Նոր ծրագրերը՝ մոտ մեկուկես տարի հետո, իսկ ստենտների գները կիջնեն մի քանի ամսից

Առողջապահության նախարար Լևոն Ալթունյանի հետ լրագրողների հանդիպումը թեև առանց փողկապի ձևաչափով չէր, բայց բավականին բաց ու անկեղծ միջավայրում ընթացավ: Նախարարի աշխատասենյակի պատին այն ծրագրերի «գրաֆիկներն» էին, որոնք ընթացքի մեջ են: Ու թեև այդ պահին ոչ բոլոր ծրագրերն էին պատի վրա դիրքավորվելու բախտին արժանացել, բայց դա չխանգարեց, որ դրանք անհրաժեշտության դեպքում մանրամասն ներկայացվեն:

Ու թեև այդ պահին նախարարության աշխատանքի մասին փաստող միակ աղբյուրը պատին կախված գունավոր գրաֆիկներն էին, բայց ժամանակի սղության պատճառով հնարավոր չէր դրանք մանրամասն ընթերցել ու հասկանալ, թե ինչն ինչոց է:

Ինչ վերաբերում է կոռուպցիայի դեմ պայքարի գրաֆիկին, ապա նախարար Ալթունյանը նշեց, որ այն տրոհված և ներկայացված է բոլոր գրաֆիկներում, իսկ նախարարը թուրը ձեռքին սպիտակ ձիու վրա նստած անձնավորությունը չէ, ով կարող է «վազել» կոռուպցիոների հետևից և պայքարել դրա դեմ:

«Փաստը» փորձեց պարզել, թե նշված ծրագրերը երբ տեսանելի ու ընկալելի կլինեն հասարակության համար: Մասնավորապես, երբ քաղաքացին իրեն ավելի պաշտպանված կզգա և տարբեր պատճառներով չի վախենա գոնե տարին մեկ անգամ առաջնային բուժհաստատությունում ստուգում անցնել:

Առողջապահության նախարարը վստահեցրեց, որ էլեկտրոնային առողջապահության համակարգը ներդնելուց հետո չափելի կլինի ամեն ինչ, այդ թվում՝ թե քանի անգամ է մարդը մտնում իր ընտանեկան բժշկի մոտ, որպեսզի բուժի այս կամ այն հիվանդությունը: Համակարգն ամենայն հավանականությամբ լիարժեք կգործի 2018 թվականի վերջին, սակայն համակարգից օգտվելու համար դասընթացներ կազմակերպելու գործընթացն էլ եթե ավելացնենք, ապա հույս կա, որ 2019–ից այս համակարգը կդառնա ժողովրդի առաջնային առողջության պահպանման երաշխավորը:

«Համակարգը թույլ կտա վերահսկել, թե, օրինակ, քանի անգամ է այս կամ այն մասնագետի վերահասցեագրում իրականացվել, բուժման ընթացքում ինչ դեղեր են օգտագործվել, և արդյո՞ք դրանք համարժեք թանկարժեք դեղերը չեն: Եթե թվերի աճ արձանագրվի, ապա դա հնարավորություն կտա ենթադրել, որ տվյալ բժիշկը չի ղեկավարվում այն կանոնակարգերով և ուղեցույցներով, որ ներկայացված են: Նման ոճով աշխատող բժշկի հանդեպ ներքին վերահսկողական գործառույթներ կսկսվեն իրականացվել: Այսինքն, այս համակարգը թույլ կտա քաղաքացիներին մատուցել որակյալ ծառայություն և դարձնել ավելի պաշտպանված»,– ասաց Լ. Ալթունյանը:

Խոսելով նախարարության կողմից մշակվող և ներդրվող խաղի կանոնները մասնավոր բուժհաստատություններում չիրականացնելու և դրանք շրջանցելու մասին, առողջապահության նախարարն ասաց, որ դրանց վերահսկողությունն իրականացվում է մի քանի ուղղություններով:

«Նախարարությունը թելադրում է խաղի կանոնները` լիցենզավորման, ինչպես նաև շուկայում ամենախոշոր գնորդը լինելու շնորհիվ: Այսօր մենք գնում ենք 80 միլիարդ դրամի բուժծառայություններ և, լինելով ամենամեծ գնորդը, մենք ենք թելադրում խաղի կանոնները: Ամենախոշոր գնորդը լինելով, մենք ասում ենք՝ տվյալ հիվանդությունը պետք է այս էտապներով բուժվի և թելադրում ենք նաև այն գործելակարգը, որն անհրաժեշտ է մեզ: Ինչ վերաբերում է լիցենզավորման օրենքի կատարմանը, ապա այն վերահսկում է պետական տեսչական մարմինը»,– ասաց Լ. Ալթունյանը:

Խոսելով սրտի անվճար ստենտավորման վրա ծախսվող գումարի նվազման մասին, նախարարն ասաց, որ հաջորդ տարվա գարնանից արդեն ստենտներ ձեռք բերելու պայմանագրերը բուժհաստատությունների հետ կկնքեն նոր սակագնով: Եվ հաջորդ տարվանից դեղապատ ստենտի գինը առաջիկայում կնվազի մինչև 700 հազար դրամ:

«Դա հնարավոր դարձավ կենտրոնացված գնում իրականացնելու շնորհիվ: Մենք հաշվարկեցինք պահանջվող ծավալը, առաջարկեցինք մատակարարներին և հնարավորություն ունեցանք մոտավորապես 50% ավելի էժան գնով ձեռք բերել այն: Ինչ վերաբերում է որակին, ապա այն միայն կլավանա, քանի որ մենք ձեռք ենք բերելու աշխարհի ամենալավ ընկերությունների արտադրանքը, և մենք էլ վերահսկողություն կիրականացնենք, որ անհայտ ծագում ունեցող և ճամպրուկներով ներկրված որևէ ստենտ չօգտագործվի պետպատվերով հիվանդների բուժման ժամանակ»,– ասաց Լ. Ալթունյանը: