Վահան Բադասյան. «Ռուսաստանը նեյտրալիտետ չի պահպանում»

Սպառազինության հավասարակշռությունն ինքներս ենք լուծել, գրում է «Փաստ» օրաթերթը

 

Ադրբեջանի պաշտպանության նախարարությունն օրեր առաջ հաղորդագրություն տարածեց՝ հայտնելով, որ Ադրբեջանը Ռուսաստանից ժամանակակից ռազմական տեխնիկայի ու ռազմամթերքի մեծ խմբաքանակ է ստացել և այն կարճ ժամկետներում կփոխանցվի զորամասերին, որոնք տեղակայված են շփման գծի երկայնքով:

Նշվել է, որ սպառազինության մատակարարումն իրականացվել է ՌԴ–ի և Ադրբեջանի միջև միջկառավարական համաձայնագրի շրջանակում։ Մարտական խաչի ասպետ, Արցախի հասարակական–քաղաքական գործիչ Վահան Բադասյանի դիտարկմամբ՝ ՌԴ–ի հեթական քայլը կարելի է դիտարկել այդ երկրի՝ նախկինում ևս որդեգրած նույն քաղաքականության համատեքստում:

«Ռուսական պետությունը 250 տարի շարունակ նույն բանն է անում: Ոչ մի տարբերություն չկա: Այստեղ մի դրական բան կա. նախկինում ողջ հայ ժողովրդի հավաքական կազմում կար կույր ռուսապաշտություն, որը մեզ 100 տարի առաջ Ցեղասպանություն, նաև մի շարք բնակավայրերի ու տարածքների կորուստներ բերեց՝ Նախիջևան, Ղարս, Արդաղան, Արևմտյան Հայաստան և այլն:

Դրականն այն է, որ այսօր արդեն մեր ժողովրդի մեջ չկա այդ կույր ռուսապաշտությունը: Փոքրից մեծ գիտենք՝ ինչքան շուտ ազատվենք ռուսական լծից, այնքան՝ լավ: Իսկ Ադրբեջանին զենք մատակարարելը միջազ

գային արենայում անբարոյական քաղաքականություն վարելու դրսևորում է: Նախ՝ Ռուսաստանը հանդիսանում է Հայաստանի ռազմավարական գործընկերը, բայց հարվածում է ՀՀ–ի թիկունքին: Ռուսաստանն այդ քայլով ցույց է տալիս նաև իր անհուսալիությունը, դաշնակցին ոչ հարիր կեցվածքը: Քաղաքական անբարոյականության մեկ այլ դրսևորում է այն, որ ՌԴ–ն, հանդիսանալով ԵԱՀԿ Մինսկի խմբի համանախագահող երկրներից մեկը, զենք է վաճառում:

Ռուսաստանը նեյտրալիտետ չի պահպանում, ինչը կա մյուս համանախագահող երկրների՝ ԱՄՆ–ի և Ֆրանսիայի դեպքում: ՌԴ–ն զինում է հակամարտող կողմերին, այսինքն՝ պատերազմ է հրահրում»,– «Փաստ»–ի հետ զրույցում ասաց Վահան Բադասյանը:

Մեր զրուցակիցը շեշտեց՝ Ռուսաստանը կամ պետք է կողմերին ընդհանրապես զենք չմատակարարի, կամ, եթե մատակարարում է՝ միայն իր ռազմավարական գործընկերոջը:

«Եվ պարտավոր է մատակարել, որովհետև Հարավային Կովկասում իր շահերը միայն Հայաստանն է հարյուրավոր տարիներ շարունակ պաշտպանել»,– ընդգծեց Վահան Բադասյանը:

Նա շեշտեց, որ Ռուսաստանի կողմից Ադրբեջանին զենք մատակարարելը քաղաքական նպատակ է հետապնդում:

«Առհասարակ հայկական հարցում Ռուսաստանը միշտ է հետապնդել այդ քաղաքական նպատակը, որովհետև Թուրքիայի հետ միշտ պրոբլեմ ունի: Իսկ Թուրքիայի հետ ունեցած խնդիրները ՌԴ–ն միշտ լուծել է հայկական հողերի և հայ ժողովրդի արյան հաշվին: ՌԴ–ն շարունակում է այդ քաղաքականությունը: Այդուհանդերձ, վերջին տարիներին ՌԴ–ին չի հաջողվում հասնել իր նպատակին և այսուհետ չի հաջողվելու:

ՌԴ–ին դա չի հաջողվում անգամ շատ ու շատ ժամանակակից զենքեր վաճառելով: Դեռ պատերազմի սկզբից՝ 1991–1992 թթ. սկսած, ՌԴ–ն շատ զենք է վաճառել, բայց սպառազինության հավասարակշռությունը ինքներս ենք լուծել: Մենք ազատագրել ենք տարածքները, ոչնչացրել կրակակետերը ու վերցրել զենքերը, տանկերը, հրանոթները, փամփուշտները, հրազենային տարբեր տեսակի զենքեր և այլն: 2016 թ. ապրիլին իրենք դիրքերի ժամանակավոր առավելություն ունեցան, բայց այն դիրքային ստրատեգիական առավելություն չէր:

Ավելի շատ հոգեբանական առավելություն էր, բայց, իհարկե, իրենք չկարողացան կատարել իրենց խնդիրը: Իսկ ապրիլից այս կողմ դիրքերում շատ բան է փոխվել: Եթե փորձեն առաջիկայում օգտագործել իրենց ժամանակակից զենքերը, այդ փոփոխությունն էլ ավելի ակնառու կլինի: Մենք այլ կերպ կվարվենք իրենց հետ»,– եզրափակեց Վահան Բադասյանը:

 

Աննա Բադալյան