ԱՄՆ–ը մերժեց Գլոբալ միգրացիոն համաձայնագիրը

«Փաստ» օրաթերթը գրում է

ԱՄՆ–ը հրաժարվում է միանալ Գլոբալ միգրացիոն համաձայնագրին, որի ստորագրումը ՄԱԿ–ում 2018–ին է նախատեսվում: «Նյույորքյան հռչակագրի բազմաթիվ դրույթներ չեն համապատասխանում ԱՄՆ միգրացիոն քաղաքականությանն ու փախստականների հետ կապված՝ Թրամփի վարչակազմի սկզբունքներին… մենք ինքնե՛րս կորոշենք, թե ինչպես ավելի արդյունավետ դարձնենք մեր սահմանների վերահսկումը և ում թույլատրենք մուտք գործել մեր երկիր»,– հայտարարել է ՄԱԿ–ում ԱՄՆ մշտական ներկայացուցիչ Նիկի Հեյլին:

Բնականաբար, Հեյլիի այսօրինակ հայտարարությունը ՄԱԿ–ում և հատկապես միգրացիայի հետ կապված բազում խնդիրներ ունեցող Եվրամիությունում թիկունքից հասցված հարված պիտի ընկալվեր, որովհետև Վաշինգտոնը, փաստորեն, հրաժարվում է մի գործընթացից, որին դեռ 2016–ի սեպտեմբերի 19–ին էր համաձայնել՝ միանալով աշխարհի 193 երկրներից բաղկացած մեծ ընտանիքին:

Այդ ժամանակ, ի դեպ, Փախստականների և միգրանտների հարցերով՝ ՄԱԿ–ի գագաթաժողովի ընթացքում, Օբամայի վարչակազմն առաջիններից մեկն էր ողջունել Միգրացիայի միջազգային կազմակերպությունը ՄԱԿ–ի պաշտոնական գործակալության վերածելու և վերջինիս միգրացիոն խնդիրներով զբաղվելու՝ միջազգային մանդատ տրամադրելու փաստը:

Վարչակազմը նույնիսկ Սպիտակ տան ուղերձում էր հավանություն տվել ՄՄԿ գլխավոր տնօրեն Ուիլյամ Լեյսի Սվինգի այն մտքին, թե կառույցի 69 երկար ու ձիգ տարիների գործունեության (ի դեպ, ի սկզբանե կազմակերպությունը կոչվել է Եվրոպայից միգրանտներ տեղափոխող ժամանակավոր միջկառավարական կոմիտե, 1952–ին անվանափոխվել է՝ դառնալով Եվրոպական միգրացիայի միջկառավարական կոմիտե, 1980–ին՝ Միգրացիայի միջկառավարական կոմիտե, իսկ արդեն 1989 թ.–ից հայտնի էր Միգրացիայի միջազգային կազմակերպություն անունով) գագաթնակետը հանդիսացող նոր կարգավիճակը էապես կօգնի կառավարել համաշխարհային միգրացիոն հոսքերն ու դրանից բխող մարտահրավերները: Շատ հստակ մի դիրքորոշում, որից հիմա Թրամփը 180 աստիճանով է շրջադարձ կատարում՝ մտահոգելով ՄԱԿ–ին ու ողջ աշխարհին:

Ի դեպ, ՄԱԿ–ն արդեն արձագանքել է դեսպան Հեյլիի հայտարարությանը՝ պատասխան հաղորդագրություն տարածելով: «Նյու–Յորքյան հռչակագրին միացած բոլոր երկրները, որոնք ՄԱԿ–ի անդամ են, խոստովանել են, որ ոչ մի առանձին երկիր ի վիճակի չէ ինքնուրույն կառավարել համաշխարհային միգրացիոն հոսքերը…

ԱՄՆ դերակատարումն այս գործընթացում որոշիչ նշանակություն ունի, որովհետև նրանք պատմության ընթացքում մեծահոգաբար են ողջ աշխարհից մարդկանց հյուրընկալել և այժմ էլ տանիք են հանդիսանում բազմաթիվ միգրանտների համար… Մեր ափսոսանքն ենք արտահայտում հատկապես այն պատճառով, որ Նահանգներն այս ոլորտում մեծ փորձ ու իմացություն ունեն ամբարած, ինչը կարող էր գործընթացը հաջող արդյունքների հասցնել»,– ասված է ՄԱԿ–ի գլխավոր ասամբլեայի 72–րդ նստաշրջանի քարտուղար Միրոսլավ Լայչակի տարածած հաղորդագրության մեջ:

Ուղիղն ասած՝ իրադարձությունների նման զարգացումը խիստ կանխատեսելի էր: Ի վերջո, վարչակազմի ողջ գործունեությունը (Մեքսիկայի հետ պատի կառուցում, ԱՄՆ միգրացիոն քաղաքականության անօրինակ խստացումներ, Green card վիճակախաղի կասեցման խոստումներ, այս թեմայով Թրամփի ագրեսիվ թվիթերյան գրառումներ, հեռակա բանավեճ Լոնդոնի մահմեդական քաղաքապետի հետ և այլն) սրանից դեռ շատ առաջ էր հուշում, որ Թրամփն անպայման ռևանշ է վերցնելու ՄԱԿ–ում այս խնդրի հետ կապված:

Այլ կերպ ասած՝ պատահածում ընդհանրապես անակնկալի նշույլ անգամ չկար (ինչպես հատկապես եվրոպական մամուլն է փորձում ներկայացնել), և Լայչակն էլ, անշուշտ, ճշմարիտ է այն առումով, որ համաշխարհային ողջ ընտանիքը պիտի պահը չկորցնի՝ հիշյալ խնդրի համար արժանավայել լուծումներ գտնելու համար: ԱՄՆ–ի հետ, թե առանց նրա՝ այլևս երկրորդական հարց է:

 

Գոհար Սիմոնյան