Կուսակցությունը պասիվ չէ, բայց կազմակերպած միջոցառումների լուսաբանումն այն չէ

Հայաստանի առաջադիմական կոմունիստական կուսակցության նախագահ Վազգեն Սաֆարյանը «Փաստ» օրաթերթի թղթակցի հետ զրույցում ասաց, որ Ազգային ժողովի ընտրություններից հետո իրենք ամենևին էլ չեն պասիվացել: Ընդհակառակը, բավականին միջոցառումներ են կազմակերպել այս ընթացքում, իսկ ներկայում պատրաստվում են հաջորդ տարվա ծրագրերը քննարկել:

Նոյեմբերի 7–ին կուսակցությունը «Հոկտեմբերյան հեղափոխության 100 ամյակը և դրա ազդեցությունը մեր ժողովրդի ճակատագրի վրա» թեմայով կոնֆերանս է կազմակերպել, որտեղ խոսվել է այն մասին, թե ինչ է տվել այդ հեղափոխությունը Հայաստանին ու ողջ աշխարհին: Բացի այդ, համագումար են անցկացրել և 130 հոգուց բաղկացած նոր կազմ են ընտրել, որից 27–ը նախագահության կազմում է: Նոյեմբերի 29–ին էլ Վետերանների միության դահլիճում Հայաստանում խորհրդային կարգերի հաստատման օրն են նշել:

Մի խոսքով, ներկուսակցական կյանքը բավականին ակտիվ է, իսկ ինչ վերաբերում է երկրի ներքաղաքական դաշտին, ապա այստեղ թեև կուսակցությունը ձեռքերը ծալած չի նստում, սակայն չի կարծում, որ բոլոր քաղաքական հայտարարություններին պետք է արձագանքեն:

Խոսելով ՀՀ նախագահի՝ ՏԻՄ ներկայացուցիչների հետ հանդիպման և Ս. Սարգսյանի հայտարարությունների մասին, Վ. Սաֆարյանը նշեց, որ այն ավելի շատ ներկուսակցական հանդիպում էր: Ինչ վերաբերում է երկրում վարվող տնտեսական քաղաքականությանը, ապա իրենք շարունակում են նույն կարծիքին մնալ և գտնում են, որ այն պետք է փոխել:

«Ազատ շուկայական հարաբերությունները երկիրը հասցրեցին 30% աղքատության: Դա և այլ փաստեր ցույց են տալիս, որ մեր ներկայացրած նախընտրական ծրագիրը երիցս ճիշտ էր: Ծրագրերը նրա համար են գրվում, որ դրանք չմնան թղթի վրա, և կյանքը ցույց է տալիս, որ կուսակցությունները, մասնավորապես իշխող կուսակցությունը, երբեմն–երբեմն նայում են մյուս կուսակցությունների ներկայացրած ծրագրերը: Եվ պետք է ասեմ, որ վերջերս կառավարության նիստերից մեկում փոխվարչապետի կողմից խնդիր դրվեց պետություն մասնավոր հատված համագործակցության մասին հայեցակարգ մշակել, որին մենք մեր ծրագրում անդրադարձել ենք»,– ասաց Վ. Սաֆարյանը:

Քաղաքական գործիչը նշեց նաև, որ հատկապես լինելով ընդդիմադիր կուսակցություն տնտեսական քաղաքականության մասով նաև պատասխանատվություն են կրում անցած խորհրդային տարիների ձեռքբերումների համար և դրանցից լավագույնները փորձում են տեղափոխել այսօրվա իրողություն: Իսկ այլ կուսակցությունների հետ համագործակցություն ստացվում է ավելի շատ լիբերալ ուղղվածություն ունեցողների հետ:

«Ձախ դաշտում դեմոկրատներն են, ում հետ մենք մշտական կապի մեջ ենք, իսկ դեկտեմբերին հրավիրված փոքրիկ խորհրդակցության ժամանակ կքննարկենք, թե հաջորդ տարվա համար ինչ մարտավարություն ենք մշակելու: Ինչ վերաբերում է խորհրդարանական կուսակցություններին, ապա մենք համագործակցում ենք այն ուժերի հետ, ովքեր կառուցողական առաջարկություններ են ներկայացնում: Օրինակ՝ ԱԺ–ում դեկոմունիզացիայի կոչերին հակադարձող ուժերը մեր համակրանքին են արժանանում, իսկ ովքեր նման կոչեր են անում, պարզ է, որ մենք նրանց հետ չենք կարող համագործակցել»,– ասաց Վ. Սաֆարյանը:

Նա նաև նշեց, որ իրենց կուսակցությունում անհատից չի կարող կախված լինել հաջողությունը, քանի որ ցանկացած նախաձեռնություն կոլեկտիվ աշխատանքի արդյունք է:

Խոսելով քաղաքացիական հասարակության կայացման հարցում կուսակցության անելիքների մասին, Վ.Սաֆարյանը նշեց, որ այստեղ նույնպես ակտիվ են: Համագործակցում են Ռուսաստանի, Չինաստանի և աշխարհի այլ երկրների կուսակցությունների հետ, բայց ցավում է, որ իրենց միջոցառումները հեռուստաընկերությունները չեն լուսաբանում:

«Ցավով պետք է ասեմ, որ մեր 4 խոշոր հեռուստաընկերությունները՝ Հ1–ը, «Շանթը», «Արմենիան» և «Ար»–ը չեն լուսաբանում մեր միջոցառումները: Ես անձամբ եմ զանգահարել հեռուստաընկերություններ և հրավիրել, որ նոյեմբերի 29–ին՝ Խորհրդային Հայաստանի հիմնադրման օրվա առիթով կազմակերպված միջոցառումը լուսաբանեն, բայց նրանցից ոչ մեկը չեկավ: Այսպիսին է հեռուստատեսության վերաբերմունքը մեր կուսակցությանը, որից ես բոլորովին էլ չեմ վիրավորվում»,– ասաց Վ. Սաֆարյանը:

 

Արմինե Գրիգորյան