Հիմա մենք Ռուսաստանի «զո՞ւյգն» ենք, թե դաշնակիցը

Ռուսներին կողմնորոշվել է պետք, գրում է «Փաստ» օրաթերթը

 

Հասարակական կարծիքի ուսումնասիրության համառուսական կենտրոնի (ВЦИОМ) հետազոտության համաձայն՝ Հայաստանը Բելառուսից և Ղազախստանից հետո համարվում է Ռուսաստանի ամենահուսալի գործընկերը: Այս մասին հրապարակումը օրերս հայտնվել է eadaily.com–ի լրահոսում, և այս կարծիքն են արտահայտել հարցման մասնակիցները:

Ըստ հարցման արդյունքների՝ հարցվածների 64%–ը համարում է Ռուսաստանի մերձավոր դաշնակցին Բելառուսի Հանրապետությանը, ևս 57%–ը հակված է Ղազախստանի կողմը: Այնուհետև գալիս է Հայաստանը, որի օգտին արտահայտվել է հարցվածների 16%–ը: Ադրբեջանի հուսալիությունը հարցման մասնակիցները գնահատել են 10%, Ղրղզստանինը և Ուզբեկստանինը՝ 8%, Վրաստանինը՝ 6%, իսկ Տաջիկստանինը, Մոլդովայինը և Թուրքմենստանինը՝ 5–ական տոկոս: Ուկրաինայի օգտին արտահայտվածներն ընդհանրապես 1% են կազմել:

Հարցման մեկ այլ՝ ռուսների առավելագույն համակրանքն ու աջակցությունը վայելող երկրի կապակցությամբ առաջին հորիզոնականը նույնպես Բելառուսինն է՝ 60%, այնուհետև գալիս է Ղազախստանը`41%: Հայաստանն այս հարցում նույնպես հարցված ռուսների 16%–ի համակրանքին է արժանացել, Ադրբեջանը՝ 14%–ի, Վրաստանը՝ 10%–ի, Ուզբեկստանի ու Թուրքմենստանի օգտին կարծիք են հայտնել 7–ական տոկոս, Ղրղզստանի՝ 5%, Մոլդովայի՝ 4%, իսկ Ուկրաինան կրկին 1%–ի սահմանը չի հատել:

Կենտրոնի մասնագետները ռուսների՝ ԱՊՀ անդամ–երկրների ղեկավարների նկատմամբ վստահությունը նույնպես փորձել են պարզել հարցման միջոցով: Ըստ այդմ, ռուս ժողովուրդը ամենից շատ վստահում է Բելառուսի նախագահ Ալեքսանդր Լուկաշենկոյին` 62%, և Ղազախստանի առաջնորդ Նուրսուլթան Նազարբաևին` 56%:

Հրապարակման մեջ նաև այսպիսի մի դիտարկում կար, թե դատելով հարցման արդյունքներում ԱՊՀ անդամ–երկրների նախագահների անունների բացակայությունից՝ ռուսները նրանց չեն վստահում:

Այս ամենը մի կողմ: Բայց կա մի բայց: Հոդվածի վերնագրում Հայաստանի անվան շեշտադրումը կարող է և պատահական չի ընտրվել: Հատկապես վերջին շրջանում ռուսական հեռուստաալիքների կողմից, մեղմ ասած, հակահայկական քարոզչությունից հետո սա նման է հայերիս բարենկատությունը վերականգնելու փորձի: Իհարկե սա ենթադրություն է և իրականում կարող է կապված չլինել վերջին իրադարձությունների հետ:

Ամեն դեպքում ռուսական եթերում մեր ժողովրդի ու պետության հասցեին հնչած որակումներից հետո, կարծես թե, նշանակություն էլ չպիտի ունենա այդ հարցվածների 16%–ի կարծիքը:

Եվ շատ զավեշտալի է լինել և՛ Ռուսաստանի «հարսը», և՛ լավագույն դաշնակիցը, թեկուզ և երրորդ տեղում:

 

Քրիստինա Տեր-Մաթևոսյան