Ավագանու նիստը խաղաղ անցավ. Զարուհին ԱՄՆ–ում է միտինգ անում

«Փաստ» օրաթերթը գրում է.

Երեկ տեղի ունեցավ Երևանի ավագանու հերթական նիստը, որի օրակարգում էին ներառված մի շարք հայտնի մարդկանց հիշատակին հուշատախտակներ փակցնելու և փողոցներ անվանակոչելու մասին նախագծեր:

Ավագանու նիստը, թերևս, բավական հանգիստ մթնոլորտում ընթացավ: Նիստից բացակայում էր «Երկիր Ծիրանի» կուսակցության նախագահ Զարուհի Փոստանջյանը, ով այս օրերին գտնվում է Նահանգներում: Նրա բացակայությունը լրացնում էին իր կուսակիցները՝ Մարինա Խաչատրյանն ու Սոննա Աղեկյանը. Մարինան գրեթե բոլոր նախագծերից հետո ելույթ էր ունենում:

Ավագանու նախագծերից առանձնահատուկ էր Մոնթե Մելքոնյանի անվամբ փողոց ունենալու նախագիծը, որը «Ելք»–ի ու ՀՀԿ–ի համատեղ նախաձեռնությունն էր: Այսուհետև հայ մեծանուն հերոսի անունը կկրի Երևանի Իսակովի պողոտան Լենինգրադյան փողոցին կապող ճանապարհահատվածը: Այս նախագիծն ընդունվեց միաձայն: Միաձայն ընդունվեց նաև Սերգեյ Փարաջանովի անվամբ փողոց անվանակոչելու նախագիծը: Այն տրվեց Իսրայելյան փողոցից մինչև Հրազդանի կիրճ ընկած հատվածին՝ Փարաջանովի թանգարանի հարակից փողոցին:

Երեկվա ավագանու նիստի 16–րդ և 17–րդ կետերը գրեթե նույնն էին՝ ունենալ Լեոնիդ Ազգալդյանի անվամբ փողոց: Սակայն առաջին նախագիծը ՀՀԿ–ի կողմից էր առաջարկվել, իսկ երկրորդը՝ «Ելք»–ի: Հանրապետականներն առաջարկում էին նրա անվամբ կոչել Կենտրոն վարչական շրջանի Սարալանջի փողոցից մինչև Լեռ Կամսարի փողոցն ընկած ճանապարհահատվածը, իսկ «Ելք»–ը՝ Լենինգրադյան փողոցը:

Թե՛ «Ելքի» և թե՛ «Երկիր Ծիրանի» խմբակցությունների անդամները պատճառաբանում էին, որ դեմ են ՀՀԿ–ի նախագծին, քանի որ Ազգալդյանի նման մեծությանը չպիտի, իրենց իսկ բնորոշմամբ, չորրորդ կարգի փողոց անվանել: «Երկիր Ծիրանի» խմբակցության անդամ Մարինե Խաչատրյանը ՀՀԿ–ի կողմից ընտրված փողոցը նեղ ու ճմրթված(՞) բնորոշեց:

Սրան, սակայն, ՀՀԿ ավագանու անդամները հակադարձում էին, նշելով, որ փողոցի երկարությունը որոշիչ չէ, փողոցը կենտրոնական հատվածում է գտնվում: Կամո Հովհաննիսյանը շեշտեց, որ այդ փողոցը գտնվում է Կենտրոն վարչական շրջանում՝ նորակառույց թաղամասում:

Հարցի շուրջ ելույթ ունեցավ նաև «Ելք»–ից Անահիտ Բախշյանը՝ նշելով, թե նախկին նիստերից մեկին Մարտին Վարդազարյանը կշտամբել է իրեն, որ նա չգիտեր Երևանում Ազգալդյանի հուշարձանի առկայության մասին: Բախշյանը շեշտեց, որ ինքը չգիտեր, քանի որ արժանվույնս այդ մասին չի բարձրաձայնվել:

«Ուրեմն լավ չեք գոռացել այդ մասին, ուրեմն լավ չեք լուսաբանել: Լեոնիդ Ազգալդյանը արժանի է ավելի ներկայանալի փողոց անվանակոչվելու: Ազգալդյանի անունով պետք է կոչվի ոչ 700 մետրանոց փողոցը, այլ Լենինգրադյանը: Այսօր չի լինի, մի օր կլինի, կտեսնե՛ք, հանրապետականնե՛ր»,– նշեց նա:

Ի վերջո ՀՀԿ–ի նախագիծը 41 կողմ, 11 դեմ ձայնով ընդունվեց: Հետաքրքիր է, որ «Ելք»–ի նախագիծն էլ ունեցավ 11 կողմ, 40 դեմ և մեկ ձեռնպահ ձայներ: «Ելք» խմբակցության մյուս չորս նախագծերը՝ Վազգեն Առաջինի, Վռամշապուհ արքայի, Ապրիլյան հերոսների ու Քըրք Քըրքորյանի անվամբ փողոցներ անվանակոչելու առաջարկությունները նույնպես չընդունվեցին: Կոնկրետ Վազգեն Առաջինի անունով փողոց ունենալու նախագծի հետ կապված քաղաքապետ Տարոն Մարգարյանն ընդգծեց, որ իրենք կողմ են նրա անունով փողոց անվանակոչելուն, սակայն այն պետք է լինի այլ վայրում:

«Ելք»–ի անդամները առաջարկում էին նրա անունով անվանակոչել ներկայիս Կասյան փողոցը: Երևանի ավագանու ՀՀԿ խմբակցության անդամ, երաժիշտ Մարտին Վարդազարյանը, անդրադառնալով Ազգալդյանի անվամբ փողոցի անվանակոչմանը, «Փաստի» հետ զրույցում նշեց.

«Անունը չի փողոցը դարձնում փողոց, այլ փողոցն է անունով դառնում փողոց: Կախված է նրանից, թե ինչպիսի վերաբերմունք կունենանք այդ փողոցի նկատմամբ: Դեմագոգիկ մոտեցումներով, շատ գեղեցիկ արտահայտություններով ձևակերպված, կապ չունեցող մեկնաբանությունները շեղում են չպատրաստված հասարակության ուշադրությունը, որը մի բառը լսելով՝ կարող է այլ եզրակացության գալ, մեկ ուրիշ բառ լսելով՝ այլ: Իմաստը մեր մեծանուններին արժանի ներկայացնելն է: Լենինգրադյանի վերաբերյալ առաջին անգամ չի քննարկվում, սա Լենինի անունը վերացնելու հետ կապ չունի: Սա Լենինգրադյանն է: Լենինգրադում շատ հայ զինվորներ զոհվել են՝ պաշտպանելով իրենց հայրենիքը: Այդ անունը փոխելու ոչ միայն անհրաժեշտություն չկա, այլև՝ կարիք»:

 

Քրիստինա Տեր-Մաթևոսյան