ ունեք ապագա մի քանի տարիների համար:

– Մեր ընկերությունը հիմնադրվել է 2011թ.–ին: Այս պահին ունենք տեղադրումներ Հայաստանի գրեթե բոլոր համայնքներում, մոտ մեկ տասնյակ արևային գյուղեր, որտեղ բնակչության կեսից ավելին անցել է արևային տեխնոլոգիաներին: Շատ ակտիվ ենք Արցախում: Ունենք մի քանի տասնյակ ջերմային կայաններ՝ կառուցված հյուրանոցների ու արտադրական օբյեկտների համար: Մեր հպարտության առարկան «Գրանդ Սպորտ» սպորտային համալիրում կառուցված, տարածաշրջանային մակարդակով խոշորագույն ջերմային կայանն է՝ 1,5 ՄՎտ պիկային հզորությամբ: Այս նախագծի համար տեղադրվել է 14500 արևային վակուումային խողովակ: Համեմատության համար պետք է նշել, որ մեկ տնային տնտեսության տաք ջրի ամբողջ ծախսերը հոգալու համար բավարար է 20–30 վակուումային խողովակ: Ունենք արևային գործող էլեկտրակայաններ՝ գումարային 700 կՎտ հզորությամբ, մոտ ապագայում շահագործման կհանձնենք առաջին մեգավատանոց կայանը (լիցենզիա ստացած 10,5 ՄԳվ–ից 3,5–ը կառուցում է «Շտիգեն»–ը): Հատկանշական է, որ այս կայանը գտնվում է Թուրքիայի սահմանից մի քանի կիլոմետր հեռավորության վրա, իսկ սեփականատերը նաև հիդրոէլեկտրակայանի սեփականատեր է: Այսինքն, այս անցումը ավանդականից նորագույնին՝ ՀԷԿ–երից ԱրԷԿ–ներին, տեղի է ունենում մեր աչքի առաջ, մեր միջոցով:

Ինչ վերաբերում է պլաններին, ասել, որ ունենք ամբիցիոզ ծրագրեր, նշանակում է չասել ոչինչ: Ունենք պլաններ Հայաստանում արտադրություն հիմնելու, շատ լուրջ ծրագրեր ունենք միջազգային ընկերություն դառնալու, արտաքին շուկաներ գրավելու, որոնք դեռ չեմ բացահայտի: Ամեն ինչ իր ժամանակին (ծիծաղում է):

Աննա Բադալյան